Read Gaddi चेलै रै कम 18 Bible Online

चेलै रै कम 18 - Gaddi bible

चेलै रै कम 18

¹ऐत थऊँ बाद पौलुस एथेंस शहर जो छड़ी करी कुरिन्थुस शहर मन्ज आ।

²तैड़ी तैसिओ अक्‍विला नां रा अक्क यहूदी मूळु, जैसेरा जन्म पुन्तुस परदेस मन्ज भच्छुरा थू। सो अपणी घरावाळी प्रिस्किल्ला सोगी इटली थऊँ हाल ही मन्ज छूरा थू, क्ओकि सम्राट क्लौदियुसे सब यहूदी जो रोम थऊँ निकळी गाणै रा हूक्म दितुरा थू। ऐस हूक्मा री वजह थऊँ पौलुस कुरिन्थुस मन्ज आ।

³पौलुस अतै अक्‍विला रा अक्क ही कम थू, ठेरैतांये सो तियां सोगी रैऊ अतै सो कम करना लगै; तंयारा कम तम्बू बनाणै रा थू।

⁴पौलुस हरेक विश्रामदिन यहूदी रै सभागार मन्ज वाद-विवाद करीके यहूदी अतै यूनानी जो यीशु रै बारै मन्ज समझांदा थू।

⁵जैहणै सीलास अतै तीमुथियुस मकिदुनिया परदेस थऊँ आये, ता पौलुस बचन हुनाणै री धूना मन्ज यहूदी जो गवाही दिणा लगा कि यीशु ही मसीहा हा।

⁶पर जैहणै यहूदी मणु विरोध अतै बुराई करना लगै, ता तिनी अपणै कपड़ै झाड़ी करी तियां सितै बल्लू, “तुहै ही ऐस फैसलै तांई जिम्मेदार हिन! अऊँ निर्दोष हा। अबै थऊँ मुँ गैर यहूदी मन्ज सुसमाचार हुणाणा गाणा।”

⁷तैड़ी थऊँ चली करी सो गैर यहूदी तीतुस यूस्तुस नां रै अक्की प्रमात्मैं रै भक्त रै घरा जो आ; जसेरा घर यहूदी रै सभागार सोगी ही थू।

⁸ता यहूदी रै सभागार रै सरदारै क्रिसपुसे अपणै पूरै घरानै समेत प्रभु पुर विस्वास करू; अतै मतै सारै कुरिन्थवासी हुणी करी विस्वास मन्ज आये अतै बपतिस्मा लैऊ।

⁹प्रभुऐ अक्की राती दर्शन रै द्धारा पौलुस सोगी बल्लू, “मत ड़र, बल्कि कणैन्दा गा अतै चुप मत रैह;

¹⁰क्ओकि अऊँ तेरै सोगी हा, अतै कोई भी तिजो मारना चाहला ता तेरा नूकसान ना करी सकणा; क्ओकि ऐस नगरा मन्ज मेरै मतै सारै मणु हिन।”

¹¹ठेरैतांये सो तैड़ी प्रमात्मैं रा बचन सखांदा डेढ़ साल तक रैऊ।

¹²जैहणै गल्लियो अखाया परदेस रा हाक्म थू, ता यहूदी मणु एक भूच्ची करी पौलुस जो पकडणा आये, अतै तैसिओ न्याय आसन रै सामणै अणीकरी बलणा लगै,

¹³“ऐह मणु जो समझांदा कि प्रमात्मैं री पूजा ऐस नियम सितै करा, जैड़ी व्यवस्था रै उलट हा।”

¹⁴जैहणै पौलुस बलणा लगा, ता गल्लियो यहूदी सोगी बलणा लगा, “हे यहूदियो, अगर ऐह कोई अन्याय या दुष्‍टता री गल्ल भुन्दी ता ठीक भुन्दा कि अऊँ तुन्दी हुणदा।

¹⁵पर अगर ऐह वाद-विवाद शब्दा, अतै नां अतै तून्दै ऐड़ी री व्यवस्था रै बारै मन्ज हा, ता तुहै जाणा; क्ओकि अऊँ इन्या गल्ला रा न्यायी ना बणना चाहन्दा।”

¹⁶अतै हाक्म गल्लियो तियां जो न्याय आसन रै सामणै थऊँ कड्ड़ी दिता।

¹⁷ता यहूदी रै सभागार रै सरदारा थऊँ कईये सोस्थनेस जो पकड़ी करी न्याय आसन रै सामणै मारू। पर गल्लियो ऐहा गल्ला री कुछ भी फिकर ना करी।

¹⁸पौलुस बड़ै दिन तक कुरिन्थुस मन्ज रैऊ। फिरी विस्वासी भाई थऊँ विदा लेई करी किंख्रेआ शहर मन्ज ठेरैतांये मुण्ड़ मुण्डवाऊ, क्ओकि तिनी मन्नत मगुँरी थी, अतै जहाजा मन्ज सीरिया जो चली पैऊ अतै तैस सोगी जनानी प्रिस्किल्ला अतै तसारा घरावाळा अक्‍विला भी थू।

¹⁹तिनी इफिसुस शहर पुजीकरी तियां जो तैड़ी छडु अतै अप्पू यहूदी रै सभागार मन्ज गिचीकरी यहूदी सोगी विवाद करना लगा।

²⁰जैहणै मणुऐ तैस सोगी बिनती करी, “असु बलै कुछ दिन होर रैह।” ता तिनी स्वीकार ना करू;

²¹पर ऐह बलीकरी तियां थऊँ विदा लेई कि, “अगर प्रमात्मैं चाऊ ता दोबारा अऊँ तूसु वलै आ।” ता सो इफिसुस थऊँ जहाजा मन्ज चली पैऊ;

²²अतै कैसरिया शहर मन्ज जहाजा थऊँ ओसी करी यरूशलेम जो गो अतै कलीसिया जो नमस्कार करीके अन्ताकिया शहर मन्ज आ।

²³फिरी कुछ दिन अन्ताकिया शहर मन्ज रैई करी सो तैड़ी थऊँ नकैऊ, अतै अक्की तरफा थऊँ गलातिया अतै फ्रूगिया परदेसा मन्ज सब चेलै जो स्थिर करदा फिरू।

²⁴अपुल्लोस नां रा अक्क यहूदी, जैसेरा जन्म सिकन्दरिया शहर मन्ज भच्छुरा थू, जैडा विद्धान मणु थू अतै पवित्रग्रन्था जो खरै तरीकै जाणदा थू, इफिसुस मन्ज आ।

²⁵तिनी प्रभु रै पंथ री शिक्षा पाऊरी थी, अतै मन लगाई करी यीशु रै बारै मन्ज ठीक ठीक हुणान्दा अतै सखांदा थू, पर सिर्फ यूहन्‍ना रै बपतिस्मा री गल्ल ही जाणदा थू।

²⁶सो यहूदी रै सभागार मन्ज निड़र भूच्ची करी बलणा लगा, पर प्रिस्किल्ला अतै अक्‍विला तसेरी गल्ला हुणी करी तैसिओ अपणै घरै लेई आये अतै प्रमात्मैं री गल्ला तैसिओ होर भी ठीक ठीक दस्सी।

²⁷जैहणै तिनी पक्का करू कि नदी पारा जो अखाया परदेस जो गच्छा ता विस्वासी भाई तैसिओ उत्साह दिकरी चेलै जो चिट्ठी लिखी कि सो तैस सोगी खरै तरीकै मुळन; अतै तिनी तैड़ी पुजीकरी तियां मणु री मदद करी जिन्यैं अनुग्रह री वजह थऊँ ही विस्वास करूरा थू।

²⁸क्ओकि सो पवित्रग्रन्था थऊँ सवूत दि दिकरी कि यीशु ही मसीहा हा, बड़ै जोशा सोगी यहूदी जो सबी रै सामणै निरूतर करदा रैऊ।