Read Gaddi रोमियो 15 Bible Online

रोमियो 15 - Gaddi bible

रोमियो 15

¹अगर इन्दा विस्वास मजबुत हा ता असिओ तियां विस्वासी सोगी धीरज सोगी व्यवहार करना चहिन्दा जैड़ा विस्वास मन्ज कमजोर हिन। असिओ अपणै आपा जो ना पर होरी जो खुश करनै री कोशिश करना चहिन्दी हा।

²असु मन्ज हरेक अपणै विस्वासी भाई जो खुश करा अतै तंयारी मदद करा ताकि विस्वास मन्ज उन्‍नति भोआ।

³क्ओकि मसीह अपणै आपा जो खुश ना करू, पर जिंआं पवित्रग्रन्था मन्ज लिखुरा हा; “तेरै बुराई करनैवाळै मेरी भी बुराई करी हा।”

⁴जैतनी गल्ला पैहलै थऊँ पवित्रग्रन्था मन्ज लिखुरी हिन सो इन्दी शिक्षा तांयें लिखुरी हिन कि अहै धीरज अतै पवित्रग्रन्थ रै प्रोत्साहन द्धारा उम्मीद रखन।

⁵अऊँ प्रार्थना करदा हा कि धीरज अतै शान्ती रा दाता प्रमात्मां तुन्दी मदद करा कि तुहै अक्की दूये सोगी शान्ती मन्ज मसीह यीशु रा अनुकरण करी सकन।

⁶ताकि तुहै सब अक्क सोगी इन्दै प्रभु यीशु मसीह रै पिता प्रमात्मैं री स्तुति करन।

⁷ठेरैतांये, जियां प्रमात्मैं मसीह री महिमा तांयें तुसिओ ग्रहण करूरा, तियां ही तुहै भी अक्की दूये जो ग्रहण करा।

⁸ठेरैतांये याद करा कि मसीह यहूदी रा सेवक बणी करी आ ऐह दर्शाणै तांयै कि प्रमात्मां अपणै वायदै रै प्रति सचा हा जैड़ा तिनी तंयारै पूर्वजा सोगी करू।

⁹अतै गैर यहूदी भी दया री वजह थऊँ प्रमात्मैं री स्तुति करन; जिंआं पवित्रग्रन्था मन्ज लिखुरा हा, “ठेरैतांये मुँ गैर यहूदी मन्ज तेरी स्तुति करनी हा, अतै तेरै नां रै भजन गाणै।”

¹⁰फिरी बल्लू, “हे सब गैर यहूदी मणुओ, प्रमात्मैं री प्रजा सोगी खुशी मना।”

¹¹अतै फिरी अक्क होर जगह पवित्रग्रन्था मन्ज लिखुरा; “हे सब गैर यहूदी मणुओ, प्रभु री स्तुति करा; अतै हे राज्य राज्य रै सब मणुओ, तैसिओ सराहा।”

¹²अतै फिरी यशायाह भविष्‍यवक्ता बलदा, “राजा दाऊद रै सिंहासन रा वारिस ईणा, अतै तैस गैर यहूदी पुर राज्य करना, तैस पुर गैर यहूदी उम्मीद रखणीआ।”

¹³अऊँ प्रार्थना करदा हा, प्रमात्मां जैडा उम्मीद रा दाता हा, तुसिओ विस्वास करनै मन्ज बड़ी खुशी अतै शान्ती सितै परिपूर्ण करा, कि पवित्र आत्मा री सामर्थ सितै तुन्दी उम्मीद बददी गच्छा।

¹⁴हे मेरै विस्वासी भाईओ, अऊँ अप्पू तून्दै बारै मन्ज पक्का जाणदा हा कि तुहै भी अप्पू भलाई सितै भरूरै हिन। तुहै इन्या गल्ला जो जाणदै हिन ठेरैतांये तुहै इन्या गल्ला रै बारै मन्ज अक्की दूये जो सखाई सकदै हिन।

¹⁵तांभी करखी-करखी याद दुआणै तांयें तुसिओ जैडा मती हिम्मत करीके लिखु। ऐह तैस अनुग्रह री वजह थऊँ भुआ जैड़ी प्रमात्मैं मिन्जो दितुरी हा।

¹⁶अऊँ गैर यहूदी तांयें मसीह यीशु रा अक्क खास सेवक हा, अऊँ तूसु बलै याजक सांईयै सुसमाचार लेई करी आ कि अऊँ तुसिओ प्रमात्मैं तांयै ग्रहण योग्य बलिदान सांईयै बणाई सकू जैतिओ पवित्र आत्मा पवित्र करूरा।

¹⁷मसीह यीशु री वजह थऊँ अऊँ ऐसा गल्ला मन्ज घमण्ड़ करी सकदा जैड़ी सेवा अऊँ प्रमात्मैं तांयै करदा हा।

¹⁸असल मन्ज मुँ इन्या ही गल्ला रै बारै मन्ज घमण्ड़ करना जैतिओ मसीह मेरै द्धारा करू हा, अतै सो हिन गैर यहूदी जो प्रमात्मैं री कनारी लैईणा अतै मेरै संदेश अतै मेरी जिन्दगी जिणै रै द्धारा।

¹⁹सो चमत्कार अतै अदभुत कम्मा री सामर्थ जो हेरी करी जैड़ै पवित्र आत्मा री सामर्थ सितै मेरै ही द्धारा करै; तैतिओ सो मनी गै। ऐस तरीकै मैंई मसीह रा सुसमाचार यरूशलेम थऊँ लेई करी इल्लुरिकुम तक रा पुरा-पुरा प्रचार करू।

²⁰पर मेरै मना री इच्छा ऐह हा कि जैड़ी जैड़ी मसीह रा नां ना लैऊरा हा, तैठी ही सुसमाचार हुणाऊ ऐसा ना भोआ कि अऊँ तैठिये ही कलीसिया शुरू करू जैड़ी पैहलै थऊँ हा।

²¹पर जिंआं पवित्रग्रन्था मन्ज लिखुरा हा तियां ही भोआ, “जिन्यै कदी तसेरै बारै मन्ज ना हुणुरा, तियां ही हेरना अतै जियें कदी ना हुणुरा सो ही समझन।”

²²क्ओकि अऊँ ऐस तरीकै मसीह रै सुसमाचार हुनाणै तांयै होरी जगह मन्ज गान्दा ररेऊँ ठेरैतांये अऊँ तूसु बलै ईणै थऊँ बार बार रूकी रैऊ।

²³इन्या देशा मन्ज मेरा कम्मा पुरा भूच्ची गोआ, अतै मतै साल इंतजार करनै थऊँ बाद अबै मिन्जो तूसु बलै ईणै री इच्छा हा।

²⁴ठेरैतांये जैहणै मुँ स्पेन देश जो गाणा ता तूसु मितै भुन्दा ईला, क्ओकि मिन्जो उम्मीद हा कि तैहा यात्रा मन्ज तूसु सितै मुलाकात भुणीआ, अतै जैहणै तुन्दी संगति सोगी मेरा जी भरी गला ता तुहै मिन्जो स्पेन री यात्रा तांयै कुछ मदद करैं।

²⁵पर मेरै तूसु बलै ईणै थऊँ पैहलै मिन्जो यरूशलेम गाणा हा तैठिया रै विस्वासी री मदद तांयै।

²⁶क्ओकि मकिदुनिया अतै अखया परदेस रै विस्वासी जो ऐह खरा लगा कि सो यरूशलेम रै गरीब विस्वासी तांयें कुछ दान इकट्ठा करन।

²⁷तिन्यै ऐह खुशी सोगी करू पर सो तंयारै कर्जदार भी हिन, क्ओकि अगर गैर यहूदी तंयारी आत्मिक गल्ला रै भागी भुएै, ता तियां जो भी जरूरी हा कि अपणी धन दौलत सोगी तंयारी सेवा करन।

²⁸ठेरैतांये मुँ तियां जो ऐह दान सौंपी करी तूसु मितै भुन्दा स्पेन जो चली गाणा।

²⁹अतै मिन्जो पक्का पता हा कि जैहणै मुँ तूसु बलै ईणा, ता मसीह असिओ इकट्ठै भूणै पुर आशीष दिणिआ।

³⁰हे विस्वासी भाईओ, इन्दै प्रभु यीशु मसीह रै अतै पवित्र आत्मा रै प्रेम री याद दुआई करी अऊँ तूसु सोगी बिनती करदा कि मिन्जो तांयें प्रमात्मैं सितै प्रार्थना करनै मन्ज मिन्जो सोगी मिलीकरी लौलीन रेय्आ

³¹प्रार्थना करदै रेय्आ कि अऊँ यहूदिया परदेस रै तिन्या मणु थऊँ बची रैऊ जैड़ै प्रमात्मैं री आज्ञा रा पालन ना करदै। ऐसा गल्ला तांयै भी प्रार्थना करा कि तैड़ीआ रै विस्वासी ऐस दान जो खुशी सोगी ग्रहण करी सकन जैड़ा अऊँ यरूशलेम लेई करी चलूरा हा।

³²अऊँ प्रमात्मैं री इच्छा सितै तूसु बलै खुशी सोगी ईच्ची करी आराम करू।

³³अऊँ प्रार्थना करदा हा कि प्रमात्मां जैड़ा शान्ती दिन्दा तूसु सबी सोगी रेय्आ। आमीन।