Read Gaddi चेलै रै कम 16 Bible Online

चेलै रै कम 16 - Gaddi bible

चेलै रै कम 16

¹फिरी सो दिरबे अतै लुस्त्रा शहर मन्ज भी गो। तैड़ी तीमुथियुस नां रा अक्क चेला थू, जैडा कसी विस्वासी यहूदी जनानी रा पुत्र थू, पर तसेरा पिता यूनानी थू।

²सो लुस्त्रा अतै इकुनियुम शहरा मन्ज रैहणै बाळै भाई मन्ज सुनाम थू।

³पौलुस री इच्छा थी कि सो तैस सोगी चला; अतै जैड़ै यहूदी मणु तियां जगह मन्ज थियै तियां मणु री वजह थऊँ पौलुसै तसेरा खतना करू, क्ओकि सो सब जाणदै थियै, कि तसेरा पिता यूनानी थू।

⁴पौलुस अतै तसेरै साथी नगर नगर गान्दै तियां व्यवस्था जो जैड़ी यरूशलेम रै प्रेरितै अतै स्याणै ठहराऊरी थी, मनणै तांयें विस्वासी जो पुजादैं गान्दै थियै।

⁵ऐस तरह कलीसिया विस्वास मन्ज स्थिर भुन्दी गई अतै गिणती मन्ज भी बददी गई।

⁶सो फ्रूगिया अतै गलातिया परदेस मितै भूच्ची करी गै, क्ओकि पवित्र आत्मा तियां जो आसिया परदेस मन्ज बचन हुनाणै जो ना करूरी थी।

⁷तिन्यै मूसिया परदेस रै नेड़ै पुजीकरी, बितूनिया परदेस मन्ज गाणै री सोची; पर पवित्र आत्मा तियां जो गाणा ना दिता।

⁸ता सो मूसिया मितै भूच्ची करी त्रोआस[7] शहर मन्ज आये।

⁹तैड़ी पौलुसै राती दर्शन हेरू कि अक्क मकिदुनी मणु खड़ी करी तैस सोगी बिनती करीके बल्लू करदा कि, “समुंद्र रै पारीयें कनारै मकिदुनी परदेस मन्ज अईआ, अतै इन्दी मदद करा।”

¹⁰तसेरै ऐह दर्शन हेरदै ही अहै झट मकिदुनिया परदेस गाणै री सोची, ऐह समझी करी कि प्रमात्मैं असिओ तियां जो सुसमाचार हुनाणै तांयें हैदुरा हा।

¹¹ठेरैतांये अहै त्रोआस शहर थऊँ समुन्द्री जहाजा मन्ज बैही करी सिधै सुमात्रा टापू अतै दूये दिन नियापुलिस शहर मन्ज आये।

¹²तैड़ी थऊँ अहै फिलिप्पी शहर पुजै, जैडा मकिदुनिया परदेस रा मुख्य नगर अतै रोमी री बस्ती हा; अतै अहै तैस नगरा मन्ज कुछ दिन तक रैह।

¹³विश्रामदिन अहै नगर रै फाटक रै बाहर नदी रै कनारै ऐह समझी करी गै कि तैड़ी यहूदी प्रार्थना करनै री जगह भुणीआ, अतै बैही करी जैड़ी जनानी इकट्ठी थी तिन्या सोगी गल्ला करना लगै।

¹⁴लुदिया नां री अक्क थुआतीरा नगरा री बैंगणी कपड़ै बेचनैबाळी अक्क भक्त जनानी हुणु करदी थी। प्रमात्मैं तैसारा मन खोलू कि पौलुस री गल्ला पुर ध्यान लगा।

¹⁵जैहणै तैहै अपणै टबरा समेत बपतिस्मा लैऊ, ता तैहै असु सोगी बिनती करी कि, “अगर तुहै मिन्जो प्रभु री विस्वासी समझदै हिन, ता चली करी मेरै घरै रेय्आ,” अतै सो असिओ मनाई करी लेई गई।

¹⁶जैहणै अहै प्रार्थना करनै री जगह जो चलुरै थियै, ता असिओ अक्क दासी मुळी जेहा मन्ज अनुमान लगाई करी भविष्‍यवाणी करनै री दुष्‍टात्मा थी; अतै सो ऐस तरीकै अपणै स्वामी तांयें बड़ा कुछ कमाई लैन्दी थी।

¹⁷सो पौलुस अतै इन्दै पिचो ईच्ची करी बकणा लगी, “ऐह मणु परमप्रधान प्रमात्मैं रै दास हिन, जैड़ै असिओ उद्धार रै मार्ग री उदाहरण हुणादै हिन।”

¹⁸सो बड़ै दिन तक इन्या हि करदी रैई; पर पौलुस दुखी भुआ, अतै मुड़ीकरी तैहा दुष्‍टात्मा सितै बल्लू, “अऊँ तिजो यीशु मसीह री पवित्र आत्मा सितै हूक्म दिन्दा कि ऐसा थऊँ निकळी गा।” अतै सो तैहणै ही निकळी गई।

¹⁹जैहणै तैसारै स्वामिये हेरू कि इन्दी कमाई रा साधन अतै उम्मीद गान्दी रैईआ, ता पौलुस अतै सीलास जो पकड़ी करी चौक मन्ज प्रधाना वलै खिन्जी करी लेई गै;

²⁰अतै तियां जो फौजदारी रै हाकमा वलै लेई गै अतै बल्लू, “ऐह मणु जैड़ै यहूदी हिन इन्दै नगरा मन्ज बड़ी हलचल मचाणा लगुरै हिन;

²¹अतै ऐसी रीति दसणा लगुरै हिन जिंआं जो ग्रहण करना या मनणा रोमी मणु तांयें ठीक निय्आ।”

²²ता भिड़ा रै मणु तंयारै वरोधा मन्ज इकट्ठै भूच्ची करी चड़ी आये, अतै हाक्मे तंयारै कपड़ै फाड़ी दितै, अतै तियां जो बेंत मारनै रा हूक्म दिता।

²³मतै बेंत लगावाईकरी तियां जो जेला मन्ज पाई दिता अतै दरोगा जो बल्लू कि इन्यारी चौकसी रखै।

²⁴दरोगै ऐसा हूक्म हुणी करी तियां जो जेला री कोठरी मन्ज रखू अतै तंयारै पैरा जो काठ मन्ज ठोकी दिता।

²⁵अध्धी राती पौलुस अतै सीलास प्रार्थना करदै अतै प्रमात्मैं रै भजन गाऊ करदै थियै, अतै कैदी तंयारी हुणु करदै थियै।

²⁶ऐतनै मन्ज अक्क बड़ा बड़आ हिल्‍लण आ, ऐड़ी तक की जेला री नियूँआ तक हिली गई, अतै तैहणै ही सब दार खुली गै; अतै सबी रै बन्धन भी खुली गै।

²⁷दरोगा जागु अतै जेला रै दार खुलै हेरी करी समझू कि सब कैदी नह्ही गच्छुरै हिन, ता तिनी अपणी तलवार कड़ी करी अपणै आपा जो मारी दिणा चाऊ।

²⁸पर पौलुसै जोरा सितै हक्क पाई करी बल्लू, “अपणै आपा जो कोई नूकसान मत कर, क्ओकि अहै सब ऐठीये ही हिन।”

²⁹ता सो अक्क दिय्आ मँगाईकरी अंदरा जो गो, अतै कम्मदा कम्मदा पौलुस अतै सीलास रै पैरै पैऊ;

³⁰अतै तियां जो बाहर अणीकरी बल्लू, “हे सज्जनो, उद्धार पाणै तांयें अऊँ कै करू?”

³¹तिन्यै बल्लू, “प्रभु यीशु पुर विस्वास कर, ता तुद अतै तेरै घरानै उद्धार पाणा।”

³²अतै तिन्यै तैसिओ अतै तसेरै पूरै घरानै जो प्रभु रा बचन हुणाऊ।

³³राती तैहा ही घड़ी तिनी तियां जो नि करी तंयारै पैर धुआये, अतै तिनी अपणै सब मणु समेत झट बपतिस्मा लैऊ।

³⁴ता तिनी अपणै घरा जो नि करी तियां अगो खाणै जो रखू, अतै पूरै घरानै समेत प्रमात्मैं पुर विस्वास करीके खुशी मनाई।

³⁵जैहणै भ्याग भूई ता हाक्मे सपाई रै हत्थै बली भैजु कि तियां मणु जो छड़ी देय्आ।

³⁶दरोगै ऐह गल्ला पौलुस सोगी बली, “हाक्मे तुसिओ छड़ी दिणै रा हूक्म भैजी दिता। ठेरैतांये अबै शान्ती सोगी चली गच्छा।”

³⁷पर पौलुसै तियां सोगी बल्लू, “ईंयैं मणुऐ असु रोम रै मणुओ दोषी ठहराए बिना ही मणु रै सामणै जेला मन्ज पाऊ थू। अबै अहै चुपचाप निकळी गान? ऐसा ना भूणा; पर सो अप्पू ईच्ची करी असिओ बाहर कड़न।”

³⁸सपाईये ऐह गल्ला हाकमा सितै बली, अतै सो ऐह हुणी करी कि सो रोमी हिन, ड़री गै,

³⁹अतै ईच्ची करी तियां थऊँ माफी मँगी, अतै बाहर नि करी बिनती करी कि नगरा थऊँ चली गान।

⁴⁰सो जेला थऊँ नकैई करी लुदिया रै घरै आये, अतै विस्वासी भाई सोगी मुळी करी तियां जो शान्ती दिती, अतै चली गै।