Read Gaddi चेलै रै कम 2 Bible Online

चेलै रै कम 2 - Gaddi bible

चेलै रै कम 2

¹जैहणै यहूदी रा पिन्तेकुस्त रा त्यौहार आ, ता सो सब अक्की जगह इकट्ठै थियै।

²अकदम अम्बरा थऊँ बड़ी आँधी री आवाज आई, अतै पुरा घर जैड़ी सो बैहुरै थियै, हिली गो।

³अतै तियां जो जीभा साईयें अग निकळदी हुजी अतै तियां मन्ज सबी पुर ईच्ची रूकी।

⁴सो सब पवित्र आत्मा मन्ज भरी गै, अतै जिंआं आत्मै तियां जो बलनै री सामर्थ दिती, सो अलग अलग बोली बलणा लगी पै।

⁵कई देशा रै यहूदी भक्त यरूशलेम मन्ज ऐस त्यौहार जो मनाणै तांयें छुरै थियै।

⁶जैहणै तियैं ऐह जोरा रा हल्ला हुणु ता भीड़ किटठी गई अतै मणु ड़री गै, क्ओकि हर अक्क जो ऐह हुणु करदा थू कि ऐह सब इन्दी बोली बल्लू करदै हिन।

⁷ऐह सब हैरान अतै परेशान भूच्ची करी बलणा लगै, “हेरा, ऐह जैडा बल्लू करदै हिन ऐह ता सब गलीली मणु हिन

⁸ता फिरी ऐह कजो असिओ अपणी अपणी जन्म भूमि री बोली हुणाऊ करदै?

⁹अहै जैड़ै पारथी, मेदी, एलामी, मेसोपोटामिया, यहूदिया, कप्पदुकिया, पुन्तुस, आसिया परदेस,

¹⁰फ्रूगिया, पंफूलिया, मिस्त्र अतै लीबिया देश जैड़ै कुरैने परदेस रै नेड़ै तेड़ै हिन, इन्या सबी देशा रै रैहणै बाळै अतै रोमी, प्रवासी,

¹¹मतलब यहूदी मत धारणैवाळै, क्रेती अतै अरबी मणु भी हिन, पर अपणी अपणी बोली मन्ज इन्या थऊँ प्रमात्मैं रै कम्मा री चर्चा हुणु करदै हिन।”

¹²अतै सो सब हैरान भुएै अतै ड़री करी अक्की दूये सोगी बलणा लगै, “ऐह कै लगुरा भूणा?”

¹³पर होर मजाक उड़ाणा लगै, “ऐह ता शराबा रै नशे मन्ज चूर हिन।”

¹⁴ता पतरस तियां ग्यारह चेलै सोगी खड़ी गो अतै जोरा सितै बलणा लगा, “हे यहूदी अतै हे यरूशलेम मन्ज रैहणै बाळैओ, ऐह जाणी लेय्आ, अतै कन लाई मेरी गल्ला हुणा।

¹⁵जिंआं तुहै समझू करदै हिन कि ऐह मणु नशे मन्ज हिन, पर ना हिन, क्ओकि हालि ता भ्यागा रै नौ ही वजुरै हिन।”

¹⁶पर ऐह सो गल्ल हा कि, जैडा योएल भविष्‍यवक्तै बलुरी थी,

¹⁷“प्रमात्मां ईयां बलदा, कि आखरी रै दिन मन्ज ईयां भूणा कि मुँ अपणा आत्मा सबी मणु जो दिणा, अतै तून्दै दब्बू कुल्ळी सबी भविष्‍यवाणी करनी, अतै तून्दै जवान मणु दर्शन हेरनै, अतै तून्दै स्याणै सुपनै हेरनै।

¹⁸बल्कि मुँ अपणै नौकरा-नौकरैणी जो भी अपणी आत्मा दिणिआ अतै तियां भी भविष्‍यवाणी करनी हा।

¹⁹अतै मुँ ऊपर अम्बरा पुर नौखे कम अतै धरती पुर चमत्कार मतलब खून, अगी, अतै धूंऐ रै बदळ दसणै हिन।

²⁰प्रभु रै महान अतै तेजस्वी दिन ईणै थऊँ पैहलै सूरज नैहरा अतै चद्रमां खूना साईयें भूच्ची गाणा।

²¹अतै जैस कसी प्रभु रा नां लैणा, तैस उद्धार पाणा।”

²²“हे इस्त्राएलिओ, ऐह गल्ला हुणा यीशु नासरी अक्क मणु थू। जैसेरा प्रमात्मैं री तरफा थऊँ भूणै रा सवूत तियां सामर्थ रै कम्मा अतै हैरान करनै बाळै कम्मा मन्ज हुजदा, जैड़ै प्रमात्मैं तून्दै मन्जै तसेरै जरियै करै जैतिओ तुहै अप्पू ही जाणदै हिन।

²³तैस यीशु जो, जैडा प्रमात्मैं री ठहराऊरी योजना अतै पैहलै रै ज्ञाना रै अनुसार पकड़ाऊ, तुहै अधर्मी रै हत्थै क्रूस पुर चढ़ाईकरी मारी दिता।

²⁴पर तैसिओ ही प्रमात्मैं मौती रै बन्‍धना थऊँ छुड़ाईकरी जीयाऊ; क्ओकि ऐह अनहोना थू कि सो मौती रै वशा मन्ज रैहन्दा।”

²⁵क्ओकि दाऊद मसीहा रै बारै मन्ज बलदा; “अऊँ प्रभु जो सदा अपणै सामणै हेरदा रैऊ क्ओकि सो मेरै सज्जै कनारै हा, ताकि अऊँ कदी डगमगाई ना गच्छू।

²⁶ऐसा वजह थऊँ ही मेरा मन खुश हा, अतै मेरी जीभ मगन हा; बल्कि मेरा पुरा शरीर उम्मीद मन्ज बणी रैहणा।

²⁷क्ओकि तुद मेरै प्राण अधोलोक मन्ज ना छड़णै, अतै ना अपणै पवित्र पुत्र जो सड़णा दिणा।

²⁸तैंई मिन्जो जिन्दगी रा रस्ता दसुआ, तुद मिन्जो अपणै दर्शन रै द्धारा आनन्द सोगी भरी दिणा।”

²⁹“हे भाईओ, अऊँ कुलपति दाऊद रै बारै मन्ज तूसु सोगी हिम्मत सोगी बली सकदा कि सो मरी गो अतै दबाई भी दिता अतै तसेरी कब्र अज भी हा।

³⁰सो भविष्‍यवक्ता थू, सो जाणदा थू कि प्रमात्मैं मिन्जो सोगी सौगन्द खाऊरी हा कि मुँ तेरै खानदाना थऊँ अक्की मणु जो तेरै सिंहासना पुर बहालना।

³¹तिनी भूणैबाळी गल्ला जो पैहलै ही हेरी करी मसीह रै दोबारा जीणै रै बारै मन्ज भविष्‍यवाणी करूरी थी, ना ता तसेरा प्राण अधोलोक मन्ज रैहणा ना तसेरा शरीर हड़णा।

³²ऐस ही यीशु जो प्रमात्मैं जिआऊरा, जठेरै अहै सब गवाह हिन।

³³ऐस तरीकै प्रमात्मैं रै सज्जै हत्था थऊँ सबी थऊँ उच्चा पद पाई करी, अतै पितै थऊँ सो पवित्र आत्मा पाई करी जठेरी प्रतिज्ञा करूरी थी, तिनी ऐह ड़ोळी दिता हा जैडा तुहै हेरदै अतै हुणदै हिन।

³⁴क्ओकि दाऊद ता स्वर्गा जो ना चढु; पर सो अप्पू बलदा,” “प्रभुऐ मेरै प्रभु सोगी बलुरा, मेरै सज्जै कनारै बैह,

³⁵जैहणै तक कि अऊँ तेरै बैरी जो तेरै पैरा थला री चौकी ना करी दिच्छु।”

³⁶“ता सब इस्त्राएली मणु पक्कै तरीकै ऐह जाणी लेय्आ कि प्रमात्मैं तैस ही यीशु जो जैसिओ तुहै क्रूस पुर चढाऊरा, प्रभु भी ठहराऊरा अतै मसीह भी।”

³⁷ता हुणनैबाळै रै ह्रदय छिदी गै, अतै सो पतरस अतै बाकी प्रेरिता थऊँ पुछणा लगै, “हे भाईओ, अहै कै करन?”

³⁸पतरसै तियां सोगी बल्लू, “मन फेरा, अतै तूसु मन्ज हरेक अपणै अपणै पापा री माफी तांयें यीशु मसीह रै नां रा बपतिस्मा लेय्आ; ता तूसु पवित्र आत्मा रा दान पाणा।

³⁹क्ओकि प्रतिज्ञा तुहै, अतै तुन्दी औलादी, अतै तियां सब दूर-दूर रै मणु तांयें भी हा जिंआं जो प्रभु इन्दै प्रमात्मैं अप्पू बलै हैदणा।”

⁴⁰पतरस होर भी मती गल्ला थऊँ गवाई दिकरी समझाऊ कि अपणै आपा जो ऐसा टेढ़ी जाति थऊँ बचा।

⁴¹ता जिन्यैं तसेरा बचन ग्रहण करू तिन्यै बपतिस्मा लैऊ; अतै तैस ही दिन त्राई हजार मणु रै लगभग तियां विस्वासी रै गुट मन्ज सामल भूच्ची गै।

⁴²अतै सो प्रेरिता थऊँ शिक्षा पाणा, संगति रखणा, रोटी तोड़णा, अतै प्रार्थना करनै मन्ज लगी रैह।

⁴³यरूशलेम मन्ज रैहणै बाळै सबी मणु पुर ड़र छाई गो, अतै मतै सारै चमत्कार प्रेरिता थऊँ प्रकट भुन्दै थियै।

⁴⁴सब विस्वास करनै बाळै इकट्ठै रैहन्दै थियै, अतै अपणी सब चिजा जो मिलिजुली बन्ड़दै थियै।

⁴⁵सो अपणी अपणी जायदात अतै समाना बेची-बेचीकरी जैसिओ जिंआं जरूरत भुन्दी थी बण्ड़ी दिन्दै थियै।

⁴⁶सो रोज अक्क मन भूच्ची करी मन्दरा मन्ज इकट्ठै भुन्दै, अतै घर-घर रोटी त्रोड़दै अतै खुशी सोगी अतै मना री सीधाई सोगी खाणा खान्दै थियै,

⁴⁷प्रमात्मैं री स्तुति करदै थियै, अतै सब मणु तियां थऊँ खुश थियै अतै जैडा उद्धार पान्दै थियै, तियां जो प्रभु रोज तियां मन्ज शामळ करी दिन्दा थू।