Read Gaddi यूहन्‍ना 6 Bible Online

यूहन्‍ना 6 - Gaddi bible

यूहन्‍ना 6

¹इआं गल्ला थऊँ बाद यीशु गलील री अक्क झील तिबिरियास रै पारीयें कनारै चली गो।

²मणु री अक्क बडी भारी भीड़ तसेरै पिचो चलुरी थी, क्ओकि सो मणु तसेरै करूरै सामर्थ रै कम्मा जो हेरदै थियै, जैड़ै सो बमारा पुर करदा थू।

³ता यीशु तैठी अक्की पहाड़ी पुर चड़ी करी अपणै चेलै सोगी बैही गो।

⁴यहूदी रा फसह रा त्यौहार नेड़ै छूरा थू।

⁵जैहणै यीशुऐ नजर दिती ता अक्क बड़ी भीड़ जो अपणी कनारी इन्दै हेरू, ता फिलिप्पुस सितै वलु, “अहै इन्यारै खाणै तांयें करा थऊँ रोटी खरीदी लैईन?”

⁶सो तैसिओ परखणै तांयें ऐह बल्लू करदा थू, क्ओकि तैसिओ पता थू कि तैस कै करना।

⁷फिलिप्पुसे यीशु जो जवाव दिता, “दो सौ दीनार री रोटी भी लेई इल्लै ता ईयां तांयें पूरी ना भूणी, कि सबीओ थोड़ी थोड़ी भी मुळा।”

⁸तसेरै अक्की चेलै शमौन पतरसा रै भाई अन्द्रियास तैस सोगी बल्लू,

⁹“ऐठी अक्क गोबरू हा जैस बलै पँज जौआ री रोटी अतै दोई मच्छली हिन, पर ऐतनै मणु तांयें सो कै हिन?”

¹⁰यीशुऐ वलु, “मणु जो बहाली देय्आ।” तैहा जगह बडा भारी घा थू, अतै लगभग पँज हजार मर्द ही मर्द तैठी थियै।

¹¹ता यीशुऐ सो रोटी लेई, अतै प्रमात्मां रा धन्यवाद करीके तियां जो जैड़ै बैहुरै थियै बण्ड़ी दिती। अतै मच्छली जो भी तियां ही बन्डी दिता।

¹²जैहणै सो खाई करी रजी गै ता यीशुऐ अपणै चेलै सोगी बल्लू, “बचुरै रोटी रै टुकड़ै जो बटोरी लेआ कि कुछ बर्बाद ना भोआ।”

¹³ता तियैं जौआ री तियां पँज रोटी रै टुकड़ै जो खाणै थऊँ बाद भी बचुरी रोटी रै टुकड़ै री बारह टोकरी भरी।

¹⁴जैहणै मणुऐ ऐह सामर्थ भरै कम हेरै ता तियैं बल्लू, “सच मन्ज ही ऐह सो ही भविष्‍यवाणी करनै बाळा हा जैडा ऐस संसारा मन्ज ईणैबाळा थू।”

¹⁵फिरी यीशु जो पता लगी गो कि ईयां सबी तैसिओ राजा बणाणै तांयें लेई गाणा ता सो फिरी अकेला पहाडा जो चली गो।

¹⁶जैहणै सझं भूई ता यीशु रै चेलै झीला रै कनारै गै,

¹⁷अतै कफरनहूम जो गाणै तांयें तसेरै चेलै किस्ती पुर चड़ी करी झीला पार करना लगै। नैहरा भूच्ची गच्छुरा थू अतै यीशु हालि तिकर तियां बलै ना छूरा थू।

¹⁸ता तेज हवा चलनै री वजह थऊँ झीला मन्ज लैहरा चलना लगी पैई।

¹⁹जैहणै सो त्राई-चंऊर मील ही चलै भोलै ता तियैं यीशु जो पाणी पुर चलदै किस्ती री कनारी इन्दै हेरू, अतै सो डरी गै।

²⁰ता यीशुऐ तियां जो बल्लू, “अऊँ हा; डरा मत।”

²¹ता तियैं सो किस्ती पुर चढ़ाई लैऊ अतै किस्ती तैहा जगह पुजाई दिती जैठिया जो सो चलुरै थियै।

²²दूये दिन तियैं मणुऐ जैड़ै झीला पार रैई गच्छुरै थियै ऐह हेरू कि अक्की किस्ती जो छड़ी करी तैठी होर किस्ती ना थी, अतै तियां जो ऐह भी पता लगु कि यीशु अपणै चेलै सोगी तैहा किस्ती पुर ना चढुरा, पर सिर्फ चेलै ही किस्ती मन्ज गच्छुरै हिन

²³ता तिबिरियास शहर री कनारी थऊँ होर हल्की हल्की किस्ती तैहा जगह जो आई, जैड़ी तियैं प्रभु रा धन्यवाद दिणै थऊँ बाद रोटी खाई थी।

²⁴ठेरैतांये जैहणै भिड़ै हेरू कि यीशु तैड़ी निय्आ, अतै ना ही तसेरै चेलै हिन, ता सो अप्पू भी किस्ती पुर चड़ी गै अतै यीशु जो तोपदै-तोपदै कफरनहूम ग्राँ ईच्ची पुजै।

²⁵जैहणै तियैं यीशु जो झीला रै ऐस पार हेरू, ता तैस सोगी बलणा लगै, “हे गुरू तू ऐठी कैहणै आ?”

²⁶यीशुऐ तियां जो जवाव दिता, “अऊँ तूसु सोगी सच बलदा, तुहै मिन्जो ठेरैतांये ना तोपू करदै कि तुहै कोई चमत्कार हेरू, पर ठेरैतांये कि तुहै रोटी खाई अतै रजी गै।

²⁷तैस खाणै तांयें मेहनत मत करा जैडा खत्म भूच्ची गाणा, पर तैस खाणै तांयें मेहनत करा जैडा अनन्त जिन्दगी तक वणी रैहणा, जैतियो मणु रा पुत्र तुसिओ दिन्दा, क्ओकि पिता प्रमात्मैं तैस पुर ही अपणी मोहर लाऊरी हा।”

²⁸ता तियैं यीशु सोगी बल्लू, “प्रमात्मैं रै कम्मा करनै तांयें अहै कै करन?”

²⁹यीशुऐ तिंआरैं जवावा मन्ज बल्लू, “प्रमात्मैं रा कम ऐह हा कि जिनी तैसिओ भैजुरा तुहै तैस पुर विस्वास करा।”

³⁰ता तियैं तैस सोगी बल्लू, “ता तू कुण जिन्‍ना चमत्कार दसदा कि अहै तैतिओ हेरी करी तिजो पुर विस्वास करन? तू कुण जिन्‍नै कम करदा?

³¹इन्दै स्याणैं बणा मन्ज मन्ना खाऊ, जियां कि पवित्रग्रन्थ मन्ज लिखुरा, ‘तिनी तियां जो खाणै तांयें स्वर्गा थऊँ रोटी दिती’।”

³²यीशुऐ तियां सोगी बल्लू, “अऊँ तूसु सोगी सच बलदा, मूसै सो रोटी तुसिओ स्वर्गा थऊँ ना दिती, पर सो मेरा पिता ही हा जैडा स्वर्गा थऊँ तुसिओ सच्ची रोटी दिन्दा।

³³क्ओकि प्रमात्मां री रोटी सो हा जैड़ी स्वर्गा थऊँ ओसदी हा, अतै ऐस संसारा जो जिन्दगी दिन्दी हा।”

³⁴ता तियैं यीशु सितै बल्लू, “हे प्रभु, ऐह रोटी असिओ सदा दिच्छु कर।”

³⁵यीशुऐ तियां सोगी बल्लू, “जिन्दगी री रोटी अऊँ हा; जैडा मिन्जो बलै इन्दा सो कदी भी भूखा ना रैहन्दा, अतै जैडा मिन्जो पुर विस्वास करदा सो कदी भी त्रिहणा ना रैहन्दा।

³⁶पर मैंई तुसिओ बलुरा थू कि तुहै मिन्जो हेरी लैऊरा हा पर फिरी भी विस्वास ना करदै।

³⁷सो सब जैडा पिता मिन्जो दिन्दा मिन्जो बलै ईन्दा, अतै जैस कसी मिन्जो बलै ईणा तैस जो मुँ सदा अप्पू बलै रखणा।

³⁸क्ओकि अऊँ अपणी ना पर अपणै भैजणै बाळै री मर्जी पूरी करनै तांयें स्वर्गा थऊँ छूरा।

³⁹अतै मेरै भैजणै बाळै री मर्जी ऐह हा कि जैडा कुछ तिनी मिन्जो दितुरा, तैत थऊँ कुछ भी ना गुवाऊँ, पर तैतिओ आखरी दिन मन्ज फिरी जिआऊ।

⁴⁰क्ओकि मेरै पिता री ऐह मर्जी हा कि जैडा कोई पुत्रा जो हेरला अतै तैस पुर विस्वास करला, सो अनन्त जिन्दगी पा अतै अऊँ आखरी दिन फिरी जीयाऊ।”

⁴¹ऐह हुणी करी यहूदी बैंहसणा लगी पै क्ओकि तिनी बल्लू थू कि, “जैड़ी रोटी स्वर्गा थऊँ छुरी हा सो, अऊँ हा।”

⁴²अतै सो मणु कणैणा लगै “कै ऐह यूसुफ रा पुत्र यीशु निय्आ, जसेरै माता-पिता जो अहै जाणदै हिन? अबै ऐह कियां बलदा कि अऊँ स्वर्गा थऊँ छूरा?”

⁴³यीशुऐ तियां जो जवाव दिता, “अप्पू मन्ज मत बैंहसा।

⁴⁴मिन्जो बलै मेरै पितै री मर्जी रै बगैर कोई ना ईच्ची सकदा जिनी मिन्जो भैजुरा तैसिओ खिन्जी ना लेय्आ; अतै मुँ सो अन्त रै टैमैं फिरी जी उठाणा।

⁴⁵भविष्‍यवक्ता रै पवित्रग्रन्था मन्ज ऐह लिखुरा, ‘सो सब प्रमात्मैं री तरफा थऊँ सिखाऊरै भूणै।’ सो हरेक जिनी पिता थऊँ हुणुरा अतै सिखुरा सो मिन्जो बलै इन्दा हा।

⁴⁶ऐह गल्ल निय्आ कि कुणकी पितै जो हेरूरा; पर जैडा प्रमात्मां री तरफा थऊँ हा सिर्फ तिनी ही पितै जो हेरूरा।

⁴⁷अऊँ तूसु सोगी सच बलदा जैडा कोई विस्वास करदा, अनन्त जिन्दगी तसेरी ही हा।

⁴⁸जिन्दगी री रोटी अऊँ हा।

⁴⁹तून्दै स्याणैं बणा मन्ज मन्ना खाऊँ अतै मरी गै।

⁵⁰ऐह सो रोटी हा जैड़ी स्वर्गा थऊँ ओसुरी हा, ताकि मणु ऐत थऊँ खा अतै सो ना मरा।

⁵¹जिन्दगी री रोटी जैड़ी स्वर्गा थऊँ ओसुरी हा, सो अऊँ हा। अगर कोई ऐसा रोटी थऊँ खान्दा, ता तैस सदा जिन्दै रैहणा; अतै जैड़ी रोटी मुँ संसारा जो जिणै तांयें दिणी हा सो मेरा मांस हा।”

⁵²ऐसा गल्ला पुर यहूदी अप्पू मन्ज बैंहसणा लगै कि, “ऐह मणु अपणा मांस खाणै जो कियां दि सकदा?”

⁵³यीशुऐ तियां जो बल्लू, “अऊँ तूसु सोगी सच-सच बलदा कि, जैहणै तक तुहै मणु रै पुत्रा रै मांस जो खान, अतै तसेरै खूना ना पिन तैहणै तक तूसु मन्ज अनन्त जिन्दगी निया।

⁵⁴जैडा मेरा मांस खान्दा अतै खून पिन्दा अनन्त जिन्दगी तसेरी ही हा; अतै आखरी टैमां मन्ज मुँ तैसिओ फिरी जिन्दा करी दिणा।

⁵⁵क्ओकि मेरा मांस ता सच मन्ज ही खाणा हा अतै मेरा खून सच्ची पीणै री चिज हा।

⁵⁶जैडा मेरा मांस खान्दा अतै खूना पिन्दा, सो मिन्जो मन्ज बणी रैहन्दा, अतै अऊँ तैस मन्ज।

⁵⁷जियां जिन्दै पितै मिन्जो भैजुरा, अतै अऊँ पितै री वजह थऊँ जिन्दा हा, तैस ही तरह जैडा मिन्जो खान्दा मेरी वजह थऊँ जिन्दा रैहणा।

⁵⁸ऐह ही सो रोटी हा जैड़ी स्वर्गा थऊँ ओसुरी हा, ना कि सो जैड़ी स्याणैं खाई अतै मरी गै; ऐसा रोटी जैडा खान्दा तैस सदा जिन्दै रैहणा।”

⁵⁹तिनी ऐह सब गल्ला कफरनहूम रै अक्की यहूदी रै सभागार मन्ज शिक्षा दिन्दै टैमैं कणैई।

⁶⁰तसेरै चेलै मन्ज कईये जैहणै ईयां हुणु ता सो कणैणा लगै, “ऐह ता अक्क सख्त बोल हा; ईयां कुण हुणी सकदा?”

⁶¹यीशु जो पता लगी गो कि तसेरै चेलै कहा गल्ला पुर बैंहसु करदै हिन, तियां सोगी बल्लू, “कै तुसिओ ऐह गल्ल मिन्जो पुर विस्वास करनै जो रोकदी हा?

⁶²अगर तुहै मणु रै पुत्रा जो स्वर्ग गान्दै हेरन जैड़ी सो पैहलै थू, ता तुहै कै करलै?

⁶³प्रमात्मां री आत्मा ही हा जैड़ी जिन्दगी दिन्दी हा, शरीरिक जोर थऊँ कुछ भी फायदा निय्आ। जैड़ै बचन मैंई तूसु सोगी बलै सो आत्मा अतै जिन्दगी हिन।

⁶⁴पर तूसु मन्ज कुछ ऐसै हिन जैडा विस्वास ना करदै।” क्ओकि यीशु शुरू थऊँ जाणदा थू कि विस्वास ना करनै बाळै कुण हिन, अतै सो कुण हा जैस तैसिओ पकड़वाणा भी हा।

⁶⁵यीशुऐ बल्लू, “ठेरैतांये मैंई तुसिओ बल्लू कि कोई मिन्जो बलै तैहणै तक ना ईच्ची सकदा, जैहणै तक तैसिओ पितै री तरफ थऊँ वरदान ना भोआ।”

⁶⁶ईयां गल्ला रा परिणाम ऐह भुआ कि तसेरै चेलै थऊँ मतै चेलै उलटै पैरै फिरी गै अतै फिरी तैस सोगी ना चलै।

⁶⁷ता यीशुऐ तियां बारह चेलै सितै बल्लू, “कै तुहै भी चली गाणा चाहन्दै?”

⁶⁸शमौन पतरसै तैसिओ जवाव दिता, “हे प्रभु अहै कस वलै गान? अनन्त जिन्दगी रै बचन ता तिजो बलै हिन।

⁶⁹अहै तिजो पुर विस्वास करू हा अतै जाणी लैऊ हा कि तू ही प्रमात्मैं रा पवित्र पुत्र हा।”

⁷⁰यीशुऐ तियां जो जवाव दिता, “मैंई अप्पू ही तूसु बारह चेलै जो चुणुरा, ता फिरी भी तूसु मन्ज अक्क शैतान रै वशा मन्ज हा।”

⁷¹तसेरा कणैणै रा मतलब शमौन इस्करियोती रै पुत्र यहूदा इस्करियोती रै बारै मन्ज थू, क्ओकि तियां बारह चेलै मन्ज अक्क सो ही तैसिओ पकड़वाणै बाळा थू।