Read Gaddi रोमियो 13 Bible Online

रोमियो 13 - Gaddi bible

रोमियो 13

¹हरेक मणु प्रधान अधिकारी रै अधीन रेय्आ, क्ओकि सब अधिकार प्रमात्मैं री तरफा थऊँ हिन; अतै जैड़ै अधिकारी हिन, सो प्रमात्मैं रै द्धारा ही ठहराऊरै हिन।

²ठेरैतांये जैडा कोई अपणै अधिकारी री आज्ञा रा पालन ना करदा, सो प्रमात्मैं री व्यवस्था रा विरोध करदा हा, अतै विरोध करनैवाळै दण्ड पाणा।

³अगर तुहै भलै कम करदै हिन ता तुसिओ अधिकारी थऊँ डरनै री जरूरत निय्आ, पर अगर तुहै बुरै कम करदै हिन ता डरनै री जरूरत हा। अगर तू हाकमा थऊँ निडर रैहणा चाहन्दा, ता खरा कम कर, ता तैस तेरी सराहणा करनी हा।

⁴क्ओकि सो तेरी भलाई तांयें प्रमात्मैं रा सेवक हा, पर अगर तू बुराई करा ता डरा, क्ओकि तैस सेवका प्रमात्मैं रै क्रोधा रै अनुसार बुरै कम करनैवाळै जो दण्ड दिणा।

⁵ठेरैतांये तुसिओ अधिकारी रै अधीन रैहणा हा ना सिर्फ ठेरैतांये कि सजा थऊँ बची सकन, पर ठेरैतांये भी कि तुहै अपणै विवेक जो निर्दोष रखी सकन।

⁶ठेरैतांये चुंगी भी देय्आ क्ओकि शासन करनैवाळा प्रमात्मैं रा सेवक हा अतै सदा ऐस ही कम्मा मन्ज लगी रैहन्दा हा।

⁷ठेरैतांये हरेक जो देय्आ, जैड़ा तियां तांयै उचित हा, होर जैड़ा सरकार रा चन्दा सो सरकार जो देय्आ; जैसिओ चुंगी चहिन्दा, तैसिओ चुंगी देय्आ, जैस थऊँ डरना चहिन्दा, तैस थऊँ डरा; जैसेरा आदर करना चहिन्दा, तसेरा आदर करा।

⁸अप्पू मन्ज प्रेम जो छड़ी होर कसी गल्ला मन्ज कसी रै कर्जदार मत बणा; क्ओकि जैडा दूये सोगी प्रेम रखदा, तिनी ही व्यवस्था पूरी करी हा।

⁹क्ओकि मूसा री व्यवस्था मन्ज बड़ी सारी आज्ञा हिन जियां कि; “व्यभिचार ना करना, हत्या ना करना, चोरी ना करना, लालच ना करना,” अतै इन्या जो छड़ी होर कोई भी आज्ञा भोआ ता सबी रा सारांश ऐसा आज्ञा मन्ज ही हा कि, “अपणै पड़ेही सोगी अप्पू जिन्‍ना प्रेम रखा।”

¹⁰प्रेम पड़ेही री कुछ भी बुराई ना करदा, ठेरैतांये प्रेम रखणा व्यवस्था जो पुरा करना हा।

¹¹अबै इन्या करना होर भी जरूरी हा क्ओकि तुहै जाणदै हिन कि काफी देर भूच्ची गच्छुरी हा अतै टैमं घट हा। असिओ जागणा हा क्ओकि इन्दा उद्धार जैहणै थऊँ अहै विस्वास करू तैहणै थऊँ होर भी नजदीक हा।

¹²जियां राती थऊँ बाद दिन निकळदा तियां ही इन्दा ऐस बुरै संसार मन्ज जिणै रा टैमं लगभग खत्म भूणै बाळा हा, अतै मसीह रै दोबारा ईणै रा टैमं नेड़ै हा। ठेरैतांये अहै अन्धकार रै कम्मा जो छड़ी करी ज्योती रै हथियार बनी लैन।

¹³अहै ऐसै मणु सांईयै जीन जैड़ै अन्धकार मन्ज ना पर उजालै मन्ज जिन्दगी वितांदै हिन, जैड़ै मणु सिधी चाल चलदै, अतै लाल-क्रिडा, पी करी, व्यभिचार करीके, लुचपन मन्ज अतै ना झगड़ै अतै डाह मन्ज रैहन्दै हिन।

¹⁴बल्कि तुसिओ प्रभु यीशु मसीह सांईयै बनणा ताकि मणु हेरी सकन कि सो किना हा, अतै पापी स्वभाव री अभिलाषा जो पुरा करनै री कोशिश मत करा।