Read Gaddi यूहन्‍ना 7 Bible Online

यूहन्‍ना 7 - Gaddi bible

यूहन्‍ना 7

¹ईयां गल्ला भूणै थऊँ वाद यीशु गलील परदेस मन्ज घुमदा-फिरदा रैऊ। सो यहूदिया परदेस ना गाणा चाहन्दा थू, क्ओकि यहूदी तैसिओ मारनै री स्कीमा मन्ज थियै।

²यहूदी रा अक्क झोपड़ी रा त्यौहार[5] नेड़ै थू।

³ठेरैतांये तसेरै भाई तैस सोगी बल्लू, “ऐठी थऊँ यहूदिया परदेस मन्ज भूणै बाळै त्यौहारा जो चली गा, कि यहूदिया मन्ज तेरै चेलै भी तियां कम्मा हेरी सकन जियां तू करदा।

⁴क्ओकि ऐसा कोई निया जैडा मशहुर भूणा चाह, अतै लूकी करी कम करा। अगर तू ईयां कम्मा करदा ता अपणै आपा जो संसारा रै सामणै प्रकट कर।”

⁵क्ओकि तसेरै भाई भी तैस पुर विस्वास ना करदै थियै।

⁶ता यीशुऐ तियां जो बल्लू, “मेरा हालि तिकर टैमं ना आ, पर तूसु तांयें हर टैमं ठीक हा।

⁷संसार तूसु सितै नफरत ना करी सकदा, पर मिन्जो सितै दुश्‍मणी करदा हा, क्ओकि अऊँ ऐसा गल्ला री गवाही दिन्दा कि ऐस संसार रै कम बुरै हिन।

⁸तुहै ही तैस त्यौहारा जो गच्छा, मुँ ना गाणा, क्ओकि मेरा ठीक टैमं हालि तिकर ना आ।”

⁹तियां सोगी ऐह गल्ला करनै थऊँ बाद सो गलील मन्ज ही रूकी गो।

¹⁰जैहणै यीशु रै भाई त्यौहारा जो चली गै, ता सो भी तैस त्यौहारा जो गो पर चोरी छिपी करी।

¹¹यहूदी अगुवै तैसिओ त्यौहार मन्ज तोपू करदै थियै, अतै ऐह बल्लू करदै थियै, “सो कड़ी हा?”

¹²अतै भिड़ा मन्ज तसेरी ही गल्ला थी। कुछ बल्लू करदै थियै, “सो अक्क भला मणु हा” कुछ बल्लू करदै थियै, “ना सो मणु जो ठगदा हा”।

¹³फिरी भी यहूदी अगुवै रै ड़रा रै कोई तसेरै बारै मन्ज खुलीकरी ना बल्लू करदा थू।

¹⁴पर जैहणै त्यौहारा रै अध्धै दिन बीती गै; ता यीशु मन्दरा मन्ज गो अतै उपदेश दिणा लगु।

¹⁵ता यहूदी अगुवै हैरान भूच्ची करी बलणा लगै, “ऐह मणु बिना कोई विद्या पाऐ कियां ज्ञानी बणी गो?”

¹⁶ता यीशुऐ तियां जो जवाव दिता, “मेरा उपदेश मेरा निय्आ, पर पिता रा हा जिनी मिन्जो भैजुरा हा।

¹⁷अगर कोई मणु तसेरी इच्छा पूरी करनै जो तैयार हा, सो ही ऐसा शिक्षा रै बारै मन्ज जाणी सकदा कि ऐह प्रमात्मैं री तरफा थऊँ हा, कि अऊँ अपणी तरफा थऊँ बलदा।

¹⁸जैडा अपणी तरफा थऊँ बलदा सो अपणी ही बढ़ाई चाहन्दा; पर जैडा अपणै भैजणै बाळै री बढ़ाई चाहन्दा सो ही सचा हा, तैस मन्ज कोई भी अधर्म ना भुन्दा।

¹⁹कै मूसै तूसु तांयें व्यवस्था ना बाणाऊरी? अतै तुहै फिरी भी तियां नियमा रा पालन ना करदै। तुहै कजो मिन्जो मारनै री ताक मन्ज हिन?”

²⁰मणुऐ तैसिओ जवाव दिता, “तिजो मन्ज दुष्‍टात्मा हा! कुण तिजो मारनै री ताक मन्ज हा?”

²¹यीशुऐ बल्लू, “मैंई अक्क कम करू[6] अतै तुहै सब हैरानी करदै।

²²ऐसा व्जहा थऊँ मूसै तुसिओ खतना री व्यवस्था दिती हा-ठेरैतांये ना कि ऐह मूसा री हा, पर बजुर्गा री तरफा थऊँ हा; अतै तुहै विश्रामदिन मणु रा खतना करदै हिन।

²³जे अगर विश्रामदिन मणु रा खतना ठेरैतांये करदै हिन कि मूसा रै व्यवस्था रा उल्लंघन ना भोआ, ता तुहै मिन्जो पुर ठेरैतांये जल्ळण करू करदै कि मैंई विश्रामदिन अक्की मणु जो बिलकुल ठीक करी दिता।

²⁴मुँहा हेरी न्याय मत करा, पर धर्म सितै न्याय करा।”

²⁵ता यरूशलेम रै कुछ मणु बलणा लगै, “कै ऐह सो ही मणु निया जैसियो अधिकारी मारनै री कोशिश करू करदै हिन?

²⁶पर हेरा, ऐह ता खुल्लमखुला गल्ला करू करदा हा, अतै ऐह ऐसिओ कुछ ना बल्लू करदै हिन। कै सच मन्ज अधिकारी जो पता लगी गच्छुरा कि ऐह ही मसीहा हा?

²⁷मगर कुछ भी भोआ, पर अहै जाणदै हिन कि ऐह मणु कठीआ रा हा; पर जैहणै मसीहा ईणा, ता कसिओ पता ना लगणा कि सो कठीआ रा हा।”

²⁸ता यीशुऐ मन्दरा मन्ज शिक्षा दिन्दै जोरा सितै बल्लू, “तुहै मिन्जो जाणदै अतै ऐह भी जाणदै कि अऊँ कठी थऊँ छूरा। अऊँ अप्पू ता ना छूरा पर मेरा भैजणैबाळा सचा हा, तैसिओ तुहै ना जाणदै।

²⁹मगर अऊँ तैसिओ जाणदा; क्ओकि अऊँ तसेरी तरफा थऊँ हा अतै तिनी ही मिन्जो भैजुरा।”

³⁰इआं गल्ला थऊँ बाद तियैं अगुवै तैसिओ पकडणा चाऊ तांभी कसिओ तैस पुर हत्थ पाणै रा हिम्मत ना भूई, क्ओकि तैसिओ पकड़णै रा टैमं हालि ना थू।

³¹फिरी भी भिड़ा मन्ज मतै मणुऐ तैस पुर विस्वास करू, अतै बलणा लगै, “मसीहा जैहणै ईणा ता कै ऐस थऊँ भी बड़ै-बड़ै चमत्कार करनै जैड़ै ईनी दस्सै?”

³²फरीसी तसेरै बारै मन्ज मणु जो लुक्‍की-छिप्‍पी करी गल्ला करदै हुणु; फिरी प्रधान याजकै अतै फरीसीये तैसिओ पकड़णै तांयें सपाई भैजै।

³³ता यीशुऐ बल्लू, “अऊँ थोड़ी देरा तक ही तूसु सोगी हा; फिरी अपणै भैजणै बाळै बलै चली गाणा।

³⁴तूसु मिन्जो तोपणा, पर मुँ ना मुलणा, अतै जैड़ी मुँ भूणा तैड़ी ना ईच्ची सकदै।”

³⁵ता यहूदी अगुवै अप्पू मन्ज कणैणा लगै, “ऐस करा गाणा कि दोबारा ना मूळला? कै ऐस तियां वलै गाणा जैड़ै यूनानी मणु मन्ज यहूदी ऐरा औरा रैहन्दै, अतै यूनानी जो भी उपदेश दिला?

³⁶ऐह कै गल्ल हा जैड़ी ईनी बल्ली हा, कि ‘तूसु मिन्जो तोपणा, पर ना मुळना; अतै जैड़ी मुँ भूणा, तैड़ी तुहै ना ईच्ची सकदै?’ ”

³⁷त्यौहारा रै मुक्दै दिन, जैडा खास दिन थू, यीशु खड़ी गो अतै जोरा सितै बल्लू, “अगर कोई त्रिहणा हा ता मिन्जो वलै अईआ अतै पिय्आ।

³⁸जैस मिन्जो पुर विस्वास करना, जिन्‍ना कि पवित्रग्रन्था मन्ज हा, ‘तंयारै दिला मन्ज जिन्दगी दिणैबाळै पाणी री नदी फूट्टि निकळणी हिन।’ ”

³⁹तिनी ऐह बचन पवित्र आत्मा रै बारै मन्ज बलै थियै, जैड़ी विस्वास करनै बाळै जो मुळन बाळी थी; क्ओकि आत्मा हाळि तिकर ना उतुरूरा थू, क्ओकि यीशु भी हाळि तिकर अपणै महिमा तक ना पुजूरा थू।

⁴⁰ता भीड़ मन्ज कुणकी-कुणकी ऐह गल्ला हुणी करी वलु, “सच मन्ज ऐह सो भविष्‍यवाणी करनै बाळा हा।”

⁴¹होर बलणा लगै, “ऐह मसीहा हा।” पर कुछ बलणा लगै, कजो? “कै मसीहा गलील थऊँ ईणा?

⁴²कै पवित्रग्रन्था मन्ज ऐह ना लिखुरी कि मसीहा दाऊद रै खानदाना थऊँ अतै बैतलहम ग्राँ थऊँ ईणा, जैड़ी दाऊद रैहन्दा थू?”

⁴³अतै तसेरी वजह थऊँ मणु मन्ज फूट पैई गई।

⁴⁴तियां मणु मन्ज कुछ तैसिओ पकड़वाणा चाहन्दै थियै पर कसीये भी तैस पुर हथ ना पाऊ।

⁴⁵ता फिरी सपाई प्रधान याजक अतै फरीसी वलै फिरी आये; तियैं सो पूछु, “तुहै तैसिओ कजो ना लेई के आये?”

⁴⁶सपाईये जवाव दिता, “कुणी भी मणुऐ ईनी गल्ला ना करी।”

⁴⁷फरीसीये तियां जो वलु, “कै तुसिओ भी भकाऊ हा?

⁴⁸कै सरदारा या फरीसी थऊँ कुणकी तैस पुर विस्वास करू हा?

⁴⁹पर ऐह मणु जैड़ै मूसा री व्यवस्था ना जाणदै शापित हिन।”

⁵⁰नीकुदेमुस जैडा तैस वलै पैहलै आ थू अतै तंयारा ही मणु थू, तियां सोगी बलणा लगा

⁵¹“कै इन्दै नियम, कसकि री हुणनै थऊँ पैहलै ही ऐह बलदै हिन कि ऐह दोषी हा?”

⁵²तियैं तैस सितै वलु, “कै तू भी गलील रा हा? पवित्रशास्त्र मन्ज तोप अतै हेर कि गलील मन्ज कोई भविष्‍यवाणी करनै बाळा ना भूणा।”

⁵³ता हर कोई अपणै अपणै घरा जो चली गै।[7]