Read Gaddi चेलै रै कम 25 Bible Online

चेलै रै कम 25 - Gaddi bible

चेलै रै कम 25

¹फेस्तुस यहूदिया परदेस मन्ज पुजणै रै त्राई दिन बाद कैसरिया थऊँ यरूशलेम जो गो।

²ता प्रधान याजकै अतै यहूदी अगुवै तसेरै सामणै पौलुस पुर दोष लाए;

³अतै ऐह बिनती करीके ऐह मँगू कि पौलुस जो यरूशलेम मन्ज हैदया गच्छा, क्ओकि सो तैसिओ रस्तै मन्ज ही मारनै रै चक्करा मन्ज थियै।

⁴फेस्तुसै जवाव दिता, “पौलुस कैसरिया रै पैहरै मन्ज हा, अतै मुँ अप्पू तैड़ी झट गाणा।”

⁵फिरी बल्लू, “तूसु मन्ज जैड़ै अधिकार रखदै हिन सो भी सोगी चलै, अतै अगर ईनी मणुऐ कोई अनुचित कम करूरा ता तैस पुर दोष लगाई सकन।”

⁶फेस्तुस यरूशलेम मन्जै कोई अठ-दस दिन रैई करी कैसरिया चली गो; अतै दूये दिन न्याय आसन पुर बैही करी पौलुस जो अणनै रा हूक्म दिता,

⁷जैहणै सो आ ता यहूदी अगुवै यरूशलेम मन्ज छुरै थियै, तिन्यै अखै-बख्रै खड़ी करी बड़ै गम्भीर आरोप लगाए, जठेरा सवूत तियां वलै ना थू।

⁸पर पौलुसै जवाव दिता, “मैंई ना ता यहूदी री व्यवस्था रै अतै ना मन्दरा रै, अतै ना ही सम्राट कैसर रै वरोधा मन्ज कोई कम करूरा हा।”

⁹ता हाक्म फेस्तुसै यहूदी अगुवै जो खुश करनै री इच्छा सितै पौलुस थऊँ पूछु, “कै तू चाहन्दा कि तू यरूशलेम जो गच्छा; अतै तैड़ी मेरै सामणै तेरा ऐह मुकदमा तय करया गच्छा?”

¹⁰पौलुसै बल्लू, “अऊँ सम्राट कैसर रै न्याय आसन रै सामणै खडूरा; मेरै मुकदमैं रा ऐठीये ही फैसला भूणा चहिन्दा। क्ओकि अऊँ आक रोमी नागरिक हा। जिंआं तू अच्छै तरीकै जाणदा, यहूदी रा मैंई कोई अपराध ना करूरा।

¹¹अगर अऊँ अपराधी हा अतै मारी दिणै रै योग्य कोई कम करूरा हा, ता मरनै थऊँ ना मुकरदा; पर जियां गल्ला रा ऐह मिन्जो पुर दोष लान्दै हिन, अगर इन्या मन्ज कोई भी गल्ल सच ना भोआ ता कोई मिन्जो इन्यारै हत्थै ना सौंपी सकदा। अऊँ बिनती करदा कि मेरा न्याय राजा सम्राट कैसर रै द्वारा भोआ।”

¹²ता हाक्म फेस्तुसै मन्त्री री सभा सोगी गल्ला करीके जवाव दिता, “तैंई सम्राट कैसर थऊँ न्याय करनै जो बल्लू हा ता तुद सम्राट कैसर वलै ही गाणा।”

¹³कुछ दिन बितणै थऊँ बाद अग्रिप्पा राजा अतै तसेरी बैहण बिरनीके कैसरिया शहर मन्ज ईच्ची करी हाक्म फेस्तुस सोगी मुलाकात करी।

¹⁴तंयारै बड़ै दिन तैड़ी रैहणै थऊँ बाद फेस्तुसै पौलुस रै बारै मन्ज राजा जो दस्सु; “अक्क मणु हा, जैसिओ फेलिक्स बन्दी छड़ी गच्छुरा हा।

¹⁵जैहणै अऊँ यरूशलेम मन्ज थू, ता प्रधान याजक अतै यहूदिये रै स्याणै तैस पुर मुकदमा चलाणा चाऊ कि तैसिओ दण्ड़ मुळा।”

¹⁶“पर मैंई तियां जो जवाव दिता कि रोमी री ऐह रीति निय्आ कि कसी मणु जो दण्ड़ तांयें सौंपी दीन, जैहणै तक मुकदमा करनैवाळै अतै मुजरिम जो सामणै खड़ी करी दोषा रै जवाव दिणै रा मौका ना मुळा।

¹⁷ता जैहणै यहूदी अगुवै कैसरिया शहर मन्ज इकट्ठै भुएै, ता मैंई कुछ देर ना करी, पर दूये ही दिन मैंई न्याय आसन पुर बैही करी पौलुस जो अणनै रा हूक्म दिता।

¹⁸जैहणै तसेरै मुकदमेवाज खड़ियै, ता तिन्यै ऐसी अनुचित गल्ला रा दोष ना लाऊ जिंआं अऊँ समझदा थू।

¹⁹पर सो अपणै धर्म अतै यीशु नां रै कसी मणु रै बारै मन्ज जैडा मरी गच्छुरा थू अतै पौलुस तैसिओ जिन्दा दसदा थू, विवाद करदै थियै।

²⁰अऊँ उलझन मन्ज थू कि इन्या गल्ला रा कियां फैसला करू? ठेरैतांये मैंई पौलुस थऊँ पूछु, ‘कै तुद यरूशलेम गाणा कि तेरा मुकदमा तैड़ी भोआ?’

²¹जैहणै पौलुसै सम्राट कैसर थऊँ न्याय करवाणै रा फैसला करू, ता मैंई आज्ञा दिती कि जैहणै तक ऐसिओ सम्राट कैसर बलै ना भैजु तैहणै तक ऐसिओ हिरासत मन्ज रखया गच्छा।”

²²ता अग्रिप्पा फेस्तुस सोगी बलणा लगा, “अऊँ भी ऐस मणु थऊँ हुणना चाहन्दा।” तिनी बल्लू, “तुद दोतै हुणी लैणा।”

²³ता दूये दिन जैहणै अग्रिप्पा अतै बिरनीके बड़ी धूमधाम सोगी आये अतै पलटना रै सरदारा अतै नगरा रै प्रमुख मणु सोगी दरबार मन्ज पुजै। ता फेस्तुसै आज्ञा दिती कि सो पौलुस जो लेई ईन।

²⁴फेस्तुसै बल्लू, “हे राजा अग्रिप्पा, अतै हे सब मणुओ जैड़ै असु सोगी ऐड़ी हिन, तुहै ऐस मणु जो हेरदै हिन, जसेरै बारै मन्ज सब यहूदी अतै यरूशलेम मन्ज अतै ऐठी भी जोरा जोरा सितै बकी करी मिन्जो सोगी बिनती करी कि सेरा जिन्दा रैहणा ठीक निय्आ।

²⁵पर मैंई जाणी लैऊआ कि ईनी कुछ भी ऐसा ना करू हा कि ऐसिओ मारया गच्छा; अतै जांकि ईनी अपणै आप ही सम्राट थऊँ न्याय पाणै री बिनती करी हा, ता मैंई ऐसिओ रोम शहर भैजणै रा फैसला करूआ।

²⁶मैंई सेरै बारै मन्ज कोई पक्की गल्ल ना पाई कि सम्राट जो कुछ लिखु। ठेरैतांये अऊँ ऐसिओ तून्दै सामणै अतै विशेष करीके हे राजा अग्रिप्पा, तेरै सामणै अन्दा कि परखणै थऊँ बाद मिन्जो कुछ लिखणै जो मुळा।

²⁷क्ओकि बन्दी जो भैजणा अतै जैडा दोष ऐस पुर लगाऊरै हिन, तियां जो ना दसणा, मिन्जो बेकार लगदा।”