Read Gaddi रोमियो 2 Bible Online

रोमियो 2 - Gaddi bible

रोमियो 2

¹ठेरैतांये हे दूये पुर दोषलाणैवाळै, तू कोई भी कजो ना भोआ, तिजो बलै कोई बहाना निय्आ। क्ओकि जेहा गल्ला पुर तू दूये पुर दोष लान्दा तैहा ही गल्ला मन्ज अपणै आपा जो भी दोषी ठहरान्दा, ठेरैतांये कि तू जैडा दोष लान्दा अप्पू भी सो ही कम करदा हा।

²अहै जाणदै हिन कि ऐसै-ऐसै कम करनैवाळै प्रमात्मैं री तरफा थऊँ सच्चाई रै अनुसार सजा रै हक्कदार भूणै।

³हे मणु, तू जे ऐसै ऐसै कम करनैवाळै पुर दोष लान्दा अतै अप्पू सो ही कम करदा; तू समझी लै कि तुद भी प्रमात्मैं थऊँ सजा रा हक्कदार भूणा।

⁴तू प्रमात्मैं री दया, सहनशीलता अतै धीरजरूपी धन जो तुच्छ समझदा हा पर ऐह ना समझदा कि प्रमात्मां दया सोगी इंतजार करू करदा कि तू अपणै पापा थऊँ मन फेरा।

⁵पर तू अपणी कठोरता अतै हठिलै मना री वजह थऊँ प्रमात्मैं रै क्रोध रै दिन तांयें, जैत मन्ज प्रमात्मैं रा सचा न्याय प्रकट भूणा, तुद भारी सजा रा हक्कदार भूणा।

⁶प्रमात्मैं हरेक जो तंयारै कम्मा रै अनुसार इनाम दिणा।

⁷प्रमात्मैं तियां जो अनन्त जिन्दगी दिणिआ जैड़ै सुकर्म मन्ज स्थिर रैई करी महिमा, आदर अतै अमरता री खोज करदै हिन।

⁸पर जैड़ै स्‍वार्थी हिन अतै सच्चाई जो ना मन्दै, बल्कि अधर्म रै कम करदै हिन, प्रमात्मैं रा क्रोध अतै कोप तियां पुर पैणा।

⁹अतै क्‍लेश अतै संकट हरेक मणु रै प्राणा पुर जैडा बुरा करदा ईणा, पैहलै यहूदी पुर फिरी गैर यहूदी पुर;

¹⁰पर महिमा अतै आदर अतै शान्ती हरेक जो मुळना, जैडा भला करदा, पैहलै यहूदी जो फिरी गैर यहूदी जो।

¹¹क्ओकि प्रमात्मां कसी रा भी पक्षपात ना करदा।

¹²ठेरैतांये गैर यहूदी जिन्यै बिना मूसा री व्यवस्था पाऐ पाप करूरा, तियां बिना व्यवस्था ही प्रमात्मैं थऊँ सजा पाणिआ; अतै यहूदी जिन्यै व्यवस्था पाई करी पाप करूरा, तियां जो व्यवस्था रै अनुसार दण्ड मिलणा।

¹³क्ओकि प्रमात्मैं री सब व्यवस्था रै हुणनैबाळै धर्मी ना हिन, पर व्यवस्था पुर चलनैवाळै धर्मी ठहराये गाणै।

¹⁴फिरी जैहणै गैर यहूदी मणु जिंआं बलै मूसा री व्यवस्था निय्आ, स्वभाव थऊँ ही व्यवस्था जो मन्दै हिन, ऐत थऊँ ऐह सावित भुन्दा कि तंयारै दिला मन्ज अक्क व्यवस्था हा।

¹⁵तंयारा व्यवहार ऐह दसदा हा कि मूसा री व्यवस्था जैड़ा सखांदी हा सो तंयारै दिला मन्ज लिखुरी हा, तंयारा विवेक भी सावित करदा कि ऐह सच हा क्ओकि तंयारै विचार कदी तियां जो दोषी ठहरान्दै हिन अतै कदी निर्दोष।

¹⁶ठेरैतांये तैस सुसमाचार रै अनुसार जठेरा अऊँ प्रचार करदा ऐसा भूणा तैस दिन जैहणै प्रमात्मैं यीशु मसीह रै द्धारा मणु री गुप्त गल्ला रा न्याय करना।

¹⁷अगर तू यहूदी कहलान्दा अतै व्यवस्था पुर भरोसा रखदा हा अतै ऐहा गल्ला पुर भी घमण्ड़ करदा हा कि तू प्रमात्मैं रा खास मणु हा,

¹⁸तू जाणदा हा कि प्रमात्मां तिजो थऊँ कै चाहन्दा हा अतै कै सही हा क्ओकि तैंई मूसा री व्यवस्था थऊँ शिक्षा पाई हा।

¹⁹तिजो ऐसा गल्ला रा भरोसा हा कि तू गैर यहूदी जो प्रमात्मैं री सच्चाई अतै जैड़ै प्रमात्मैं जो ना जाणदै तियां जो भी प्रमात्मैं रै बारै मन्ज दसदा हा।

²⁰तिजो ऐसा गल्ला रा भरोसा हा कि तू तियां मणु जो सखाई सकदा हा जैड़ै प्रमात्मैं रै बारै मन्ज मूर्खता री गल्ला पुर भरोसा करदै हिन, अतै जैड़ै बच्चै सांईयै हिन क्ओकि सो प्रमात्मैं रै बारै मन्ज कुछ ना जाणदै। तुसिओ इन्या सबी गल्ला रा भरोसा हा क्ओकि तूसु बलै व्यवस्था हा जैड़ी प्रमात्मैं रै बारै मन्ज सच्चाई तुसिओ सखांदी हा।

²¹ता तू दूये जो जैड़ी व्यवस्था सखांदा हा, अपणै आपा जो ना सखांदा? तू चोरी ना करनै रै उपदेश दिन्दा हा, पर ऐह दुखा री गल्ल हा तू अप्पू ही चोरी करदा हा।

²²तू जे बलदा, “व्यभिचार ना करना” पर ऐह दुखा री गल्ल हा कि तू अप्पू ही व्यभिचार करदा हा। तू जैडा बलदा कि मूर्तिपूजा मत करा, पर तू अप्पू ही मन्दरा जो लूटदा हा।

²³तू जैडा ऐसा गल्ला रा घमण्ड़ करदा हा कि तू प्रमात्मैं री व्यवस्था जो जाणदा हा, पर ऐह दुखा री गल्ल हा कि तुहै तैहा ही व्यवस्था ना मनी करी प्रमात्मैं रा अनादर करदै हिन।

²⁴“क्ओकि तूसु यहूदी री वजह थऊँ ही गैर यहूदी मन्ज प्रमात्मैं री नां री निन्दा करी गान्दीआ,” जिंआं पवित्रग्रन्था मन्ज लिखुरा भी हा।

²⁵अगर तू व्यवस्था पुर चला ता खतनै थऊँ लाभ ता हा, पर अगर तू व्यवस्था जो ना मना ता तेरा खतना करनै रा कोई फायदा निय्आ।

²⁶ठेरैतांये अगर गैर यहूदी व्यवस्था रा पालन करा ता तसेरी गिणती प्रमात्मैं रै मणु मन्ज करी गाणीआ।

²⁷गैर यहूदी जैडा शरीर रा खतना कराये बिना व्यवस्था रा पुरा पालन करदा हा। तैस ही यहूदी रा न्याय करना, क्ओकि तुहै मूसा री व्यवस्था पाई करी अतै खतना कराई करी भी व्यवस्था रा पालन ना करदै हिन।

²⁸क्ओकि यहूदी सो ना हिन जैड़ै जन्मजात यहूदी हिन; अतै सचा यहूदी भी सो निय्आ जसेरा खतना भच्छुरा हा।

²⁹पर सचै यहूदी सो हिन जंयारै मना जो प्रमात्मैं बदलु हा; अतै खतना करनै थऊँ सो असिओ ग्रहण ना करदा बल्कि अपणी पवित्र आत्मा द्धारा इन्दै स्वभाव जो बदली करी असिओ ग्रहण योग्य बणांदा। अगर होर मणु इन्या सचै मणु री तरीफ ना करन, ता प्रमात्मैं इन्यारी तरीफ करनी हा।