Read Gaddi चेलै रै कम 4 Bible Online

चेलै रै कम 4 - Gaddi bible

चेलै रै कम 4

¹जैहणै पतरस अतै यूहन्‍ना मणु सोगी ऐह कणैणा लगुरा थियै, ता याजक, मन्दरा रै सरदार अतै सदूकि तियां पुर चड़ी आये।

²सो बड़ै गुस्सै भूच्ची गै क्ओकि सो मणु जो यीशु रै बारै मन्ज सखाणा अतै मरूरै थऊँ दोबारा जी उूठणै रै प्रचार करना लगुरै थियै।

³तिन्यै सो चेलै पकड़ी पायै अतै दूये दिन तक जेला मन्ज पाई दितै क्ओकि सँझ भूच्ची गच्छुरी थी।

⁴पर बचन जो हुणनैबाळै थऊँ मतै सारै मणु यीशु पुर विस्वास करू, अतै तंयारी गिणती पँज हजार मणु रै लगभग भूच्ची गई।

⁵दूये दिन ऐसा भूआ कि तंयारै शास्त्री, सरदार अतै स्याणै

⁶महायाजक हन्ना, कैफा, यूहन्‍ना अतै सिकन्दर अतै होर जैतणै महायाजक रै घरानै थऊँ थियै, सब यरूशलेम मन्ज इकट्ठै भुएै।

⁷सो तियां जो मन्जै खडेरी करी पुछणा लगै कि तुहै ऐह कम कसेरै सामर्थ अतै कसेरै नां सोगी करूआ।

⁸ता पतरसै पवित्र आत्मा सितै भरी करी तियां स्याणै सितै बल्लू,

⁹“हे मणु रै सरदारो अतै स्याणेओ, ऐस लंगड़ै मणु सोगी जैड़ी भलाई करी गई हा, अगर अज ठेरै बारै मन्ज असु थऊँ पुछताछ करी गान्दीआ, कि ऐह कियां ठीक भूआ।

¹⁰ता तुहै सब अतै इस्त्राएली मणु जाणी लेय्आ कि यीशु मसीह नासरी रै नां सितै जैसिओ तुसै क्रूस पुर चढाऊरा, अतै प्रमात्मैं मरूरै थऊँ जिआऊरा, ऐह मणु तून्दै सामणै भला चंगा खडूरा हा।”

¹¹“ऐह सो ही पत्थर हा जैसिओ तुहै राजमिस्त्रीये तूछ जाणुरा अतै सो कूणै रै सिरै रा पत्थर बणी गो।”

¹²“कसकि होरी रै द्धारा उद्धार निय्आ; स्वर्गा थऊँ थलै सिर्फ यीशु रै नां रै द्धारा ही अहै उद्धार पाई सकदै हिन।”

¹³जैहणै तिन्यै पतरस अतै यूहन्‍ना री हिम्मत हेरी, अतै ऐह जाणु कि ऐह ता अनपढ़ अतै सिधै मणु हिन, ता हैरान भुएै; फिरी तिन्यै सो पछैणै कि ऐह ता यीशु सोगी रैऊरै हिन।

¹⁴तैस मणु जो जैडा ठीक भच्छुरा थू, तियां चेलै सोगी खडूरा हेरी करी, सो मणु तंयारै वरोधा मन्ज कुछ ना बली सकै।

¹⁵पर तियां जो यहूदी सभा थऊँ बाहर गाणै रा हूक्म दी करी, सो अप्पू मन्ज सलाह करना लगै,

¹⁶“अहै इन्या मणु सोगी कै करन? क्ओकि यरूशलेम मन्ज रैहणै बाळै कई मणु जाणदै हिन कि इन्यै चमत्कार करूरै हिन; अतै इन्यारा इन्कार ना करी सकदै।

¹⁷पर ठेरैतांये कि ऐह गल्ल मणु मन्ज होर ना फैली गच्छा, अहै इन्या जो धमकान्दै, कि यीशु रा नां लेई करी फिरी कसी मणु सोगी गल्ल ना करन।”

¹⁸ता तिन्यै सो हैदै अतै चेतावनी दी करी बल्लू, “यीशु रै नां सितै कुछ भी मत बलदै अतै सखान्दै।”

¹⁹पर पतरस अतै यूहन्‍नै तियां जो जवाव दिता, “तुहै ही न्याय करा; कै ऐह प्रमात्मैं रै नेड़ै खरा कि प्रमात्मैं री गल्ला जो छड़ी करी तुन्दी गल्ला मना।

²⁰क्ओकि ऐह ता असु थऊँ ना भूच्ची सकदा कि जैडा अहै हेरूरा अतै हुणुरा, सो ना कणैन।”

²¹ता तिन्यै तैसिओ होर धमकाई करी छड़ी दिता, क्ओकि मणु री वजह थऊँ तियां जो दण्ड़ दिणै रा कोई दाँव ना मूळु, ठेरैतांये कि सेरै ठीक भूणै री वजह थऊँ सब मणु प्रमात्मैं री बड़ाई करू करदै थियै।

²²सो मणु जैसिओ ठीक भूणै रा चमत्कार दसुरा थू, चाळी साला री उम्रा रा थू।

²³पतरस अतै यूहन्‍ना छुटीकरी अपणै साथी बलै आये, अतै जैडा कुछ प्रधान याजकै अतै स्याणै बलुरा थू, तियां जो हुणाई दिता।

²⁴ऐह हुणी करी तिन्यै अक्क चित भूच्ची करी जोरा सितै प्रमात्मैं सितै बल्लू, “हे स्वामी, तू सो ही हा जिनी स्वर्ग, धरती, समुंद्र अतै जैडा कुछ ऐत मन्ज हा बणाऊरा।

²⁵तैंई पवित्र आत्मा रै द्धारा अपणै सेवक इन्दै पूर्वज दाऊद रै द्धारा थऊँ ऐह कणैऊरा:” “अन्य जातिऐ हुल्लड़ कजो मचाऊरा? अतै देशा देशा रै मणुऐ कजो बेकार गल्ला सोची?

²⁶प्रभु अतै तसेरै मसीहा रै वरोधा मन्ज धरती रै राजा खड़ी गै हिन, अतै हाक्म भी किठ्ठी गै हिन।”

²⁷“क्ओकि सच मन्ज तेरै सेवक यीशु रै वरोधा मन्ज, जैसेरा तैंई अभिषेक करूरा, हेरोदेस अतै पुन्‍तियुस पिलातुस भी गैर यहूदी[2] अतै इस्त्राएली सोगी ऐस नगर मन्ज इकट्ठै भच्छुरै हिन,

²⁸कि जैडा कुछ पैहलै थऊँ तेरी सामर्थ अतै मती थऊँ थू, सो ही करदै रेय्आ।

²⁹अबै हे प्रभु इन्यारी धमकी जो हेर; अतै अपणै दासा जो ऐह वरदान दे तेरा बचन बड़ी हिम्मत सोगी हुणान।”

³⁰“ठीक करनै तांयें तू अपणा हत्थ अगो कर कि चिन्ह अतै अनोखै कम तेरै पवित्र सेवक यीशु रै नां सितै होर भी करै गान।”

³¹जैहणै सो प्रार्थना करी बैहै ता सो जगह जैड़ी सो किठूरै थियै हिली गो, अतै सो सब पवित्र आत्मा सितै भरी गै, अतै प्रमात्मैं रा बचन हिम्मत सोगी हुणादै रैह।

³²विस्वास करनैवाळै री मण्ड़ळी अक्क चित अतै अक्क मन री थी, ऐड़ी तक की कोई भी अपणी सम्पति जो अपणा ना बलदा थू, पर सब कुछ सांझै रा थू।

³³प्रेरित बड़ी सामर्थ सोगी प्रभु यीशु रै दोबारा जी भूणै री गवाही दिन्दै रैह अतै तियां सबी पुर बड़ी कृपा थी।

³⁴तियां मन्ज कोई भी गरीब ना थू क्ओकि जैस बलै जिंमी या घर थियै, सो तियां बेची बेचीकरी तठेरा दाम लैईन्‍दै, अतै तैतिओ चेलै रै पैरा बलै रखदै थियै,

³⁵अतै जिंआं जैसिओ जरूरत भुन्दी थी, तसेरै अनुसार हरेक जो बण्ड़ी दिन्दै थियै।

³⁶यूसुफ नां साइप्रस रा अक्क लेवी थू जैसेरा नां प्रेरितै बरनबास रखूरा थू।

³⁷तसेरी कुछ जिंमी थी, जैतिओ तिनी बेचु, अतै दाम रै पैसै अणीकरी प्रेरिता जो दी दिन्दै थियै।