Read Gaddi चेलै रै कम 27 Bible Online

चेलै रै कम 27 - Gaddi bible

चेलै रै कम 27

¹जैहणै हाक्म फेस्तुस द्धारा ऐह पक्का भूच्ची गो कि अहै जहाजा मन्ज रोम परदेस रै इटली शहर जो गान ता तिन्यै पौलुस अतै कुछ होर कैदी जो भी यूलियुस नां रै सम्राट औगुस्तुस री पलटण रै अक्क सुबेदारा रै हत्थै सौंपी दिता।

²अद्रमुत्तियुम शहर रै अक्क जहाजा पुर जैडा आसिया परदेस रै कनारै री जगहा पुर गाणै बाळा थू, जलमार्ग रै द्धारा अपणी यात्रा शुरू करी, अतै मकिदुनी परदेस रा थिस्सलुनीके शहरा आक अरिस्तर्खुस नां रा अक्क मणु इन्दै सोगी थू।

³दूये दिन अहै सैदा शहर मन्ज पुजी गै, अतै यूलियुस पौलुस पुर दया करीके तैसिओ तसेरै मित्रा बलै गाणा दिता कि तसेरा सत्कार करन।

⁴तैड़ी थऊँ अहै दोबारा यात्रा शुरू करी अतै जहाजा चलाई करी हवा विरूद्ध भूणै री वजह थऊँ अहै साइप्रस टापू री आड़ मन्ज भूच्ची करी चलै।

⁵अतै किलिकिया अतै पंफूलिया शहर रै नेड़ै समुंद्र रै रस्तै मितै लूसिया परदेस रै मूरा शहर मन्ज आये।

⁶तैड़ी सुबेदारा जो अक्क सिकन्दरिया शहर रा जहाज इटली शहर जो गान्दा मूलु, अतै तिनी असिओ तैस जहाजा पुर चढ़ाई लैऊ।

⁷जैहणै अहै बड़ै दिन तक होळै-होळै चली करी मुसकल सोगी कनिदुस शहर रै सामणै पुजै, ता ठेरैतांये कि हवा असिओ अगो गाणा ही ना दिच्छु करदी थी, ता अहै सलमोन टापू रै सामणै थऊँ भूच्ची करी क्रेते टापू री आड़ मन्ज चलै;

⁸अतै तसेरै कनारै कनारै मुसकल मन्ज चली करी शुभ लंगरबारी नां री अक्की जगह पुजै, जैड़ी थऊँ लसया नगर नेड़ै थू।

⁹जैहणै मतै दिन भूच्ची गै अतै जलयात्रा मन्ज जोखिम ठेरैतांये थियै कि उपवास[8] रै दिन अबै बीती गच्छुरै थियै। ता पौलुसै तियां सबी जो ऐह बली करी समझाऊ,

¹⁰“हे सज्जनो, मिन्जो ऐसा लगदा कि ऐसा यात्रा मन्ज मुसिवता अतै बड़ा नूकसान, ना सिर्फ माल अतै जहाजा रा बल्कि इन्दै प्राणा रा भी भूणैवाळा हा।”

¹¹पर सूबेदारै पौलुस री गल्ला थऊँ कप्तान अतै जहाजा रै मालका री गल्ला जो बदिकरी मनु।

¹²शुभ लंगरबारी नां रा बन्दरगाह सर्दी कटणै तांयें बदिआ ना थू, ठेरैतांये मतै ऐह विचार करू कि जहाजा जो तैड़ी थऊँ चलाई करी अगर भूच्ची सका ता फीनिक्स शहर पुजीकरी सर्दी कटन। ऐह ता क्रेते टापू रा अक्क बन्दरगाह हा जठेरा रस्ता दक्षिण-पश्‍चिम अतै उतर-पश्‍चिम री कनारी खुलदा।

¹³जैहणै कुछ कुछ हल्की हल्की हवा चलना लगी, ता ऐह सोची करी कि तंयारी योजना जो पुरा करनै रा ठीक टैमं हा, ता लंगर चुकु जैडा कनारै पुर पाऊरा थू अतै क्रेते टापू जो गाणा लगै।

¹⁴पर थोड़ी देरा बाद जमीना री कनारी थऊँ अक्क बड़ी आँधी चली आई, जैड़ी यूरकुलीन कहलान्दी हा।

¹⁵जैहणै आँधी जहाजा सोगी टकराई ता सो जहाज तैहा सामणै टिकी ना सकू, ठेरैतांये अहै तैसिओ हव्वा लुड़णा दिता, अतै ऐस ही तरीकै लुड़दै लुड़दै चली गै।

¹⁶ता कौदा नां रै अक्की हल्कै जिन्‍नै टापू री आड़ मन्ज लुड़दै लुड़दै अहै मुसकल सोगी डोंगी जो वशा मन्ज करी सकै।

¹⁷फिरी जहाज रा सहायक दल डोंगी चुकी अतै कई पा करीके सो डोंगी थला थऊँ लेई करी ऊपरा तक रस्सी सितै खरी के बनी दिती, अतै सुरतिस खाड़ी रै रेत मन्ज फसणै रै ड़रा थऊँ पाल थोड़ा थलै ओसाली करी हव्वा सोगी लुड़दै चली गै।

¹⁸जैहणै अहै आँधी सितै बड़ै हिचकोलै अतै धक्कै खाए, ता दूये दिन सो जहाजा रा माल फैंकणा लगै;

¹⁹अतै त्रिऐ दिन तिन्यै अपणै हत्था सितै जहाजा रा साज-समान भी फैंकी दिता।

²⁰जैहणै मतै दिन तक ना सूरज, ना तारै हुजै अतै बड़ी आँधी चलदी रैई, ता अन्त मन्ज इन्दै बचणै री सब उम्मीद गान्दी रैई।

²¹जैहणै सो बड़ै दिन तक भूखै रै ता पौलुसै तंयारै मन्जै खड़ी करी बल्लू, “हे मणुओ, तुसिओ चाहिदा थू कि तुहै मेरी गल्ल हुणी करी क्रेते टापू थऊँ ना जहाज खोलदै अतै ना ऐह मुसकिला इन्दी अतै ना ऐह नूकसान उठान्दै।

²²पर अबै अऊँ तुसिओ समझांदा कि हिम्मत रखा सिर्फ जहाजा जो छड़ी करी तूसु मन्ज कसी रै भी प्राणा रा नूकसान ना भूणा।

²³क्ओकि प्रमात्मां जैसेरा अऊँ हा, अतै जसेरी सेवा करदा, तसेरै स्वर्गदूतै राती ईच्ची करी मिन्जो बलुरा,

²⁴हे पौलुस, मत डर! तिजो सम्राट कैसर रै सामणै खड़ीणा जरूरीआ। प्रमात्मैं सबीओ जैड़ै तिजो सोगी यात्रा करू करदै हिन, जीवनदान दिता हा।

²⁵ठेरैतांये, हे सज्जनो, हिम्मत रखा; क्ओकि अऊँ प्रमात्मैं रा विस्वास करदा, कि जिंआं मिन्जो सितै बलूआ, तियां ही भूणा।

²⁶पर असु कसकि टापू पुर गिच्ची टिकणा हा।”

²⁷जैहणै चौदहवी रात आई, अतै अहै अद्रिया नां रै समुंद्र मन्ज भटकदै फिरू करदै थियै ता अध्धी राती जहाज रा सहायक दल जो पता लगु कि अहै कसकि देशा रै नेड़ै पुजणा लगुरै हिन।

²⁸ता तियैं समुन्द्रा जो अक्क रस्सी सितै नापु ता तिन्यै सो अक्क हौ बीह फूट गैहरा पाऊ, थोड़ा होर अगो फिरी नापु ता समुंद्र नब्बै फूट गैहरा थू।

²⁹ता तिन्यै पथरीली जगहा मन्ज टकराणै रै ड़रा थऊँ तिन्यै जहाजा री पचियें कनारै चंऊर लंगर पायै, अतै भ्यागा भूणै री कामना करदै रैह।

³⁰पर जैहणै जहाज रा सहायक दल जहाजा थऊँ नहणा चाहन्दै थियै, ता तिन्यै जहाजा रै सामणै रै कनारै थऊँ लंगर पाणै रै बहानै डोंगी समुंद्र मन्ज उतारी दिती।

³¹ता पौलुसै सुबेदारा अतै सैनका सितै बल्लू, “अगर तुहै जहाज पुर ना रै, ता तुहै भी ना बची सकदै हिन।”

³²ता सैनके रसी कटीकरी डोंगी फैंकी दिती।

³³जैहणै भ्याग भूणैबाळी थी ता, पौलुसै ऐह बली करी सबी जो खाणै तांयें समझाऊ, “अज चौदवां दिन कि तुहै चिन्ता करदै-करदै भूखै रैह हिन, अतै कुछ ना खाऊरा।

³⁴ठेरैतांये अऊँ समझांदा कि कुछ खाई लेय्आ, जैत सितै तून्दा बचाव भोआ; क्ओकि तूसु मन्ज कसी रै मुण्ड़ा रा अक्क बाळ भी बांका ना भूणा।”

³⁵ऐह बली करी तिनी रोटी लेई करी सबी रै सामणै प्रमात्मैं जो धन्यवाद करू अतै त्रोड़ी करी खाणा लगा।

³⁶ता सो सब भी हिम्मत करीके खाणा लगै।

³⁷अहै सब मिलीकरी जहाजा पुर दोई हौअ छयतर जिणै थियै।

³⁸जैहणै सो खाई करी रजी गै, ता कणका जो समुंद्र मन्ज फैंकी करी जहाजा जो हल्का करना लगै।

³⁹जैहणै दिन भूआ ता तिन्यै तैस देशा जो ना पच्छैणु, पर अक्क खाड़ी हेरी जठेरा कनारा बड़ा चौड़ा थू, अतै सोचु कि अगर भूच्ची सका ता ऐठीये ही जहाजा जो टकान।

⁴⁰ता तिन्यै लंगर जो खोली करी समुंद्र मन्ज छड़ी दिता अतै तैहणै ही पाल रै बन्धन ढिलै करी दितै, अतै हवा रै सामणै अगला पाल चढ़ाईकरी कनारै जो चली पै।

⁴¹पर दूँ समुंद्र रै संगम री जगह पैई करी तिन्यै जहाजा जो टिकाऊ, अतै जहाजा रा अगला हेस्सै जो धक्‍का खाई करी टिकी गो अतै सो खिसकी ना सकू; पर पचियां हेस्सा लैहरा रै जोरा सितै टुटणा लगा।

⁴²ता सैनके ऐह सोचु कि कैदी जो मारी दिन, ऐसा ना भोआ कि कोई तैरी करी नह्ही गच्छा।

⁴³पर सूबेदारै पौलुस जो बचाणै री इच्छा थऊँ तियां जो ऐस विचारा थऊँ रोकू अतै ऐह बली करी कि जैडा तैरी सकदा, पैहलै छाळ मारी करी कनारै जो निकळी गान;

⁴⁴अतै बाकी कोई जहाजा रै फट्टै पुर, अतै कोई जहाजा री होर चिजा रै सहारै निकळी गच्छा। ऐस तरीकै सब जमीना री कनारी बची निकळै।