Read Gaddi रोमियो 10 Bible Online

रोमियो 10 - Gaddi bible

रोमियो 10

¹हे विस्वासी भाईओ, मेरै मना री अभिलाषा अतै प्रमात्मैं सितै मेरी प्रार्थना ऐह हा कि मेरै अपणै यहूदी मणु उद्धार पान।

²अऊँ तंयारी गवाही दिन्दा कि सो प्रमात्मैं री ही धुन मन्ज रैहन्दै हिन, पर तियां जो समझ निय्आ कि प्रमात्मैं री सेवा कियां करनी हा।

³क्ओकि सो प्रमात्मैं री नजरा मन्ज कियां धर्मी बणना तैत थऊँ अनजाण भूच्ची करी अपणै ही तरीकै कियां धर्मी बणना तठेरा यत्न करदै।

⁴क्ओकि मसीह तैस मकसद जो पुरा करू जैत तांयै व्यवस्था दितुरी थी, अबै जैड़ा भी मसीह पुर विस्वास करदा सो प्रमात्मैं री नजरा मन्ज धर्मी बणी गान्दा हा।

⁵क्ओकि मूसा री व्यवस्था मन्ज ऐह लिखुरा कि अक्क मणु जो प्रमात्मैं री नजरा मन्ज धर्मी बणना हा ता तैस जो हर आज्ञा रा पालन करना पैणा।

⁶प्रमात्मैं री नजरा मन्ज धर्मी बणनै तांयै विस्वास रा तरीका ऐह हा कि “तू अपणै मना मन्ज ऐह मत बलदा कि स्वर्गा मन्ज कस चढ़णा? (मतलब मसीह जो धरती पुर लैईणै तांयै),

⁷या ऐह भी मत बलदा ‘अधोलोक मन्ज कस गाणा?’ (अर्थात मसीह जो मरूरै थऊँ जिआई करी लैईणै तांयें!)”

⁸पर पवित्रग्रन्थ ऐह बलदा हा कि : “तुहै ऐस संदेश जो अपणै लवड़ा सितै स्वीकार करी सकदै हिन, अतै अपणै दिला मन्ज ग्रहण करी सकदै हिन।” ऐह सो ही विस्वास रा बचन हा, जैडा अहै प्रचार करदै हिन।

⁹अगर तू अपणै यीशु जो प्रभु जाणी करी सबी रै सामणै मना, अतै अपणै मना मन्ज विस्वास करा कि प्रमात्मैं तैसिओ मरूरै थऊँ जीयाऊ, ता तुद पक्का उद्धार पाणा।

¹⁰क्ओकि प्रमात्मैं री नजरा मन्ज धर्मी बणनै तांयै मना थऊँ विस्वास करया गान्दा हा, अतै उद्धार तांयें मुँहा थऊँ अंगीकार करया गान्दा।

¹¹क्ओकि पवित्रग्रन्थ ऐह बलदा कि, “जैस कसी तैस पुर विस्वास करना तैस कदी लज्जित ना भूणा।”

¹²यहूदी अतै गैर यहूदी मन्ज कुछ भेद निय्आ, ठेरैतांये कि सो सबी रा प्रभु हा अतै अपणै सब नां लैणैबाळै तांयें उद्धार हा।

¹³क्ओकि “जैस कसी प्रभु रा नां लैणा, तैस उद्धार पाणा।”

¹⁴मसीह जैस पुर तिन्यै विस्वास ना करू, सो तसेरा नां कियां लैन? अतै जसेरै बारै मन्ज हुणुरा निय्आ तैस पुर कियां विस्वास करन? अतै प्रचारक रै बिना कियां हुणन?

¹⁵अगर भैजै ना गान, ता कियां प्रचार करन? जिंआं पवित्रग्रन्था मन्ज लिखुरा, “तंयारै पैर कै ही सुहावनै हिन, जैड़ै खरी गल्ला रा सुसमाचार हुणादै हिन!”

¹⁶पर सबीये तैस सुसमाचार पुर विस्वास ना करू। यशायह भविष्‍यवक्ता बलदा, “हे प्रभु, कुणिए भी इन्दै सुसमाचार पुर विस्वास ना करू।”

¹⁷ठेरैतांये विस्वास ता भुन्दा जैहणै तुहै संदेश जो हुणदै हिन, अतै ऐह संदेश मसीह रा बचन हा।

¹⁸पर अऊँ बलदा हा, यहूदी मणुऐ मसीह रा बचन हुणुरा, हाँ जरूर हुणुरा, क्ओकि पवित्रग्रन्था मन्ज लिखुरा हा; “तंयारै स्वर पूरी धरती पुर, अतै तंयारै बचन संसार रै अन्त तक पुजी गै हिन।”

¹⁹अऊँ फिरी बलदा, इस्त्राएली मसीह रै बचना जो जाणदै थियै। पैहलै ता प्रमात्मैं मूसा भविष्‍यवक्ता रै द्धारा ऐह बल्लू; “तूसु यहूदी रै मना मन्ज मुँ जलन पैदा करनिआ; जैहणै तूसु गैर यहूदी तांयै मेरा प्रेम हेरना। मुँ तून्दै दिला मन्ज गुस्सा पैदा करना तियां मूर्ख गैर यहूदी मणु रै द्धारा।”

²⁰फिरी यशायाह भविष्‍यवक्ता बड़ी हिम्मत सोगी ऐह बल्लू कि प्रमात्मैं ऐह बलदा हा; “जैड़ै मिन्जो ना तोपदै थियै, तिन्यै मिन्जो पाई लैऊ; अतै जैड़ै मिन्जो पूछदै भी ना थियै, तियां जो अऊँ हुजुआ।”

²¹पर इस्त्राएल रै मणु रै बारै मन्ज प्रमात्मैं यशायाह भविष्‍यवक्ता रै द्धारा ऐह बल्लू; “मैंई पुरा दिन अपणै हत्थ अक्क आज्ञा ना मनणैवाळी अतै विवाद करनैवाळी प्रजा री तरफ खलारी रखै।”