Read Gaddi चेलै रै कम 21 Bible Online

चेलै रै कम 21 - Gaddi bible

चेलै रै कम 21

¹जैहणै अहै तियां थऊँ विदा भूच्ची करी जहाजा पुर चली पै ता सिधै रस्तै मन्ज कोस नां रै टापू मन्ज आये, अतै दूये दिन रूदुस टापू मन्ज अतै तैड़ी थऊँ बाद पतरा टापू मन्ज।

²तैड़ी अक्क जहाज फीनीके शहर जो गान्दा मुळु, अतै अहै तैस जहाजा पुर चड़ी गै

³जैहणै साइप्रस टापू हुजु, ता अहै जहाजा जो खब्बै कनारी मोडु, अतै सीरिया परदेस जो चली करी सूर शहर मन्ज उतरै क्ओकि तैड़ी जहाजा रा माल उतारना थू।

⁴चेलै सोगी मुळी करी अहै तैड़ी सत दिन रैह। तिन्यै जो पवित्र आत्मा रै सिखाऐ पौलुसै बलुरा थू कि यरूशलेम जो मत गान्दै।

⁵हप्तै रै बाद जैहणै अहै चली पै, ता सबी जनानी अतै बच्चै समेत असिओ नगरा रै बाहरा तक पुजाऊ; अतै अहै कनारै पुर घुटनै टेकीकरी प्रार्थना करी,

⁶ता अक्क दूये थऊँ विदा लेई करी, अहै ता जहाजा पुर चढ़ै अतै सो अपणै अपणै घरा जो फिरी गै।

⁷ता अहै सूर शहर थऊँ जलयात्रा पूरी करीके पतुलिमयिस शहर पुजै, अतै विस्वासी भाई जो नमस्कार करीके तियां सोगी अक्क दिन रैह।

⁸दूये दिन चली करी अहै कैसरिया शहर मन्ज आये, अतै फिलिप्पुस सुसमाचार प्रचारक रै घरै मन्ज रैह, जैडा तियां सता चेलै मन्ज अक्क थू जियां जो यरूशलेम मन्ज सेवा के तांयै चुणुरा थू।

⁹फिलिप्पुस री चंऊर कुँवारी कुल्ळी थी, जैड़ी भविष्‍यवाणी करदी थी।

¹⁰जैहणै अहै बड़ै दिन तैड़ी रैई चुकै, ता अगबुस नां रा भविष्‍यवक्ता यहूदिया थऊँ आ।

¹¹तिनी असु बलै ईच्ची करी पौलुस रा कमरबन्ध लैऊ, अतै अपणै हत्था पैरा जो बनी करी बल्लू, “पवित्र आत्मा ऐह बलदा जैस मणु रा ऐह कमरबन्ध हा, तैसिओ यरूशलेम मन्ज यहूदी ऐस तरीकै ही बनणा, अतै गैर यहूदी रै हत्था मन्ज सौंपणा।”

¹²जैहणै अहै ऐह गल्ला हुणी, ता अहै अतै तैड़ी मणुऐ पौलुस सोगी ऐह बिनती करी कि यरूशलेम जो मत गान्दा।

¹³पर पौलुसै जवाव दिता, “तुहै कै करदै हिन कि रोई-रोई करी मेरा दिल त्रोडु करदै हिन? अऊँ ता प्रभु यीशु रै नां तांयें ना सिर्फ कैदी बणनै तांयें ही ना बल्कि मरनै तांयें भी तैयार हा।”

¹⁴जैहणै तिनी ना मनु ता अहै ऐह बली करी चुप भूच्ची गै, “प्रभु री इच्छा पूरी भोआ।”

¹⁵कुछ दिन थऊँ बाद अहै तैयारी करी अतै यरूशलेम जो चली पै।

¹⁶कैसरिया शहर थऊँ भी कुछ चेलै असु सोगी भूच्ची गै, अतै असिओ मनासोन नां साइप्रसवासी अक्क पूराणै चेलै बलै लेई आये, कि अहै तैड़ी रैहन।

¹⁷जैहणै अहै यरूशलेम मन्ज पुजै, ता विस्वासी भाई बडी खुशी सोगी असु सोगी मुळै।

¹⁸दूये दिन पौलुस असिओ याकूब वलै लेई करी गो, जैड़ी सब स्याणै इकट्ठै थियै।

¹⁹ता तिनी तियां जो नमस्कार करीके, जैड़ै जैड़ै कम प्रमात्मैं तसेरी सेवा रै द्धारा गैर यहूदी मन्ज करूरै थियै, अक्क अक्क करीके सब दसै।

²⁰तिन्यै ऐह हुणी करी प्रमात्मैं री महिमा करी, फिरी तिनी बल्लू, “हे भाई, तू हेरदा कि यहूदी थऊँ कई हजार मणुऐ विस्वास करूआ; अतै सब व्यवस्था री धूना मन्ज हिन।

²¹यहूदी विस्वासी जो तेरै बारै मन्ज सखाऊरा हा कि तू गैर यहूदी मन्ज रैहणै बाळै यहूदी मणु जो मूसा री व्यवस्था थऊँ फिरी गाणै जो सखांदा, अतै बलदा, कि ना अपणै बच्चै रा खतना करा अतै ना यहूदी रीति रवाजा पुर चला।

²²ता फिरी कै करया गच्छा? मणु जरूर हुणना कि तू छूरा।

²³ठेरैतांये जैडा अहै तूसु सोगी बलदै हिन, सो कर। असु बलै चंऊर ऐसै मणु हिन जिन्यैं मन्नत मनुरी हा

²⁴तियां जो लेई करी अप्पू सोगी शुद्ध करनै री रीति जो पुरा कर; अतै तियां जो खर्चा भी दे कि सो मुण्ड़ा जो मुण्ड़वान। ता सबी जाणी लैणा कि जैड़ी गल्ला तेरै बारै मन्ज दसुरी हिन, तियां मन्ज कुछ भी सच निय्आ पर तू अप्पू ही व्यवस्था जो मनी करी तंयारै अनुसार चलदा।

²⁵पर तियां गैर यहूदी रै बारै मन्ज जिन्यैं विस्वास करूरा, अहै ऐह फैसला करीके लिखी भैजुआ कि सो मूर्ति रै सामणै बलि करूरै मांस सितै, अतै खूना सितै, अतै जानवरा रा गल्ला घोटुरै मांसा सितै, अतै व्यभिचार थऊँ बची रैहन।”

²⁶ता पौलुस तियां मणु जो लेई करी, अतै दूये दिन तियां सोगी शुद्ध भूच्ची करी मन्दरा मन्ज गो, अतै तैड़ी दसी दिता कि शुद्ध भूणै तांयें, अर्थात तियां थऊँ हरेक तांयें चढ़ावा चढ़ाया गाणै तक रै दिन कधैड़ी पूरै भूणै हिन।

²⁷जैहणै सो सत दिन पूरै भूणै पुर थियै ता आसिया परदेस रै यहूदी अगुवै पौलुस जो मन्दरा मन्ज हेरी करी मणु जो उकसाऊ, अतै बकी करी तैसिओ पकड़ी लैऊ,

²⁸“हे इस्त्राएलिओ मदद करा; ऐह सो ही मणु हा, जैडा मणु रै अतै व्यवस्था रै अतै ऐसा जगहा रै वरोधा मन्ज मणु जो सखांदा, ऐड़ी तक कि गैर यहूदी जो भी मन्दरा मन्ज अणीकरी ईनी ऐसा पवित्र जगह जो अपवित्र करूरा हा।”

²⁹तिन्यै ऐह बल्लू क्ओकि तिन्यै ऐत थऊँ पैहलै इफिसुसवासी त्रुफिमुस जो पौलुस सोगी नगरा मन्ज हेरूरा थू, अतै समझी बैहै कि पौलुस इन्या जो मन्दरा मन्ज लेई आ।

³⁰ता पूरै नगरा मन्ज कोलाहल मची गो, अतै मणु दौड़ी-दौड़ी करी इकट्ठै भूच्ची गै अतै पौलुस जो पकड़ी करी मन्दरा रै बाहर घसीटी करी लेई आये, अतै झट द्धार बन्द करी दितै।

³¹जैहणै सो तैसिओ मारी दिणा चाहन्दै थियै, ता पलटण रै सरदारा जो संदेसा पुजु कि पूरै यरूशलेम मन्ज कोलाहल मचु करदा।

³²ता सो झट सैनका अतै सुबेदारा जो लेई करी तियां बलै थला जो दौड़ी आ; ता भिड़ै पलटण रै सरदारा जो अतै सैनका जो हेरी करी पौलुस जो मारना जकणा छड़ी दिता।

³³ता पलटण रै सरदारै ईच्ची करी पौलुस जो पकड़ी लैऊ; अतै दूँ जंजीरा सितै बणनै रा हूक्म दिकरी पुछणा लगा, “ऐह कुणआ अतै ईनी कै करूरा?”

³⁴पर भिड़ा थऊँ कोई कुछ अतै कोई कुछ बकदा रैऊ। जैहणै सो हल्लै री वजह थऊँ सच्चाई ना जाणी सकू, ता तैसिओ गढ़ अन्दर निणै रा हूक्म दिता।

³⁵जैहणै सो पैईड़ी पुर पुजु ता ऐसा भुआ कि भिड़ा रै दबाव री वजह थऊँ सैनका जो सो चुकी करी लेई गाणा पैऊ,

³⁶क्ओकि मणु री भीड़ ऐह बकदी-बकदी तैस पिचो पैऊरी थी कि, “ऐसिओ मारी देय्आ।”

³⁷जैहणै सो पौलुस जो गढ़ा अन्दर लेई चलुरै थियै ता तिनी पलटना रै सरदारा सोगी बल्लू, “कै मिन्जो आज्ञा हा कि अऊँ तिजो सोगी कुछ बलुं?” तिनी बल्लू, “कै तू यूनानी भाषा जाणदा?

³⁸कै तू मिस्त्री निय्आ, जैडा ऐत थऊँ पैहलै विद्रोही बणी करी, चंऊर हजार कटारबन्द मणु जो बणा मन्ज लेई गो?”

³⁹पौलुसै बल्लू, “ना! अऊँ ता किलिकिया परदेस रै प्रसिद्ध नगरा तरसुस रा अक्क यहूदी निवासी हा। अऊँ तिजो सोगी बिनती करदा कि मिन्जो मणु सितै गल्ला करना दे।”

⁴⁰जैहणै तिनी हूक्म दिता, ता पौलुसै पैईड़ी पुर खड़ी करी मणु जो हत्था सोगी सिनक लाई। जैहणै सो चुप भूच्ची गै ता सो इब्रानी भाषा मन्ज बलणा लगा