Read Gaddi चेलै रै कम 3 Bible Online

चेलै रै कम 3 - Gaddi bible

चेलै रै कम 3

¹पतरस अतै यूहन्‍ना दिन रै लगभग त्राई बजै प्रार्थना रै टैमैं मन्दरा जो चलुरै थियै।

²अतै कुछ मणु अक्क जन्मा थऊँ लंगड़ै जो लैईणा लगुरै थियै, जैसिओ सो रोज मन्दरा रै तैस परोळी वलै बहालदै थियै जैस परोळी जो “सुन्दर” बलदै थियै, ताकि सो ईणै गाणै बाळै थऊँ भीख मंगदा रेय्आ।

³जैहणै पतरस अतै यूहन्‍ना जो तिनी मन्दरा मन्ज गान्दै हेरू, ता तिनी तियां थऊँ भीख मँगी।

⁴पतरस अतै यूहन्‍ना तसेरी कनारी ध्यान दी करी बल्लू, “इन्दी कनारी हेर!”

⁵ता सो तियां थऊँ कुछ मुळन री उम्मीद मन्ज तंयारी कनारी हेरना लगा।

⁶ता पतरसै बल्लू, “चाँदी अतै सोना ता मिन्जो बलै निय्आ, पर जैडा मिन्जो बलै हा सो तिजो दिन्दा; यीशु मसीह नासरी रै नां सितै उठ अतै चल फिर।”

⁷ता पतरसै तसेरा सज्जा हत्थ पकड़ी करी तैसिओ उठालु; अतै झट तसेरै पैरा अतै घुटनै मन्ज जोर चली आ।

⁸सो उटकी करी खड़ी गो अतै चलना फिरना लगा; अतै चलदा अतै कूददा, अतै प्रमात्मैं री स्तुति करदा तियां सोगी मन्दरा जो गो।

⁹सब मणुऐ तैसिओ चलदै फिरदै अतै प्रमात्मैं री स्तुति करदै हेरू, अतै

¹⁰पच्छैणी लैऊ कि ऐह सो हा जैडा मन्दरा रै “सुन्दर” परोळी बलै बैही करी भीख मंगदा थू; अतै ऐह गल्ला थऊँ जैड़ी तैस सोगी भूई थी सो मणु बड़ै हैरान परेशान भुएै।

¹¹जैहणै सो पतरस अतै यूहन्‍ना जो पकडी करी चलूरा थू, ता सब मणु बड़ै हैरान भूच्ची करी तैस बराण्ड़ै तक दौड़ी आये, जैडा सुलैमान रा थू,

¹²ऐह हेरी करी पतरस मणु सोगी बलणा लगा, “हे इस्त्राएलिओ, तुहै ऐस मणु जो हेरी करी कजो हैरान भूच्छु करदै हिन, अतै कजो ऐस तरीकै इन्दी कनारी हेरू करदै हिन जिंआं कि अहै अपणी सामर्थ अतै भक्ति सोगी ऐसिओ चलनै-फिरनै रै काबल बणाऊ हा।

¹³अब्राहम, इसहाक अतै याकूब, अतै इन्दै पूर्वज रै प्रमात्मैं अपणै सेवक यीशु री महिमा करी हा। तुहै जैसिओ पकडाई दिता, अतै जैहणै पिलातुसै तैसिओ छड़ी दिणै रा विचार करू ता तुहै सबी रै सामणै तसेरा इन्कार करू।

¹⁴तुहै तैस पवित्र अतै धर्मी रा इन्कार करू, अतै बिनती करी की अक्की हत्यारै जो तूसु तांयें छड़ी देय्आ।

¹⁵तुहै जिन्दगी रै कर्ता जो मारी दिता, जैसिओ प्रमात्मैं मरूरै थऊँ जीयाऊ; अतै तुहै ऐसा गल्ला जो अपणी हाख्री हेरूरा।

¹⁶ऐस मणु जो जैसिओ तुहै रोज हेरदै अतै पछैन्दै हिन, जैसिओ तुहै हबजु हेरू करदै हिन ऐस मणु मन्ज मसीह यीशु रै नां सितै ताकत आई हा। ऐह मणु मसीह यीशु पुर विस्वास करनै रै द्धारा ठीक भूच्ची गो हा।”

¹⁷“अबै हे भाईओ, अऊँ जाणदा कि तून्दै अगुवै यीशु मसीह जो अज्ञानता मन्ज मारी दिता, क्ओकि तुहै ना जाणदै थियै कि सो मसीहा थू।

¹⁸पर जिंआं गल्ला जो प्रमात्मैं भविष्‍यवक्तै रै द्धारा पैहलै ही दस्सी दितुरा थू, कि मसीह दुख उठाणा अतै मरना, अतै तिनी तियां ही पुरा करू।

¹⁹ठेरैतांये, मन फेरा अतै फिरी अईआ कि तून्दै पाप मिटी गान, जैत थऊँ प्रभु रै सामणै तूसु तांयें शान्ती रै दिन ईन,

²⁰अतै प्रमात्मां यीशु जो दोबारा भैजणा जैडा तूसु तांयें पैहलै ही मसीहा ठहराऊरा हा।

²¹जरूरी ऐह हा कि यीशु स्वर्गा मन्ज तैस टैमां तक रेय्आ जैहणै तक इन्या सबी गल्ला रा सुधार ना करी लेय्आ जठेरी चर्चा पूराणै टैमां थऊँ प्रमात्मैं अपणै पवित्र भविष्‍यवक्ता रै द्धारा करूरी हिन।

²²जिंआं कि मूसा बलदा थू, ‘प्रभु प्रमात्मां तून्दै भाई थऊँ तूसु तांयें मिन्जो साईयें अक्क भविष्‍यवक्ता खड़ेरना, जैडा कुछ सो तूसु सोगी बला तसेरी हुणै’।

²³पर हरेक सो मणु जैडा तैस भविष्‍यवक्ता री ना हुणला, मणु मन्ज नष्‍ट करया गाणा।”

²⁴“शमूएल थऊँ लेई करी तसेरै बाद बाळै तक जितनै भी भविष्‍यवक्तै भुएै तिन्यै सबीये इन्या दिन रा समाचार दितुरा हा।

²⁵तुहै सब भविष्‍यवक्ता री औलाद अतै तैसा प्रतिज्ञा रै हक्कदार हिन, जैड़ै प्रमात्मैं तून्दै बापदादे सोगी करूरै हिन, जैहणै तिनी अब्राहम सोगी बलुरा, ‘तेरै खानदाना री वजह थऊँ धरती रै सब घरानै अशीर्वाद पाणा।’”

²⁶पतरसै बल्लू “प्रमात्मैं यीशु जो मसीहा रै रूपा मन्ज धरती पुर भैजु, कि पैहलै इस्त्राएली मणु जो तंयारी बुराई थऊँ फेरी करी अशीर्वाद देय्आ।”