Read Gaddi रोमियो 5 Bible Online

रोमियो 5 - Gaddi bible

रोमियो 5

¹ता जैहणै अहै विस्‍वासा सोगी धर्मी ठहरै हिन, ता जैड़ा प्रभु यीशु मसीह इन्दै तांयै करू तठेरै द्धारा प्रमात्मैं सोगी इन्दा मेल भूच्ची गो हा।

²इन्दै विस्वास री वजह थऊँ मसीह असिओ ऐसी जगह खडुरै अतै ऐसा सौभाग्य दिता जठेरै अहै काबल ना थियै। अहै भरोसै अतै खुशी सोगी तैस टैमां री भाळ करू करदै हिन जैहणै असु प्रमात्मैं री महिमा मन्ज सहभागी भूणा।

³सिर्फ ऐह ही ना, बल्कि अहै क्‍लेशा मन्ज भी खुशी मनान, ऐह जाणी करी कि जैहणै अहै क्‍लेश मन्ज भुन्दै ता सो असिओ धीरज मन्ज बढ़णै मन्ज मदद करदै हिन।

⁴अतै धीरज थऊँ इन्दा चरित्र होर खरा भूच्ची गान्दा, अतै खरा चरित्र उद्धार री उम्मीद रै भरोसै जो बढ़ान्‍दा हा।

⁵ऐह उम्मीद असिओ निराश ना भूणा दिन्दी, क्ओकि अहै जाणदै कि प्रमात्मैं असिओ कैतनी गहराई सोगी प्रेम करू क्ओकि तिनी पवित्र आत्मा असिओ दितुरीआ ताकि इन्दै दिल प्रमात्मैं रै प्रेम सोगी भरी गान।

⁶क्ओकि जैहणै अहै कमजोर ही थियै, ता मसीह ठीक टैमां पुर भक्तिहीना तांयें मरू।

⁷कसकि धर्मी जन तांयें कोई मरा, ऐह ता भूच्ची ना सकदा; पर भूच्ची सकदा कि कसकि भलै मणु तांयें कोई मरनै री हिम्मत करा।

⁸पर प्रमात्मां असु पुर अपणै प्रेम री भलाई ऐस तरीकै प्रकट करदा कि जैहणै अहै पापी ही थियै तैहणै मसीह असु तांयें मरू।

⁹ता जांकि अबै अहै मसीह रै खूना बहाऐ गाणै री वजह थऊँ धर्मी ठहरै हिन, ता मसीह असिओ प्रमात्मैं रै क्रोधा थऊँ भी बचणा।

¹⁰क्ओकि जैहणै अहै प्रमात्मैं रै बैरी थियै तांभी तसेरै पुत्रा री मृत्यु रै द्धारा इन्दा मेल प्रमात्मैं सोगी भुआ, ताकि फिरी मेल भूच्ची गाणै पुर मसीह री जिन्दगी रै द्धारा अहै उद्धार पान।

¹¹अहै अपणै प्रभु यीशु मसीह रै द्धारा खुश हिन, जसेरै द्धारा इन्दा मेल भुआ प्रमात्मैं सोगी भूआ।

¹²ठेरैतांये जिंआं आदम री वजह थऊँ पाप संसार मन्ज आ, अतै पाप करनै रै द्धारा आदम मरी गो, अतै ऐस तरीकै मृत्यु सबी मणु मन्ज फैली गई, क्ओकि सबीये पाप करूरा हा।

¹³मूसा री व्यवस्था दिणै थऊँ पैहलै भी मणु संसार मन्ज पाप करदै थियै थू, पर तैतिओ पाप ना मनया गो क्ओकि तैस टैमां तक कोई नियम ना थू कि तैतिओ त्रोड़ी सकन।

¹⁴तांभी आदम थऊँ लेई करी मूसा तक सबीये पाप करू अतै सब मणु मरी गै, सो भी मरी गै जियें प्रमात्मैं री आज्ञा जो ना त्रोडु, जियां आदमे आज्ञा जो त्रोडु। अबै आदम अक्क मसीह रा नुमाइंदै रै रूपा मन्ज चिन्ह हा जैड़ा ईणै बाळा थू।

¹⁵पर आदम रै पाप अतै प्रमात्मैं री दया रै वरदान मन्ज बडा फर्क हा क्ओकि आदम रै अपराधा सितै मतै मणु मरै। पर प्रमात्मैं रा अनुग्रह अतै तसेरा माफी रा दान जैडा तैत थऊँ बडा हा मतलब यीशु मसीह री दया सितै मतै मणु जो पापा री माफी भूई।

¹⁶प्रमात्मैं रै अनुग्रह रा अतै आदम रै पाप रा परिणाम मन्ज बडा फर्क हा, जिंआं आदम रै पाप थऊँ मणु दोषी ठहराये गै, पर प्रमात्मैं रै वरदान यीशु मसीह रै द्धारा मतै मणु धर्मी ठहरै।

¹⁷क्ओकि जैहणै अक्की मणु रै अपराधा री वजह थऊँ सब मणु मन्ज मौत आई, ता जैड़ै मणु अनुग्रह रा धर्मरूपी वरदान बहुतायत सितै पान्दै हिन तिन्या अक्की मणु रै, अर्थात यीशु मसीह रै द्धारा जरूर ही अनन्त जिन्दगी पाणिआ।

¹⁸ठेरैतांये जिंआं अक्क अपराध री वजह थऊँ सब मणु दोषी ठहराये गै, तियां ही मसीह रा अक्क धर्मा रा कम भी सबी मणु तांयें प्रमात्मैं सोगी अक्क नौआ रिश्ता बणांदा अतै नोई जिन्दगी दिन्दा हा।

¹⁹क्ओकि जिंआं अक्क मणु री आज्ञा न मनणै सितै मतै मणु पापी ठहरै, तियां ही अक्की मणु रै आज्ञा मनणै सितै मतै मणु धर्मी ठहरनै हिन।

²⁰प्रमात्मैं री व्यवस्था ठेरैतांये दिती गई कि मणु जो पता लगा कि सो कैतनै पापी हिन, पर जियां मणु रा पाप बददा गो तियां ही प्रमात्मैं री अनुग्रह तैत थऊँ भी ज्यादा बददा गो,

²¹जिंआं मणुऐ पाप करू अतै सब मरी गै, तियां ही इन्दै प्रभु यीशु मसीह रै द्धारा अनुग्रह तियां जो धर्मी ठहरान्दा हा अतै अनन्त जिन्दगी दिन्दा हा।