Read Gaddi चेलै रै कम 7 Bible Online

चेलै रै कम 7 - Gaddi bible

चेलै रै कम 7

¹ता महायाजकै पूच्छु, “कै ऐह आरोप सच हिन?”

²स्तिफनुस बलणा लगा, “हे भाईओ, अतै स्याणेओ हुणा। इन्दा पूर्वज अब्राहम हारान नगर मन्ज बसणै थऊँ पैहलै जैहणै मेसोपोटामिया परदेस मन्ज थू; ता महिमामय प्रमात्मैं तैसिओ दर्शन दितै,

³अतै तैस सोगी बल्लू, ‘तू अपणै देशा अतै अपणै कुटुम्ब थऊँ नकैई करी तैस देशा जो गा, जैसिओ मुँ तिजो दसणा’।”

⁴“ता सो मेसोपोटामिया परदेस थऊँ नकैई करी हारान नगर मन्ज गिच्ची बसु। तसेरै पितै री मौती थऊँ बाद प्रमात्मैं तैसिओ तैड़ी थऊँ अणीकरी ऐस देशा मन्ज बसाऊँ जैत मन्ज अबै अहै बसदै हिन,

⁵अतै तैसिओ कुछ भी मीरास बल्कि पैर रखणै रै भी जगह ना दिती, पर फिरी भी प्रमात्मैं प्रतिज्ञा करी की अऊँ ऐह देश तेरै अतै तेरै बाद तेरै वंश रै हत्थै करी दिला; बल्कि तैस टैमैं तैस बलै कोई औलाद भी ना थी।

⁶प्रमात्मैं ईयां जो ऐह भी बल्लू, ‘तेरी औलादी रै मणु पराऐ देशा मन्ज परदेसी भोलै, अतै तैड़ी रै मणु तियां सो दास बणाणा, अतै चंऊर सौ साला तक दुख दिणा।’

⁷फिरी प्रमात्मैं बल्लू, जैसा जाति रै सो दास भूणै, तियां जो मुँ दण्ड़ दिणा, अतै ऐत थऊँ बाद तियां जो तैस देशा थऊँ निकळी करी ऐस देशा मन्ज ही मेरी पूजा करनी हा।

⁸अतै प्रमात्मैं अब्राहम सोगी खतना करनै री प्रतिज्ञा करी; अतै ऐसी हालति मन्ज इसहाक पैदा भूआ अतै अठुऐं दिन तसेरा खतना करू, इसहाक थऊँ याकूब अतै याकूब थऊँ बारह कुलपति पैदा भुएै।”

⁹यूसुफ रै बड़ै भाईये तैस सोगी बैर रखी करी तैसिओ मिस्त्र देशा जो गाणैवाळै रै हत्थै गुलाम बणनै तांयै बेची दिता। पर प्रमात्मां तैस सोगी थू,

¹⁰प्रमात्मैं यूसुफ रै सब क्‍लेशा जो छुड़ाईकरी मिस्त्र रै राजा फिरौन री नजरा मन्ज खरा ठहराऊ अतै अक्ल दिती, राजा फिरौनै तैसिओ पूरै मिस्त्र देश पर अतै अपणै घरानै रा हाक्म बणाई दिता।

¹¹जैहणै यूसुफ राज्यपाल थू ता पूरै मिस्त्र अतै कनान देशा पुर अकाल पैऊ जैत थऊँ भारी क्‍लेश भूआ, अतै इन्दै पूर्वजा जो अंन ना मुळदा थू।

¹²पर याकूबे ऐह हुणी करी की मिस्त्र मन्ज अनाज हा ता यूसुफ रै बड़ै भाई जो पैहली बरी भैजु।

¹³दूई बरी जैहणै सो फिरी अंन लैणा गै ता, अप्पू ही यूसुफ अपणै भाई जो अपणै बारै मन्ज दस्सु अतै यूसुफ रै परिवार रै बारै मन्ज फिरौन जो पता लगी गो।

¹⁴ता यूसुफ अपणै पितै याकूब अतै अपणै पूरै कुटुम्ब जो जैड़ै पच्हत्तर मणु थियै, हैदी भैजु।

¹⁵ता याकूब मिस्त्र मन्ज गो अतै तैड़ी रैह ता सो अतै इन्दै पूर्वज मरी गै।

¹⁶तंयारी लाशा शकेम शहर मन्ज पुजाई करी तैहा कब्र मन्ज रखी, जैतिओ अब्राहमे चाँदी दिकरी शकेम मन्ज हमोर री औलादी थऊँ खरीदी लैऊरा थू।

¹⁷पर जैहणै तैसा प्रतिज्ञा रै पूरै भूणै रा टैमं आ जैड़ी प्रमात्मैं अब्राहम सोगी करूरी थी, ता मिस्त्र मन्ज सो मणु बदी गै अतै मतै सारै भूच्ची गै।

¹⁸ता मिस्त्र मन्ज दुआ राजा भूआ जैडा यूसुफ जो ना जाणदा थू।

¹⁹तिनी इन्दी जाति सितै चलाकी सितै ईना व्यवहार करू कि माता पिता जो अपणै दब्बू जो फैंकी दिणा पैऊँ कि सो जिन्दै न रैहन।

²⁰तैस टैमैं मूसा पैदा भूआ। सो प्रमात्मैं री नजरा मन्ज बड़ा ही छैळ थू। सो त्राई महीनै तक अपणै पितै रै घरा मन्ज पळू।

²¹जैहणै फैंकी दिता ता फिरौन री कूल्ळिये तैसिओ चुकु, अतै अपणा पुत्र करीके पाळू।

²²मूसा जो मिस्त्र देशा री पूरी विद्या पढ़ाई गई, अतै ऐह गल्ल बात करनै अतै कर्मा दूनी मन्ज ही सामर्थी थू।

²³जैहणै मूसा चाळी साला रा भुआ, ता तसेरै मना मन्ज आ कि अपणै इस्त्राएली भाई सोगी मुलाकात करू।

²⁴तिनी अक्की इस्त्राएली मणु पुर अन्याय भुन्दा हेरी करी तैसिओ बचाऊ, अतै तैस मिस्त्री मणु जो मारी करी बदला लैऊ।

²⁵तिनी सोचु की तसेरै भाई समझणा कि प्रमात्मैं तसेरै हत्था सितै मिस्त्र री गुलामी थऊँ तंयारा उद्धार करना, पर सो ना समझै।

²⁶दूये दिन जैहणै सो अप्पू मन्ज लड़ना लगुरै थियै, ता सो तैड़ी आ ता सो ऐह बली करी तंयारा मेल कराणा लगा, “हे मणुओ, तुहै ता भाई भाई हिन, अक्की दूये पुर कजो अन्याय करदै हिन?”

²⁷पर जैडा अपणै पड़ेही पुर अन्याय करू करदा तिनी तैसिओ ऐह बली करी फेरी दिता, “तिजो कुणी असु पुर हाक्म अतै न्याय करनै बाळा बणाऊँ हा?

²⁸कै जिंआं तैंई मिस्त्री जो मारूआ मिन्जो भी मारी दिणा चाहन्दा?”

²⁹ऐह गल्ल हुणी करी मूसा नह्ही गो अतै मिद्दान देशा मन्ज परदेसी बणी करी रैहणा लगा, अतै ऐड़ी तसेरै दाई पुत्र पैदा भुएै।

³⁰जैहणै पूरै चाळी साल बीती गै, ता अक्क स्वर्गदूतै सिनै पहाड़ा रै बियावान मन्ज जळदै-जळदै झिन्ड़ा मन्ज तैसिओ दर्शन दितै।

³¹मूसा ऐस दर्शना हेरी करी हैरान भूआ, अतै जैहणै सो तैस झिन्ड़ा जो हेरनै तांयें सो नेड़ै गो, ता प्रभु रा ऐह शब्द हुणु,

³²“अऊँ तेरै पूर्वज, अब्राहम, इसहाक अतै याकूब रा प्रमात्मां हा,” तैहणै मूसा कम्मी नकैऊ, ऐड़ी तक कि तैसिओ हेरनै री भी हिम्मत ना रैई।

³³ता प्रभुऐ तैसिओ बल्लू, “अपणै पैरा री जुटै जो उतारी दे, क्ओकि जेहा जगह तू खडूरा, सो पवित्र जगह हा।

³⁴मैंई सच मन्ज अपणै मणु री जैड़ै मिस्त्र मन्ज हिन, बुरी दशा हेरी हा; तंयारी आह अतै तंयारा रूणा हुणआ ठेरैतांये तियां जो छुड़ानै तांयें ओसी आ। अबै अई तिजो मुँ मिस्त्र मन्ज भैजणा।”

³⁵जैस मूसा जो तिन्यै ऐह बली करी नकारूरा थू, “तिजो कुणी असु पुर हाक्म अतै न्याय करनै बाळा बणाऊरा?” तैस जो ही प्रमात्मैं हाक्म अतै छुड़ाणैवाळा बणाऊरा, तैस स्वर्गदूता रै द्धारा जिनी तैसिओ झाड़ी मन्ज दर्शन दितुरा थू।

³⁶ऐह मणु मिस्त्र अतै लाल समुंद्र मन्ज अतै बणा मन्ज चाळी साला तक चमत्कार अतै सामर्थ रै कम दस्सी दस्सी करी तियां जो कड़ी लेई आ।

³⁷ऐह सो ही मूसा हा, जैसिओ इस्त्राएली बल्लू, “प्रमात्मैं तून्दै भाई थऊँ तूसु तांयें मिन्जो सांईयै अक्क भविष्‍यवक्ता उठाणा।”

³⁸ऐह सो ही मूसा हा जैड़ा इन्दै पूर्वजा सोगी बियावान मन्ज आक अगुवा थू अतै सो बणा मन्ज पूर्वजा सोगी इकट्ठै थियै, तैसिओ ही सिनै पहाड़ा पुर जिन्दै बचन मुळै अतै तिनी असु तिकर पुजायै।

³⁹पर इन्दै पूर्वजै तसेरी ना मनी, बल्कि तैसिओ हटाईकरी अपणै मना जो मिस्त्र री कनारी ही फेरू,

⁴⁰अतै मूसा रै भाई हारून सोगी बल्लू, “असु तांयें अक्क देवता बणा, जैडा इन्दै अगो अगो चला, क्ओकि ऐह मूसा जैडा असिओ मिस्त्र थऊँ कड़ी के लैईआ, अहै ना जाणदै तैसिओ कै भूआ?”

⁴¹तियां दिना मन्ज तियैं अक्क बछड़ै री मूर्ति बणाई करी बलि चढ़ाई, अतै अपणै हत्था रै कम्मा मन्ज मगन भूणा लगै।

⁴²ता प्रमात्मैं तियां थऊँ मुँह मोडु अतै छड़ी दिता, कि सो अम्बरा रै सूरज, चाँद अतै तारै री पूजा करन, जिंआं कि भविष्‍यवक्ता री कताबा मन्ज लिखुरा, “हे इस्त्राएल रै मणुओ, कै तुहै बियावान मन्ज चाळी साला तिकर पशु री बलि या अन्नबलि मिन्जो चढ़ान्दै हिन”?

⁴³“तुहै मोलेक देवता री मूर्ति तम्बू मन्ज अतै रिफान देवता रै तारै जो लेई फिरदै हिन, मतलब तियां मूर्ति जो जैड़ी तुहै पूजा करनै जो बणाऊरी थी। ठेरैतांये मुँ तुसिओ बेबीलोन थऊँ पार नी करी बसाणा।”

⁴⁴“प्रमात्मैं री हजुरी रा तम्बू[4] बियावान मन्ज इन्दै पूर्वजा रै मन्जै थू, जिंआं प्रमात्मैं ठहराऊरा अतै मूसा सोगी बलुरा, ‘जैडा ईच्ची करी तैंई हेरूरा, तठेरै अनुसार ऐतिओ बणा’।”

⁴⁵कुछ टैमां थऊँ बाद तैस तम्बू जो इन्दै पूर्वज पूराणै टैमां मन्ज पाई करी यहोशू सोगी ऐड़ी जो लेई आये; जैस टैमैं तिन्यै तियां गैर यहूदी पुर अधिकार पाऊ, जिंआं जो प्रमात्मैं इन्दै पूर्वजा रै सामणै थऊँ कड़ी दिता, अतै सो तम्बू राजा दाऊद रै टैमां तक रैऊ।

⁴⁶दाऊद पुर प्रमात्मैं कृपा करी, दाऊदे प्रमात्मैं सोगी बिनती करी कि सो याकूब रै प्रमात्मैं तांयै अक्क डेरा बणाई सका, जैड़ी सब इस्त्राएली मणु प्रमात्मैं री आराधना करी सकन।

⁴⁷पर प्रमात्मैं दाऊद रै पुत्र सुलैमान जो मन्दर बणाणै तांई बल्लू कि सो मणु प्रमात्मैं री आराधना करन।

⁴⁸पर परमप्रमात्मां हत्था रै बणाऊरै मन्दर मन्ज ना रैहन्दा, जिंआं कि यशायाह भविष्‍यवक्तै बलुरा,

⁴⁹“ ‘प्रभु बलदा, स्वर्ग मेरा सिंहासन अतै धरती मेरै पैरा री चौकी हा, मिन्जो तांयें तूसु कस तरीकै रा मन्दर बणाणा? अतै मेरै आराम री कुण जिनी जगह भुणीआ?

⁵⁰कै ऐह सब चिजा मेरै हत्था री बणाऊरी ना हिन?’ ”

⁵¹“हे हठिलै, अतै मना थऊँ अणमन मणुओ, तुहै सदा पवित्र आत्मा रा विरोध करदै हिन। जिंआं तून्दै पूर्वज करदै थियै, तियां ही तुहै भी करदै हिन।

⁵²भविष्‍यवक्ता मन्ज कस जो तून्दै स्याणै ना सताऊरा? तिन्यै तैस धर्मी रै ईणै रा अर्थात यीशु रै संदेश दिणैबाळै जो पूराणै टैमां मन्ज ही मारी दिता; अतै अबै तुहै भी तैसिओ पकड़ाणैवाळै अतै मरवाई दिणैबाळै भुएै हिन।

⁵³तुहै स्वर्गदूता द्धारा ठहराऊरी व्यवस्था ता पाई, पर तठेरा पालन ना करू।”

⁵⁴ऐह सब गल्ला हुणी करि सो यहूदी अगुवै जळी नकैऐ अतै दन्दा पीणा लगै।

⁵⁵पर तिनी पवित्र आत्मा सितै भरी करी स्वर्गा री कनारी हेरू अतै प्रमात्मैं रा तेज अतै यीशु जो प्रमात्मैं री सज्जी कनारी खडूरा हेरी करी

⁵⁶बल्लू, “हेरा, अऊँ स्वर्गा जो खुलुरा अतै मणु रै पुत्रा जो प्रमात्मैं री सज्जी कनारी खडूरा हेरू करदा।”

⁵⁷ता तिन्यै जोरा सितै बक्की करी अपणै कन बन्द करी लै कि तसेरी ना हुणन, अतै अक्क सोगी तैस पुर झपटी पै;

⁵⁸अतै तैसिओ यरूशलेम नगरा थऊँ बाहर कड़ी करी तैस जो पत्थर मारना लगै। गवाहै तसेरा लाऊरा चोळा शाऊल नां रै अक्की जवाना रै पैरा बलै उतारी करी रखी दिता।

⁵⁹सो स्तिफनुस पुर पत्थर मारना लगै, अतै सो ऐह बली करी प्रार्थना करू करदा थू, “हे प्रभु यीशु, मेरी आत्मा जो ग्रहण कर।”

⁶⁰फिरी घुटनै टेकीकरी जोरा सितै बल्लू, “हे प्रभु, इन्या जो ऐस पापा री सजा मत दिन्दा।” अतै ऐह बली करी सो मरी गो।