Read Gaddi चेलै रै कम 1 Bible Online

चेलै रै कम 1 - Gaddi bible

चेलै रै कम 1

¹हे थियुफिलुस, मैंई अपणी पैहली कताब[1]: तियां सबी गल्ला रै बारै मन्ज लिखुरीआ जैड़ी यीशु शुरू थऊँ असु मन्ज करदा अतै सखांदा रैऊ।

²तैस दिन तक जैहणै सो र्स्वगा जो ऊपर ना उठाया गो। र्स्वगा जो गाणै थऊँ पैहलै तिनी तियां चुणुरै प्रेरिता जो पवित्र आत्मा री शक्ति सोगी तियां गल्ला जो दस्सु, जियां गल्ला जो सो सखाणा चाहन्दा थू।

³तिनी क्रूस पुर दुख उठाणै अतै मरनै थऊँ बाद बडै़ पक्कै सबूता सोगी तियां पुर अपणै आपा जो जिन्दा प्रकट करूरा। अतै चाळी दिन तक सो तियां जो हुजदा रैऊरा, अतै प्रमात्मैं रै राज्य री गल्ला करदा रैऊरा।

⁴अक्क बरी जैहणै सो इकट्ठै खाणा बैईठै ता यीशुऐ चेलै सोगी मुळी करी तियां जो आज्ञा दिती कि “यरूशलेम जो ना छड़न, पर मेरै पितै री तैहा प्रतिज्ञा रै पूरै भूणै री भाळ करदै रेय्आ, जठेरी चर्चा तुहै मिन्जो थऊँ हुणुरी हा।

⁵क्ओकि यूहन्‍नै ता पाणी रा बपतिस्मा दितुरा पर थोड़ै दिन बाद तूसु प्रमात्मैं थऊँ पवित्र आत्मा रा बपतिस्मा पाणा।”

⁶ता चेलै इकट्ठै भूच्ची करी यीशु थऊँ पूछु, “हे प्रभु, कै तूसु हबजु ही रोम थऊँ छुटकारा दिकरी इस्त्राएल रा राज्य दोबारा स्थापित करना?”

⁷तिनी तियां सितै बल्लू, “तैस टैमां अतै काल जो जाणना, तून्दा कम निय्आ जैडा पितै रै हत्था मन्ज हा।

⁸पर जैहणै पवित्र आत्मा तूसु पुर ईणा ता तूसु सामर्थ पाणा; अतै यरूशलेम अतै पूरै यहूदिया अतै सामरिया परदेस मन्ज, अतै धरती रै अन्त तक मेरै गवाह भूणै।”

⁹ऐह बलदै बलदै सो स्वर्गा री कनारी जो चुकी लैऊ, अतै बदळै सो तंयारी हाख्री थऊँ लुकाई पाऊ।

¹⁰तसेरै गान्दै जैहणै सो अम्बरा री कनारी अक्कटक लाई करी हेरू करदै थियै, ता दोई मणु सफेद कपड़ै लाऊरै तियां बलै अचानक ईच्ची खड़ियै,

¹¹अतै तियां सितै बल्लू, “हे गलीली मणुओ, तुहै कजो खड़ी करी अम्बरा री कनारी अक्कटक लाई करी हेरू करदै हिन? ऐह यीशु, जैडा तून्दै नेड़ै थऊँ स्वर्गा जो चुकी लैऊ हा, जैस तरीकै तुहै ऐह स्वर्गा जो गान्दा हेरू हा तैस तरीकै ऐस फिरी ईणा।”

¹²जैहणै चेलै जैतून नां रै पहाड़ा थऊँ जैडा यरूशलेम शहर रै नेड़ै थू फिरी आये। जैड़ा अक्क किलोमिटर रै लगभग थू।

¹³जैहणै सो शहर मन्ज पुजै ता सो तैस घरा रै बोड़ी जो गै, जैड़ी ऐह सब चेलै पतरस, यूहन्‍ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई रा पुत्र याकूब, शमौन जेलोतेस अतै याकूब रा पुत्र यहूदा रहन्दै थियै।

¹⁴ऐह सब चेलै यीशु रै भाई, माता मरियम अतै कई होर जनानी सोगी अक्क चित भूच्ची करी प्रार्थना मन्ज लगी रैह।

¹⁵ता तियां ही दिना मन्ज पतरस तैड़ी लगभग अक्क सो बीह विस्वासी मणु रै मन्जै खड़ी करी बलणा लगा,

¹⁶“हे भाईओ, जरूरी थू की पवित्रग्रन्था रा लिखुरा पुरा भोआ जैडा पवित्र आत्मा दाऊद रै मुँहा थऊँ यहूदा रै बारै मन्ज, पैहलै ही दस्सी दितुरा थू, जैडा यीशु जो पकड़ाणै बाळा रा अगुवा थू।”

¹⁷“क्ओकि सो ता असु मन्ज ही गिणी गो हा, अतै ऐसा सेवकाई मन्ज सहभागी भी भुआ।

¹⁸(तिनी अधर्म री कमाई सितै बगड़ी खरीदी लेई, अतै मुण्ड़ा रै भारै पैऊ हा अतै तसेरा पेट फटी गोआ अतै तसेरी सब आन्तड़ी नकैई गई हिन।

¹⁹ऐसा गल्ला जो यरूशलेम रै सब रैहणै बाळै जाणी गै, ऐठी तक कि तैसा बगड़ी रा नां तसेरी बोली मन्ज ‘हकलदमा’ मतलब ‘खूना री बगड़ी’ पैई गो।)”

²⁰भजन संहिता मन्ज लिखुरा, “तसेरा घर उजड़ी गच्छा, अतै तैत मन्ज कोई ना बसा, अतै तसेरा औह्दा कोई होर लेई लेय्आ।”

²¹“ठेरैतांये जैतणै दिन तक प्रभु यीशु असु सोगी इन्दा गान्दा रैऊ मतलब यूहन्‍ना रै बपतिस्मा थऊँ लेई करी तैसिओ इन्दै सामणै ऊपर स्वर्गा जो चुकणै तक जैड़ै मणु बराबर असु सोगी रैह।

²²ठीक ता ऐह हा कि तियां मन्ज अक्क मणु असु सोगी तसेरै दोबारा जी भूणै थऊँ बादा रा गवाह भूच्ची गच्छा।”

²³ता तिन्यै दूँ जीणा जो खड़ेरू, अक्क यूसुफ जैसिओ बरसबा भी बलदै थियै, जैसेरा दुआ नां यूसतुस हा, अतै दुआ मत्तियाह जो,

²⁴अतै ऐह प्रार्थना करी, “हे प्रभु, तू जैडा सबी रै मना जो जाणदा, ऐह प्रकट कर कि इन्या दूनी मन्ज तैंई कसिओ चुणु हा,

²⁵ताकि ऐह तैहा सेवकाई अतै प्रेरिताई री जगह लेई सकन जैतिओ यहूदा छड़ी करी तैहा जगह जो गच्छुरा हा जठेरै सो लायक थू।”

²⁶ता तिन्यै तंयारै बारै मन्ज चिट्ठी पाई, अतै चिट्ठी मन्ज मत्तियाह रा नां निकळू। ता सो तियां ग्यारह प्रेरिता सोगी गिणआ गो।