Read Gaddi चेलै रै कम 6 Bible Online

चेलै रै कम 6 - Gaddi bible

चेलै रै कम 6

¹तियां दिन जैहणै चेलै री गिणती ज्यादा बदणा लगी, ता यूनानी भाषा बलणैवाळै यहूदी चेलै इब्रानी भाषा बलणैवाळै यहूदी चेलै पुर कुडकुडाणा लगै, कि रोजा री सेवकाई मन्ज इन्दी विधवा री सुधि ना लैन्दै।

²ता तिन्यै बारह चेलै यरूशलेम रै बाकी विस्वासी री मण्ड़ळी जो हैदी करी बल्लू, “ऐह ठीक निय्आ कि अहै प्रमात्मैं रै बचना रै प्रचार अतै शिक्षा जो छड़ी करी खुआणै-पिआणै री सेवा मन्ज रैहन।

³ठेरैतांये हे भाईओ, अप्पू मन्ज सत सुनाम मणु जैड़ै पवित्र आत्मा सितै भरूरै अतै पवित्र आत्मा अनुसार अक्लमन्द भून चुणी लेय्आ, कि अहै तियां जो ऐह कम दीन।

⁴पर असु ता प्रार्थना मन्ज अतै बचन री सेवा मन्ज लगी रैहणा।”

⁵ऐह गल्ल पूरी मण्ड़ळी जो खरी लगी, अतै तिन्यै स्तिफनुस नां रा अक्क मणु जैडा विस्‍वासा अतै पवित्र आत्मा सितै भरूरा थू, अतै फिलिप्पुस, प्रुखुरूस, नीकानोर, तीमोन, परमिनास, अतै अन्ताकिया वासी नीकुलाऊस जो जैडा यहूदी मत मन्ज चली छूरा थू, चुणी लैऊ।

⁶तियां जो प्रेरिता सामणै खडेरू अतै प्रेरितै प्रार्थना करीके तियां पुर हत्थ रखै।

⁷प्रमात्मैं रा बचन फैलदा गो अतै यरूशलेम मन्ज चेलै री गिणती बड़ी बददी गई; अतै कई यहूदी याजका रा अक्क बड़ा समाज ऐस मत जो मनणै बाळा भूच्ची गो।

⁸स्तिफनुस कृपा अतै सामर्थ सोगी भरी करी मणु जो बड़ै-बड़ै हैरानी बाळै कम अतै चमत्कार दसणा लगा।

⁹ता तैसा यहूदी रै सभागार थऊँ जैड़ी आजाद मणु[3] री कहलांदी थी तैड़ी थऊँ यहूदी, कुरैनी अतै सिकन्दरिया शहरा रै अतै किलिकिया अतै आसिया परदेस रै कुछ मणु ईच्ची करी स्तिफनुस सोगी बैंहसवाजी करना लगै।

¹⁰पर तैस ज्ञान अतै आत्मा रा जैत थऊँ स्तिफनुस गल्ला करदा थू, सो सामना ना करी सकै।

¹¹ता आजाद मणुऐ कई मणु जो स्तिफनुस रै विरोधा मन्ज उकसाऊ जैड़ै बलणा लगै, “अहै ऐसिओ मूसा अतै प्रमात्मैं रै वरोधा मन्ज निन्दा करदै हुणुरा।”

¹²अतै मणु जो, सेवका जो, अतै शास्त्री जो भड़काई करी चड़ी आये अतै तैसिओ पकड़ी करी यहूदी महासभा जो लेई आये।

¹³अतै झूठै गवाह खडेरै, जिन्यैं बल्लू, “ऐह मणु ऐसा पवित्र जगह अतै व्यवस्था री निन्दा ना छड़दा।

¹⁴क्ओकि अहै ऐसिओ ऐह कणैदैं हुणुरा कि ऐस ही यीशु नासरी ऐस मन्दरा जो ढ़ाई दिणा, अतै तियां नियमा जो बदली दिणा जैड़ै मूसै असिओ सोंपुरै हिन।”

¹⁵ता सबी मणुऐ जैड़ै यहूदी सभा मन्ज बैहुरै थियै, तसेरी कनारी नजर लगाई ता तसेरा मुँह तियां जो स्वर्गदूता रै मुँहा सांईयै चमकदार हुजु।