Read Gaddi यूहन्‍ना 8 Bible Online

यूहन्‍ना 8 - Gaddi bible

यूहन्‍ना 8

¹[पर यीशु चेलै सोगी जैतून रै पहाडा जो गो।

²भ्यागा फिरी सो मन्दरा जो आ; सब मणु तैस वलै आये अतै सो बैही करी तियां जो उपदेश दिणा लगू।

³ता तैस टैमैं शास्त्री अतै फरीसी अक्क जनानी जो पकड़ी करी लेई आये जैड़ी व्यभिचार करदी पकड़ी थी, अतै तैहा जो मन्जै जिन्‍नै खडेरी करी यीशु सितै वलु,

⁴“हे गुरू, ऐह जनानी व्यभिचार करदै पकड़ी हा।

⁵मूसै री व्यवस्था मन्ज असिओ ऐह हूक्म दितुरा कि ऐसी जनानी जो पत्थर मारी के मकाई देय्आ; ता तू सारै बारै मन्ज कै बलदा?”

⁶तियैं तैसिओ परखणै तांयें ऐह गल्ल बली ताकि तैस पुर दोष लाणै जो कोई मौका मुळी गच्छा। पर यीशु नियूँठा भूच्ची करी धरती पुर उँगळी सितै कुछ लिखणा लगू।

⁷जैहणै सो तैस थऊँ पूछदै ही रैह, ता तिनी सिधै भूच्ची करी तियां जो जवाव दिता, “तूसु मन्ज जिनी पाप ना करूरा, सो ही पैहलै ऐसा जो पत्थर मारा।”

⁸अतै सो फिरी नियूँठा भूच्ची करी धरती पुर उँगळी सितै कुछ लिखणा लगी पैऊँ।

⁹पर सो ऐसा गल्ला हुणी करी कै मोट्टै, कै हल्कै सब अक्क अक्क करीके तैड़ी थऊँ चली गै, अतै यीशु अकेला रैई गो अतै सो जनानी भी मन्जै खडूरी अकेली रैई गई।

¹⁰यीशुऐ सिधै भूच्ची करी तैहा थऊँ पूछु, “ओ जनानी ता सो करा गै? कै कुणिए भी तिजो दण्ड़ ना दिता?”

¹¹तैहै वलु, “हे प्रभु, कुणिए भी ना।” यीशुऐ वलु, “अऊँ भी तिजो दण्ड़ ना दिन्दा; गच्छ अतै फिरी पाप मत करदी।][8]”

¹²यीशुऐ फिरी मणु सोगी वलु, “संसारा री ज्योती अऊँ हा; जैडा मेरै पिचो चलदा सो नैहरै मन्ज ना चलदा, पर जिन्दगी दिणै बाळी ज्योती पान्दा।”

¹³फरीसीये तैस सोगी वलु, “तू अपणी गवाही अप्पू दिन्दा तेरी गवाही सच निय्आ।”

¹⁴यीशुऐ तियां जो जवाव दिता, “भलै ही अऊँ अपणी गवाही अप्पू दिन्दा, फिरी भी मेरी गवाही ठीक हा, क्ओकि अऊँ जाणदा कि अऊँ करा थऊँ छूरा अतै करा जो गाणा? पर तुहै ना जाणदै कि अऊँ करा थू छूरा अतै करा जो गाणा।

¹⁵तुहै मणु रै विचार धारा रै अनुसार न्याय करदै; अऊँ कसी रा न्याय ना करदा।

¹⁶अतै अगर जे न्याय करला भी ता मेरा न्याय सचा हा; क्ओकि अऊँ अकेला निय्आ, पर अऊँ हा अतै मेरा पिता मिन्जो सोगी हा जिनी मिन्जो भैजुरा।

¹⁷तुन्दी व्यवस्था मन्ज भी लिखुरा कि दूँ जिणै री मिलीकरी गवाही ही सच भुन्दी हा;

¹⁸अक्क ता अऊँ अप्पू ही गवाही दिन्दा, अतै दुआ पिता मेरी गवाही दिन्दा जिनी मिन्जो भैजुरा।”

¹⁹तियैं तैस सोगी वलु, “तेरा पिता कड़ी हा?” यीशुऐ जवाव दिता, “ना तुहै मिन्जो जाणदै ना ही मेरै पितै जो, अगर मिन्जो जाणदै ता मेरै पितै जो भी जाणदै।”

²⁰ऐह गल्ला तिनी मन्दरा मन्ज उपदेश दिन्दै भण्ड़ार घरा मन्ज बली, अतै कसीये भी तैसिओ ना पकडु, क्ओकि तसेरा टैमं हालि तिकर ना छूरा थू।

²¹यीशुऐ फिरी तियां सोगी वलु, “अऊँ गान्दा हा, अतै तूसु अऊँ तोपणा पर तूसु पाप करदै करदै मरना; जैड़ीआ जो अऊँ चलूरा, तैड़ी तुहै ना ईच्ची सकदै।”

²²यहा गल्ला हुणी करी यहूदी बलणा लगै, कै ऐह अपणै आपा जो मारी देला, जैडा ऐह वलु करदा, “जैड़ी अऊँ चलूरा तैड़ी तुहै ना ईच्ची सकदै?”

²³यीशुऐ तियां सोगी वलु, “तुहै संसारा रै हिन, अऊँ स्वर्गा रा हा; तुहै ऐस संसारा रै हिन अऊँ ऐस संसारा रा निय्आ।

²⁴ठेरैतांये मैंई तूसु सोगी वलु हा कि तूसु अपणै पापा सोगी मरना, क्ओकि अगर तुहै विस्वास ना करलै कि अऊँ सो ही हा, ता तूसु पाप करदै करदै मरना।”

²⁵यहूदी अगुवै यीशु सोगी वलु, “तू हा कुण?” यीशुऐ तियां जो वलु, “सो ही हा जैडा शुरू थऊँ तुसिओ बलदा आ।

²⁶तून्दै बारै मन्ज बडा कुछ कणैणा अतै फैसला लैणा हा, पर मेरा भैजणैबाळा सचा हा, अतै जैडा मैंई तैस थऊँ हुणुरा सो ही ऐस संसारा जो बलदा।”

²⁷सो ऐह ना समझै कि असिओ पिता रै बारै मन्ज बलदा हा।

²⁸ता यीशुऐ वलु, “जैहणै तूसु मणु रै पुत्रा जो ऊंचाई पुर चढ़ाणा, तैहणै जाणना कि अऊँ सो ही हा; अऊँ अपणै आप कुछ ना करदा पर जिन्‍ना मेरै पितै मिन्जो सखाऊरा तियां ही गल्ला करदा हा।

²⁹मेरा भैजणैबाळा मेरै सोगी हा; तिनी मिन्जो अकेला ना छडु क्ओकि अऊँ सदा सो ही कम करदा जैत थऊँ सो खुश भुन्दा हा।”

³⁰सो ऐह गल्ला करू ही करदा थू कि मतै मणुऐ तैस पुर विस्वास करू।

³¹ता यीशुऐ तियां यहूदी मणु जो जियें तैस पुर विस्वास करू थू, वलु, “अगर तुहै मेरै बचना जो हुणी करी आज्ञाकारी बणळै ता तूसु मेरै चेलै कहलाणा।

³²तूसु सच्चाई जो जाणना, अतै सच्चाई ही तुहै आजाद करनै।”

³³तियैं जवाव दिता, “अहै ता अब्राहम रै खानदाना थऊँ हिन, अतै कदी भी कसी रै गुलाम ना भुएै। फिरी तू कियां बलदा कि असु आजाद भूच्ची गाणा?”

³⁴यीशुऐ तियां जो जवाव दिता, “अऊँ तूसु सोगी सच बलदा जैडा कोई पाप करदा सो पापा रा गुलाम हा।

³⁵गुलाम सदा घरा मन्ज ना रैहन्दा; पुत्र सदा रैहन्दा हा।

³⁶ठेरैतांये अगर पुत्र तुसिओ आजाद करा, ता सच मन्ज ही तूसु आजाद भूच्ची गाणा।

³⁷अऊँ जाणदा कि तुहै अब्राहम रै खानदाना थऊँ हिन; तांभी मेरै बचना जो तून्दै दिला मन्ज जगह निय्आ। अतै तुहै मिन्जो मारना चाहन्दै हिन।

³⁸अऊँ सो ही करदा जैडा पितै वलै हेरूरा; अतै तुहै सो ही करदै रैहन्दै हिन जैडा अपणै पितै थऊँ हुणुरा।”

³⁹तियैं तैसिओ जवाव दिता, “इन्दा पिता ता अब्राहम हा।” यीशुऐ तियां सोगी वलु, “अगर तुहै अब्राहम री सन्तान भुन्दै ता अब्राहम सैईऐं कम करदै।

⁴⁰पर अबै तुहै मिन्जो ऐसै मणु जो मारना चाहन्दै हिन, सो सच्चाई रा बचन हुणाऊ हा जैडा तिनी प्रमात्मैं थऊँ हुणुरा; ईना कम ता अब्राहमे ना करूरा।

⁴¹तुहै अपणै पितै साईयें कम करदै हिन।” तियैं तैस सोगी वलु, “अहै व्यभिचार थऊँ ना जमुरै, इन्दा अक्क ही पिता हा मतलब प्रमात्मां।”

⁴²यीशुऐ तियां जो वलु, “अगर प्रमात्मां तून्दा पिता भुन्दा ता, तुहै मिन्जो सोगी भी प्रेम रखदै; क्ओकि अऊँ प्रमात्मैं री कनारी थऊँ छूरा। अऊँ अप्पू ना छूरा पर तिनी मिन्जो भैजुरा हा।

⁴³तुहै मेरी गल्ला कजो ना समझदै? ठेरैतांये कि तुहै मेरै बचना हुणी ना सकदै।

⁴⁴तुहै अपणै पितै शैतान थऊँ हिन अतै अपणै पितै री इच्छा जो पुरा करना चाहन्दै हिन। सो ता शुरू थऊँ ही हत्यारा हा अतै सच ना बलदा, क्ओकि सच तैस मन्ज हा हि ना। जैहणै सो झूठ बलदा ता अपणै स्वभाव थऊँ ही बलदा; क्ओकि सो झूठा हि ना पर झूठ रा भी पिता हा।

⁴⁵पर अऊँ जैडा सच बलदा, ठेरैतांये ही तुहै मेरा विस्वास ना करदै

⁴⁶तूसु मन्ज कुण मिन्जो पापी ठहरान्दा? अगर अऊँ सच बलदा ता मेरा विस्वास कजो ना करदै?

⁴⁷जैडा प्रमात्मैं थऊँ भुन्दा सो प्रमात्मैं री गल्ला हुणदा, अतै तुहै ठेरैतांये ना हुणदै कि तुहै प्रमात्मैं री तरफा थऊँ ना हिन।”

⁴⁸ऐह हुणी करी यहूदी तैस सोगी बलणा लगै, “कै अहै ठीक ना बलदै कि तू सामरी हा, अतै तिजो मन्ज दुष्‍टात्मा हा?”

⁴⁹यीशुऐ जवाव दिता, “मिन्जो मन्ज दुष्‍टात्मा निय्आ; पर अऊँ अपणै पिता रा आदर करदा, अतै तुहै मेरा निरादर करदै।

⁵⁰पर अऊँ अपणी पूजा करवाणा ना चाहन्दा; हाँ, पर अक्क हा जैडा चाहन्दा अतै न्याय भी करदा।

⁵¹अऊँ तूसु सोगी सच बलदा कि अगर कोई मणु मेरै बचना पुर चलला, सो सदा तक ना मरला”

⁵²यहूदिये तैस सोगी बल्लू, “अबै असिओ पता लगी गो हा कि तिजो मन्ज दुष्‍टात्मा हा। अब्राहम मरी गो, अतै भविष्‍यवाणी करनै बाळै भी मरी गै; अतै तू बलदा, अगर कोई मेरै बचना पुर चलला ता सो कदी ना मरला।

⁵³इन्दा पिता अब्राहम ता मरी गो। कै तू तैस थऊँ भी बड्डा हा? अतै भविष्‍यवाणी करनै बाळै भी मरी गै। ता तू अपणै आपा जो कै समझदा?”

⁵⁴यीशुऐ जवाव दिता, “अगर अऊँ अपणी जय-जयकार अप्पू ही करू ता मेरी जय-जयकार कुछ भी निय्आ; पर मेरी जय-जयकार करनै बाळा मेरा पिता हा जैसियो तुहै अपणा प्रमात्मां बलदै हिन।

⁵⁵तुहै ता तैसिओ ना जाणु पर अऊँ तैसिओ जाणदा हा। अगर अऊँ बल्लू कि अऊँ तैसिओ ना जाणदा, ता तूसु साईयें मुँ भी झूठै भूच्ची गाणा; पर अऊँ तैसिओ जाणदा अतै तसेरै बचना पुर चलदा हा।

⁵⁶तून्दा पिता अब्राहम मेरै ईणै री भाळा मन्ज बड्डा मस्त थू; अतै तिनी हेरू अतै खुशी मनाई।”

⁵⁷यहूदी बलणा लगै, “तू ता हालि तिकर पजाँह साला रा भी निय्आ, फिरी भी तैंई अब्राहम जो हेरूरा?”

⁵⁸यीशुऐ तियां सोगी बल्लू, “अऊँ तूसु सोगी सच बलदा, कि अब्राहम रै पैदा भूणै थऊँ पैहलै रा अऊँ हा।”

⁵⁹ता तियैं तैसिओ मारनै तांयें पत्थर चुकै, पर यीशु लुक्‍की करी मन्दरा थऊँ नकैई गो।