Read Gaddi चेलै रै कम 8 Bible Online

चेलै रै कम 8 - Gaddi bible

चेलै रै कम 8

¹शाऊल स्तिफनुस रै कत्ला थऊँ सहमत थू। तैस दिन ही यरूशलेम री कलीसिया मन्ज बड़ा उपद्रव शुरू भूच्ची गो अतै प्रेरिता जो छड़ी करि बाकी काफी संख्या मन्ज मणु यहूदिया अतै सामरिया परदेस जो तितर-बितर भूच्ची गै।

²कुछ भक्तै स्तिफनुस जो कब्र मन्ज रखू अतै तैस तांयें बड़ा विलाप करू।

³शाऊल कलीसिया जो उजाडु करदा थू, अतै घरा-घरा मन्ज गिच्ची करी मर्दा अतै जनानी जो घसीटी घसीटी के जेला मन्ज पाऊ करदा थू।

⁴जैड़ै विस्वासी तितर-बितर भच्छुरै थियै, सो सुसमाचार हुणादै फिरना लगै,

⁵फिलिप्पुस सामरिया मन्ज गिच्ची करी मणु जो मसीह रा प्रचार करना लगा।

⁶जैड़ी गल्ला फिलिप्पुसे बलुरी थी तियां मणुऐ हुणी करी जैड़ै चमत्कार सो दसदा थू तियां जो हेरी करी, अक्क चित भूच्ची करी मन लाऊ।

⁷क्ओकि मती सारी दुष्‍टात्मा जोरा जोरा सितै ऐह बलदी निकळी गई अतै मतै सारै हद्रगीं अतै लंगड़ै ठीक भूच्ची गै

⁸अतै तैस नगरा रै मणु मन्ज बड़ी खुशी छाई गई।

⁹ऐत थऊँ पैहलै तैस नगरा मन्ज शमौन नां रा अक्क मणु थू, जैडा जादू-टोणा करीके सामरिया रै मणु जो हैरान करदा अतै अपणै आपा जो अक्क बड़ा मणु दसदा थू।

¹⁰हल्कै थऊँ लेई करी मोटै तक तैस शहरा रै कई सामरी मणु तसेरा आदर करदै अतै बलदै थियै, “ऐह प्रमात्मैं री सो सामर्थ हा जैड़ी महान कहलान्दी हा।”

¹¹तिनी मतै दिन थऊँ तियां जो अपणै जादू रै कम्मा थऊँ हैरान करी रखूरा थू, ठेरैतांये तैसिओ बड़ा मन्दै थियै।

¹²पर जैहणै तिन्यै फिलिप्पुस पुर विस्वास करू जैडा प्रमात्मैं रै राज्य अतै यीशु मसीह रै नां रा सुसमाचार हुणान्दा थू, ता कै मर्द कै जनानी सब बपतिस्मा लैणा लगै।

¹³ता शमौने भी ऐह सब सुसमाचार हुणी करी विस्वास करू अतै बपतिस्मा लेई करी फिलिप्पुस सोगी रैहणा लगा। ऐह चमत्कार अतै बड़ै-बड़ै हैरानी भरै कम्मा जो हेरी करी हैरान भुन्दा थू।

¹⁴जैहणै यरूशलेम मन्ज रैहणै बाळै प्रेरितै ऐह हुणु कि सामरिया रै मणुऐ प्रमात्मैं रै बचन जो मनी लैऊआ। ता पतरस अतै यूहन्‍ना जो तियां वलै भैजु।

¹⁵तिन्यै गिच्ची करी तियां तांयें प्रार्थना करी कि सो पवित्र आत्मा पान।

¹⁶क्ओकि हालि तिकर पवित्र आत्मा तियां मन्ज कसीये भी ना पाऊरा थू तिन्यै ता सिर्फ प्रभु यीशु मसीह रै नां रा बपतिस्मा लैऊरा थू।

¹⁷ता प्रेरितै तियां पुर हत्थ रखै अतै तिन्यै पवित्र आत्मा पाऊ।

¹⁸जैहणै शमौने ऐह हेरू कि प्रेरिता रै हत्थ रखणै थऊँ पवित्र आत्मा मुळी गान्दीआ, ता तियां जो पैसै दिकरी बलणा लगा,

¹⁹“ऐह अधिकार मिन्जो भी देय्आ, कि जैस कसी पुर हत्थ रखूं सो पवित्र आत्मा पा।”

²⁰पतरसै तैस सोगी बल्लू, “तेरै पैसै तिजो सोगी नष्‍ट भून, क्ओकि तैंई प्रमात्मैं रा दान पैसै सोगी खरीदणै रा विचार करूआ।

²¹ऐसा सेवा मन्ज तेरा कोई हेस्सा निय्आ; क्ओकि तेरा मन प्रमात्मैं री कनारी सचा निय्आ।

²²ठेरैतांये अपणी ऐसा बुराई थऊँ मन फेरी करी प्रभु सितै प्रार्थना कर, भूच्ची सकदा कि तेरै मना रै बुरै विचार माफ करै गान।

²³क्ओकि अऊँ हेरदा कि तू पित्त सांईयै कड़वाहट अतै अधर्म रै बन्धन मन्ज पेऊरा हा।”

²⁴शमौने जवाव दिता, “तुहै मिन्जो तांयें प्रभु सितै प्रार्थना करा कि जैड़ी गल्ला तुहै बली हिन, तियां थऊँ कोई भी मिन्जो पुर ना ईच्ची पैय्आ।”

²⁵अतै ऐह गवाही दिकरी अतै प्रभु रै बचन हुणाई करी यरूशलेम जो फिरी गै, अतै सामरिया रै मतै सारै ग्राँ मन्ज सुसमाचार हुणादै गै।

²⁶फिरी प्रभु रै अक्की स्वर्गदूतै फिलिप्पुस सोगी बल्लू, “उठ अतै दक्षिण री कनारी तैस रस्तै पुर गा, जैडा यरूशलेम थऊँ गाजा शहर जो गान्दा।” ऐह रेगिस्तानी रस्ता हा।

²⁷सो उूठी करी चली पैऊ, अतै कूश देशा रा अक्क मणु ईच्छु करदा थू जैडा किन्‍नर थू अतै कूशियों री राणी कन्दाके रा मंत्री अतै खजांची थू। सो भजन करनै जो यरूशलेम छूरा थू।

²⁸सो अपणै रथा पुर बैहुरा थू, अतै यशायाह भविष्‍यवक्ता री कताबा पढ़दा पढ़दा वापस फिरना लगुरा थू।

²⁹ता पवित्र आत्मै फिलिप्पुस सोगी बल्लू, “नेड़ै गिच्ची करी ऐस रथा सोगी सोगी चल।”

³⁰फिलिप्पुस तसेरी कनारी दौडू, अतै तैसिओ यशायाह भविष्‍यवक्ता री कताब पढ़दै हुणु अतै तैस थऊँ पूछु, “तू जैडा पढ़णा लगुरा कै ऐतिओ समझदा भी हा?”

³¹तिनी बल्लू, “जैहणै तक कोई मिन्जो ना समझा ता मुँ कियां समझणा?” तिनी फिलिप्पुस सोगी बिनती करी कि सो रथा पुर चड़ी करी तैस सोगी बैहा।

³²पवित्रग्रन्था रा जैडा पाठ सो पढ़णा लगुरा थू सो ऐह थू; “सो भैड़ा सांईयै बलि भूणै तांयें पजाई गो, अतै जिंआं मेम्ना भैड़ा मुनणैवाळै रै सामणै चुपचाप रैहन्दा, तियां ही तिनी भी अपणा मुँह ना खोलू।

³³तसेरी दीनता मन्ज तसेरा न्याय ना भूच्ची सकू। तसेरै टैमां रै मणु रा वर्णन कस करना? क्ओकि धरती थऊँ तसेरै प्राण चुकी लैऊरै हिन।”

³⁴ता किन्‍नर फिलिप्पुस थऊँ पुछणा लगा, “अऊँ तिजो सितै बिनती करदा मिन्जो दस कि भविष्‍यवक्ता कसेरै बारै मन्ज बल्लू करदा, अपणै या कसकि होरी रै बारै मन्ज?”

³⁵ता फिलिप्पुस बलणा लगा अतै पवित्रग्रन्थ रा शुरू थऊँ यीशु रा सुसमाचार हुणाऊ। ता तिनी ऐह सब हुणी करी यीशु पुर विस्वास करू।

³⁶रस्तै मन्ज चलदै चलदै सो अक्की पाणी बाळी जगह पुजै। ता किन्‍नर बलणा लगा, “हेर ऐड़ी पाणी भी हा, अबै मिन्जो बपतिस्मा लैणै थऊँ कुण रोकी सकदा।”

³⁷फिलिप्पुसे बल्लू, “अगर तू पूरै मना सोगी विस्वास करदा ता लेई सकदा।” तिनी बल्लू “अऊँ विस्वास करदा कि यीशु मसीह प्रमात्मैं रा पुत्र हा।”

³⁸ता तिनी रथ खड़ा करनै रा हूक्म दिता, अतै फिलिप्पुस अतै किन्‍नर दोनो पाणी मन्ज चली गै, अतै तिनी किन्‍नर जो बपतिस्मा दिता।

³⁹जैहणै सो पाणी थऊँ नकैई करी बाहर आये, ता प्रभु री आत्मा फिलिप्पुस जो चुकी लेई गई, अतै किन्‍नर फिरी सो ना हेरू, अतै सो खुशी मनदां अपणै रस्तै मन्ज चली गो।

⁴⁰फिलिप्पुस अशदोद शहर मन्ज ईच्ची निकळू, अतै जैहणै तक सो कैसरिया नगर मन्ज ना पुजु, तैहणै तक नगर नगर सुसमाचार हुणान्दा गो।