Read Gaddi चेलै रै कम 14 Bible Online

चेलै रै कम 14 - Gaddi bible

चेलै रै कम 14

¹इकुनियुम शहर मन्ज ऐसा भुआ कि सो यहूदी रै सभागार मन्ज सोगी सोगी गै अतै ऐस तरीकै री गल्ला करी की यहूदी अतै गैर यहूदी दूनी मन्ज बड़ै मणुऐ विस्वास करू।

²पर विस्वास ना करनैवाळै यहूदिये गैर यहूदी रै मन विस्वासी भाई रै वरोधा मन्ज भड़काए अतै कटुता पैदा करी दिती।

³पौलुस अतै बरनबास बड़ै दिन तक तैड़ी रैह, अतै प्रभु रै भरोसै पुर हिम्मत सोगी गल्ला करदै थियै; अतै सो तंयारै हत्थै चमत्कार अतै हैरानी बाळै कम करवाई करी अपणी कृपा रै बचन थऊँ गवाही दिन्दा थू।

⁴पर नगरा रै मणु मन्ज फूट पैई गच्छुरी थी, ऐत थऊँ कई यहूदी री कनारी अतै कई प्रेरिता री कनारी भूच्ची गै।

⁵पर जैहणै गैर यहूदी अतै यहूदी तंयारा अपमान अतै तियां पुर पथराव करनै तांयें अपणै सरदारा समेत तियां पुर दौड़ै,

⁶ता सो ऐसा गल्ला जो जाणी गै, अतै लुकाउनिया जिलै रै लुस्त्रा अतै दिरबे शहरा मन्ज, अतै अखै-बख्रै रै शहरा जो नह्ही गै।

⁷अतै तैड़ी सुसमाचार हुणाणा लगै।

⁸लुस्त्रा शहर मन्ज अक्क मणु बैहुरा थू, जैडा पैरा रा कमजोर थू। सो जन्मा थऊँ ही लंगड़ा थू अतै कदी भी ना चलूरा थू।

⁹सो पौलुस जो कणैन्दा हुणु करदा थू। पौलुसै तसेरी कनारी टकटकी लगाई करी हेरू कि तैसिओ ठीक भूच्ची गाणै रा विस्वास हा,

¹⁰अतै जोरा सितै बल्लू, “अपणै पैरा रै भारै खड़ी गा।” ता सो उटकी करी चलना फिरना लगी पैऊ।

¹¹मणुऐ पौलुस रा ऐह कम हेरी करी लुकाउनिया री भाषा मन्ज उच्चै शब्दा मन्ज बल्लू, “देवता मणु रै रूपा मन्ज असु बलै उतरी आये हिन।”

¹²तिन्यै बरनबास जो ज्यूस, अतै पौलुस जो हिरमेस देवता बल्लू क्ओकि सो गल्ला करनै बाळै मन्ज मुख्य थू।

¹³ज्यूस देवता रै मन्दरा रा पुजारी जैडा तैस नगरा रै सामणै थू, बैल अतै फूला रै हार फाटका पुर लगाई करी मणु सोगी बलिदान करना चाहन्दा थू।

¹⁴पर बरनबास अतै पौलुस प्रेरितै जैहणै ऐह हुणु ता बड़ै दुखी भुच्‍ची करी अपणै कपड़ै फाड़ै अतै भिड़ा मन्ज गिच्ची करी जोरा सितै बलणा लगै,

¹⁵“हे मणुओ, तुहै कै करदै हिन? अहै भी ता तूसु सांईयै दुख-सुख भोगणै बाळै मणु हिन। अहै तुसिओ सुसमाचार हुणादै हिन कि तुहै इन्या बेकार चिजा थऊँ अलग भूच्ची करी जिन्दै प्रमात्मैं री कनारी फिरन, जिनी स्वर्गा अतै धरती अतै समुंद्र अतै जैडा कुछ तैत मन्ज हा बणाऊरा।

¹⁶तिनी बीतै टैमां मन्ज सब जाति जो अपणै अपणै रस्तै चलना दितुरा।

¹⁷तांभी तिनी अपणै आपा जो असु तांयै गवाह छडुरा कि सो हा; अतै सो भलाई करदा रैऊ, अम्बरा थऊँ बरखा, फलबन्त मौसम दिकरी तून्दै मना जो खाणै अतै खुशी सितै भरदा रैऊ।”

¹⁸ऐह बली करी भी तिन्यै मणु जो बड़ी मुसकल थऊँ रोकू कि सो तियां तांयें बलिदान ना करन।

¹⁹पर कुछ यहूदिये अन्ताकिया अतै इकुनियुम शहरा मन्ज ईच्ची करी मणु जो अपणी कनारी करी लैऊ, अतै पौलुस पुर पथराव करू, अतै मरूरा समझी करी तैसिओ नगरा रै बाहर घसीटी करी लेई गै।

²⁰पर जैहणै चेलै तसेरै चंऊ कनारै ईच्ची खड़ियै, ता सो उूठी करी नगरा मन्ज गो अतै दूये दिन बरनबास सोगी दिरबे शहर जो चली गो।

²¹पौलुस अतै बरनबास तैस नगरा रै मणु जो सुसमाचार हुणाई करी, अतै मतै सारै चेलै बणाई करी, लुस्त्रा अतै इकुनियुम अतै अन्ताकिया शहरा जो फिरी आये,

²²अतै चेलै रै मना जो स्थिर करदै रैह अतै ऐह उपदेश दिन्दै थियै कि विस्‍वासा मन्ज बणी रेय्आ; अतै ऐह बलदै थियै कि, “असिओ बड़ै क्‍लेश भोगी करी प्रमात्मैं रै राज्य मन्ज प्रवेश करना पैणा।”

²³अतै तिन्यै हरेक कलीसिया मन्ज तियां तांयें स्याणै ठहराये, अतै ब्रता सोगी प्रार्थना करीके प्रभु रै हत्था मन्ज सौंपी दिता जैस पुर तिन्यै विस्वास करूरा थू।

²⁴ता पिसिदिया जिलै मितै भुन्दै सो पंफूलिया जिलै पुजै;

²⁵फिरी पिरगा शहर मन्ज बचन हुणाई करी अत्तलिया शहर मन्ज आये,

²⁶अतै तैड़ी थऊँ सो जहाजा पुर अन्ताकिया शहरा फिरी आये, जैड़ी सो तैस कम तांयें जैडा तिन्यै पुरा करू थू प्रमात्मैं री कृपा मन्ज सोंपुरै थियै।

²⁷अन्ताकिया पुजीकरी तिन्यै कलीसिया इकट्ठी करी अतै बल्लू कि प्रमात्मैं तियां सोगी भूच्ची करी किनै बड़ै बड़ै कम करै, अतै गैर यहूदी तांयें विस्‍वासा रै द्धार खोली दितै।

²⁸अतै सो चेलै सोगी बड़ै दिन तक रैह।