Read Gaddi चेलै रै कम 12 Bible Online

चेलै रै कम 12 - Gaddi bible

चेलै रै कम 12

¹तैस टैमैं राजा हेरोदेस कलीसिया रै कुछ मणु जो सताऊ अतै जेला मन्ज पाई दिता।

²तिनी प्रेरित यूहन्‍ना रै भाई याकूब जो तलवार सितै मरवाई दिता।

³जैहणै तिनी हेरू कि यहूदी मणु ऐत थऊँ खुश भूचु करदै हिन, ता तिनी पतरस जो पकड़ी लैऊ। सो अखमीरी रोटी रै दिन थियै।

⁴हेरोदेसै तैसिओ पकड़ी करी जेला मन्ज बन्द करी दिता, अतै चऊर-चऊर सपाई जो चौं पैहरै मन्ज रखू; ऐह सोची करी कि फसह रै त्यौहार थऊँ बाद तैसिओ मणु रै सामणै लैईआ।

⁵पतरस जेला मन्ज बन्द थू; पर कलीसिया तैस तांयें पूरै दिला सोगी प्रमात्मैं सितै प्रार्थना करू करदी थी।

⁶जैहणै हेरोदेस तैसिओ मणु रै सामणै लैईणै जो थू, तैहा ही राती पतरस दूँ जंजीरा सितै बनुरा दूँ सपाई रै मन्जै सोऊ करदा थू; अतै पैहरैदार द्धारा पुर जेला री रखवाली करू करदै थियै।

⁷ता अचानक, प्रभु रा अक्क स्वर्गदूत ईच्ची खडू अतै तैसा कोठरी मन्ज लौ चमकी, अतै तिनी पतरसा री पसली पुर हत्थ मारी के तैसिओ जगाऊ अतै बल्लू, “उठ, झट कर।” अतै तसेरै हत्था थऊँ जंजीरा खुलीकरी पैई गई।

⁸ता स्वर्गदूतै तैस सोगी बल्लू, “कमर कस, अतै अपणै जुटै पा।” तिनी तियां ही करू। फिरी तिनी तैस सोगी बल्लू, “अपणा चोळा लाई करी मेरै पिचो चली पै।”

⁹पतरस निकळी करी तसेरै पिचो चली पैऊ; पर ऐह ना जाणदा थू कि जैडा कुछ स्वर्गदूत करू करदा ऐह सच हा, बल्कि ऐह सोचु कि अऊँ सुपना हेरू करदा।

¹⁰ता सो पैहलै अतै दूये पैहरै थऊँ नकैई करी तैस लोहे रै फाटका बलै पुजै, जैडा नगरा री कनारी थू। सो तियां तांयें अपणै आप खुली गो, अतै सो निकळी करी अक्क गळी मितै चली गै, अतै तैहणै ही स्वर्गदूत तैसिओ छड़ी करी चली गो।

¹¹ता पतरस होश मन्ज आ अतै बल्लू, “अबै मैंई सच जाणी लैऊआ कि प्रभुऐ अपणा स्वर्गदूत भैजी करी मिन्जो हेरोदेस रै हत्था थऊँ छुड़ाई लैऊआ, अतै यहूदी अगुवै री सब उम्मीद त्रोड़ी दिती हिन।”

¹²ऐह जाणी करी सो तैस यूहन्‍ना री माता मरियम रै घरा जो गो, जैसिओ मरकुस भी बलदै थियै। तैड़ी मणु इकट्ठै भूच्ची करी प्रार्थना करू करदै थियै।

¹³जैहणै तिनी दारा री खिड़की खटखटाई, ता रूंदै नां री अक्क दासी हेरना आई।

¹⁴अतै पतरसा री आवाज जो पछैणी करी तैसै खुशी सितै दरवाजा ना खोलू पर दौड़ी करी अन्दर गई, अतै सबी सोगी वलु की पतरस दारा पुर खडूरा।

¹⁵तिन्यै तैसा सोगी बल्लू, “तू पागल हा।” पर सो पक्का करीके बलणा लगी कि पतरस ही हा। ता तिन्यै बल्लू, “तसेरा स्वर्गदूत भूणा।”

¹⁶पर पतरस खटखटान्दा रैऊ ता तिन्यै खिड़की खोली, अतै तैसिओ हेरी करी हैरान रैई गै।

¹⁷ता तिनी तियां जो सिनक लाई कि चुप रैहन; अतै तियां जो दस्सु कि प्रभु कस तरीकै सितै तैसिओ जेला थऊँ कड़ी लेई आ। फिरी बल्लू, “याकूब अतै मसीह पिचो चलनै बाळै विस्वासी जो ऐह गल्ल दस्सी दिन्यै।” ता सो निकळी करी दूई जगह जो चली गो।

¹⁸भ्यागा सपाई मन्ज बड़ी हलचल मची गई कि पतरस करा गो।

¹⁹जैहणै हेरोदेसै तसेरी तोप पाई अतै सो ना मुळु, ता पैहरैदारै री जाँच करी अतै हूक्म दिता कि सो मारी दितै गान; अतै सो यहूदिया जो छड़ी करी कैसरिया मन्ज रैहणा लगु।

²⁰हेरोदेस सूर अतै सैदा शहर रै मणु थऊँ बड़ा नाखुश थू। ठेरैतांये सूर अतै सैदा शहरा रै प्रमुख मणु अक्क मन भूच्ची करी तैस वलै आये, अतै बलास्तुस जो जैडा राजा रा अक्क कर्मचारी थू, मनाई करी मेल कराणा चाहन्दा थू; क्ओकि राजा रै देशा थऊँ तिआंरै देशा रा पालन पोषण भुन्दा थू।

²¹ठहराऊरै दिन हेरोदेस राजवस्त्र पैहनी करी सिंहासन पुर बैहु, अतै तियां जो व्याख्यान दिणा लगु।

²²ता मणु बक्की नकैऐ, “ऐह ता मणु रा ना पर प्रमात्मैं रा बोल हा।”

²³तैस ही टैमैं प्रभु रै अक्की स्वर्गदूतै तैसिओ मारी दिता, क्ओकि तिनी प्रमात्मैं जो महिमा ना करी; अतै तैसिओ कीड़ै पै अतै सो मरी गो।

²⁴पर प्रमात्मैं रा बचन बड़दा अतै फैलदा गो।

²⁵जैहणै बरनबास अतै शाऊल अपणी सेवा पूरी करी बैहै ता यूहन्‍ना[6] जो जैडा मरकुस कहलान्दा थू सोगी लेई करी यरूशलेम जो फिरी आये।