Read Gaddi चेलै रै कम 26 Bible Online

चेलै रै कम 26 - Gaddi bible

चेलै रै कम 26

¹अग्रिप्पा पौलुस सोगी बलणा लगा, “तिजो अपणै बारै मन्ज बलणै री आज्ञा हा।” ता पौलुस हत्था रै इशारै सोगी बलणा लगा,

²“हे राजा अग्रिप्पा, जैतनी गल्ला रा यहूदी अगुवै मिन्जो पुर दोष लान्दै हिन, अज तेरै सामणै तियां जो जवाव दिणै तांयें अऊँ अपणै आपा जो धन्य समझदा हा,

³विशेष करीके कि तू यहूदी रै सब वर्ताव अतै विवादा जो जाणदा हा। ठेरैतांये अऊँ बिनती करदा कि, धीरज सोगी मेरी हुणा।”

⁴“मेरा चाल चलन बचपन थऊँ ही अपणै मणु रै मन्जै अतै यरूशलेम सांईयै थू, ऐह सब यहूदी जाणदै हिन।

⁵अगर ऐह गवाही दिणा चाहन, ता बचपना थऊँ मिन्जो पच्छैणदै हिन कि अऊँ फरीसी भूच्ची करी अपणै धर्म रै सबी थऊँ खरै पंथ रै अनुसार चलु।

⁶अतै अज मिन्जो पुर मुकदमा चलु करदा ऐह सब तैहा प्रतिज्ञा री उम्मीद री वजह थऊँ जैड़ी प्रमात्मैं इन्दै पूर्वजा सोगी करूरी थी,।

⁷तैहा प्रतिज्ञा रै पूरै भूणै री उम्मीद लगाऊरै, इन्दै बारह गोत्रा रै मणु अपणै सारै मना सितै रात-दिन प्रमात्मैं री सेवा करदै आये हिन। हे राजा, ऐसा उम्मीद रै बारै मन्ज जठेरै बारै मन्ज प्रमात्मैं वायदा करूरा हा, यहूदी मिन्जो पुर दोष लान्दै हिन।”

⁸पौलुसै ऐह गल्ल मणु सोगी बली कि जांकि प्रमात्मैं मरूरै थऊँ जियान्दा, ता तूसु बलै ऐह गल्ल कजो विस्वासयोग्य ना समझी गान्दी?

⁹“मैंई भी समझू थू कि यीशु नासरी रै नां रै वरोधा मन्ज मिन्जो बड़ा कुछ करना चहिन्दा।

¹⁰अतै मैंई यरूशलेम मन्ज ऐसा ही करू; अतै प्रधान याजका थऊँ अधिकार पाई करी मतै सारै पवित्र मणु जो जेला मन्ज पाऊ, अतै जैहणै तियां जो मारी भी दिन्दै थियै ता अऊँ अपणी सम्मति दिन्दा थू।

¹¹हर यहूदी रै सभागार मन्ज तियां जो अऊँ ताड़ना दुआई दुआई करी यीशु री निन्दा करवान्दा थू, ऐड़ी तक कि क्रोधा रै मारै ऐसा पागल भूच्ची गो कि बाहर रै नगरा मन्ज भी गिचीकरी तियां जो सतान्दा थू।”

¹²ऐसा धूना मन्ज जैहणै अऊँ प्रधान याजका थऊँ अधिकार अतै आज्ञा पत्र लेई करी दमिश्क शहर जो चलूरा थू;

¹³ता हे राजा, रस्तै मन्ज दोफारा रै टैमैं मैंई अम्बरा रै सूरजा रै तेज थऊँ भी बदिकरी अक्क लौ अपणै सोगी चलुरै सबी मणु रै चंऊ कनारी हेरी।

¹⁴जैहणै अहै सब जमीना पुर पैई गै, ता मैंई इब्रानी भाषा मन्ज, मिन्जो सितै कणैदैं अक्क बोल हुणु, “हे शाऊल, हे शाऊल, मिन्जो सोगी लड़ाई करना तेरै तांई ठीक निय्आ? पैईनी जगह लत मारना तिजो तांयें कठण हा”।

¹⁵मैंई बल्लू, “हे प्रभु, तू कुणआ”? प्रभुऐ बल्लू, “अऊँ यीशु हा जैसिओ तू सतांदा।

¹⁶पर तू उठ, अपणै पैरा पुर खड़ी, क्ओकि मैंई तिजो ठेरैतांये दर्शन दितै कि तिजो तियां गल्ला रा भी सेवक अतै गवाह ठहराऊ, जैड़ी तैंई हेरी हिन, अतै तंयारा भी जिंआं तांयें मुँ तिजो दर्शन दिणा।

¹⁷अतै मुँ तिजो तेरै मणु अतै गैर यहूदी थऊँ छुड़ान्दै रैहणा, जिंआं बलै अऊँ तिजो ठेरैतांये भैजदा

¹⁸कि तू तंयारी हाख्री खोला कि सो अंधकार थऊँ लौई री कनारी, अतै शैताना रै अधिकारा थऊँ प्रमात्मैं री कनारी फिरन; कि पापा री माफी अतै तियां मणु सोगी जैड़ै मिन्जो पुर विस्वास करनै थऊँ पवित्र करूरै हिन, मीरास पान”।

¹⁹“ठेरैतांये हे राजा अग्रिप्पा, मैंई तैस स्वर्गीय दर्शना री गल्ल ना टाळी,

²⁰पर पैहलै दमिश्क शहर रै, फिरी यरूशलेम रै, अतै तां यहूदिया रै सब देशा रै रैहणैवाळै जो, अतै गैर यहूदी जो प्रचार करदा रैऊ कि पापा थऊँ पच्छतावा करा अतै प्रमात्मैं री कनारी फेरी करी मन फेराव रै योग्य कम करा।

²¹इन्या गल्ला री वजह थऊँ यहूदी मिन्जो पकड़ी करी मन्दरा मन्ज मारनै रै चक्करा मन्ज थियै।

²²पर प्रमात्मैं री मदद थऊँ अऊँ अज तक बणी रैऊरा अतै हल्कै मोट्टै सबी रै सामणै गवाही दिन्दा हा। अऊँ तियां गल्ला जो छड़ी होर ना कणैन्दा जैड़ी कि मूसै अतै भविष्‍यवक्तै भी बलुरी हिन जैड़ी भूणैबाळी हिन,

²³कि मसीह दुख भोगणा, सो ही सबी थऊँ पैहलै मरूरै थऊँ जी करी, यहूदी मणु मन्ज अतै गैर यहूदी मन्ज लौई रा प्रचार करना।”

²⁴जैहणै पौलुस ऐस तरीकै जवाव दिच्छु करदा थू, ता हाक्म फेस्तुस जोरा सितै बलणा लगा, “हे पौलुस, तू पागल हा। मतै ज्ञानै तिजो पागल करी दितुरा।”

²⁵पर पौलुसै बल्लू, “हे महामहिम फेस्तुस, अऊँ पागल निय्आ, पर सच्चाई अतै अक्ला री गल्ला करदा।

²⁶राजा भी जसेरै सामणै अऊँ निड़र भूच्ची करी बल्लू करदा, इन्या गल्ला जाणदा; अतै मिन्जो विस्वास हा कि इन्या गल्ला थऊँ कोई तैस थऊँ छूपुरी निय्आ।

²⁷हे राजा अग्रिप्पा, कै तू भविष्‍यवक्ता रा विस्वास करदा? हा, अऊँ जाणदा कि तू विस्वास करदा।”

²⁸ता अग्रिप्पे पौलुस सोगी बल्लू, “तू थोड़ा ही समझाणै थऊँ मिन्जो मसीह बणाणा चाहन्दा?”

²⁹पौलुसै बल्लू, “प्रमात्मैं सोगी मेरी प्रार्थना हा कि कै थोड़ै मन्ज कै मतै मन्ज, सिर्फ तू ही ना पर जैतणै मणु अज हुणु करदै हिन, इन्या बन्‍धना जो त्रोड़ी करी सो मेरै सांईयै विस्वासी भूच्ची गान।”

³⁰ता राजा अतै हाक्म अतै बिरनीके अतै तियां सोगी बैहुरै उूठी खड़ियै, अतै बाहर चली गै

³¹बाहर अलग गिचीकरी अप्पू मन्ज कणैणा लगै, “ईनी मणु ऐसा ता कुछ ना करूरा, जे मृत्युदण्ड या जेला मन्ज पाणै योग्य भोआ।”

³²अग्रिप्पे फेस्तुस सोगी बल्लू, “अगर ऐह मणु सम्राट कैसर री दोहाई ना दिन्दा, ता छुटी सकदा थू।”