Read Gaddi रोमियो 8 Bible Online

रोमियो 8 - Gaddi bible

रोमियो 8

¹ता अबै जैड़ै मसीह यीशु मन्ज हिन, तियां पुर दण्ड री आज्ञा निय्आ।

²क्ओकि तुहै मसीह मन्ज हिन अतै पवित्र आत्मा तुसिओ पाप री शक्ति थऊँ छुड़ान्दा जैड़ा तुसिओ मौत री कनारी लेई गान्दा।

³क्ओकि जैडा कम मूसा री व्यवस्था पापी स्वभाव री वजह थऊँ कमजोर भूच्ची करी ना सकी, तैतिओ प्रमात्मैं करू, अर्थात अपणै ही पुत्रा जो इन्दै शरीर री समानता मन्ज अतै इन्दै पापा तांयें बलि भूणै जो भैजी दिता। प्रमात्मैं पाप री शक्ति जो अपणै पुत्र रै शरीर रै द्धारा त्रोड़ी दिता।

⁴तिनी ऐसा करू ताकि अहै पवित्र आत्मा री आज्ञा रै अनुसार व्यवस्था री गल्ला जो पुरा करन ना कि अपणी अभिलाषा रै द्धारा।

⁵क्ओकि जैड़ै पापी स्वभाव रै वशा मन्ज हिन सो पापी चिजा रै बारै मन्ज ही सोचदै हिन, पर जैड़ा पवित्र आत्मा रै वश मन्ज हा सो तिन्या गल्ला पुर मन लगान्दै हिन जैड़ी पवित्र आत्मा जो पसन्द हिन।

⁶पापी स्वभाव रै वश मन्ज रैहणा ता मृत्यु हा, पर अगर पवित्र आत्मा तून्दै मना जो अपणै वशा मन्ज करी लेय्आ ता सो तुसिओ शान्ती अतै अनन्त जिन्दगी दिन्दा हा।

⁷पापी स्वभाव रै वश मन्ज रैहणा ता प्रमात्मां सितै बैर रखणा हा, क्ओकि ईनी पापी स्वभाव प्रमात्मैं री व्यवस्था रा पालन ना करू अतै ना ही करना।

⁸अतै जैड़ै ऐस पापी स्वभाव रै वश मन्ज हिन, सो प्रमात्मैं जो खुश ना करी सकदै।

⁹पर जांकि प्रमात्मैं रा पवित्र आत्मा तूसु मन्ज बसदा हा, ता तुहै पापी स्वभाव रै वशा मन्ज ना हिन पर पवित्र आत्मा रै वशा मन्ज हिन। अगर कसकि मन्ज पवित्र आत्मा निय्आ ता सो मसीह रा जन निय्आ।

¹⁰मसीह तूसु मन्ज जिन्दा हा ठेरैतांये अगर तून्दा शरीर पाप री वजह थऊँ मरी गच्छा ता पवित्र आत्मा जिन्दगी दिणिआ क्ओकि तुहै प्रमात्मैं री नजरा मन्ज धर्मी बणाये गै हिन।

¹¹अगर पवित्र आत्मा जिनी यीशु जो मरूरै थऊँ जिआऊ, तूसु मन्ज बसुरा; ता जिनी मसीह जो मरूरै थऊँ जीयाऊ, सो तुन्दी नश्वर देह जो भी अपणै पवित्र आत्मा रै द्धारा जैडा तूसु मन्ज बसुरा हा, जियाणा।

¹²ठेरैतांये हे विस्वासी भाईओ अहै अपणी अभिलाषा जो पुरा करनै तांयै जिन्दगी ना जीन।

¹³अगर तुहै अपणी अभिलाषा जो पुरा करनै तांयै जिन्दगी बितान्‍दै हिन ता तूसु मरना हा, अगर तुहै अपणी अभिलाषा सोगी ना पर पवित्र आत्मा रै अनुसार जिन्दगी जिन्दै ता तूसु जिन्दा रैहणा।

¹⁴ठेरैतांये कि जैतणै मणु पवित्र आत्मा रै चलाए चलदै हिन, सो ही प्रमात्मैं रै औलाद हिन।

¹⁵तुहै ऐसा आत्मा ना पाऊरा जैड़ा तुसिओ गुलाम बणाई देय्आ अतै तुहै डरन, पर तिनी तुसिओ पुत्रा सांईयै गोद लैऊ ता तुहै सो पवित्र आत्मा पाऊ हा कि अहै अबै तैसिओ हे अब्बा, हे पिता बली सकदै हिन।

¹⁶पवित्र आत्मा अप्पू ही इन्दी आत्मा सोगी गवाही दिन्दा, कि अहै प्रमात्मैं री सन्तान हिन।

¹⁷अगर अहै सन्तान हिन ता वारिस भी हिन, बल्कि प्रमात्मैं रै वारिस अतै मसीह रै संगी वारिस हिन। अगर अहै मसीह सांईयै दुख सहन ता तैस सोगी महिमा मन्ज भी सहभागी भूणा।

¹⁸अऊँ जाणदा हा कि ऐस युग रै दुख अतै क्‍लेश तैहा महिमा सामणै, जैड़ी प्रमात्मां असु पुर प्रकट करनै बाळा हा, कुछ भी निय्आ।

¹⁹क्ओकि संसार तैस दिना रा बड़ी उम्मीद भरी नजरा सोगी इंतजार करू करदा जैहणै प्रमात्मैं प्रगट करना कि तसेरी सच्ची औलाद कुण हा।

²⁰अपणी इच्छा रै विरूद्ध संसार प्रमात्मैं रै हराप रै अधीन हा पर अपणी जोश भरूरी उम्मीद सोगी,

²¹संसार तैस दिना रा इंतजार करू करदा हा जैहणै तैस प्रमात्मैं री औलाद सोगी तैसा महिमा मन्ज प्रवेश भूणा जैड़ा मौत अतै सड़ाहट थऊँ दूर हा।

²²क्ओकि अहै जाणदै हिन कि संसार री शुरूआत थऊँ ही पुरा संसार तडफू करदा हा जियां अक्क जनानी जो बच्चा पैदा करनै रै टैमैं दर्द भुन्दी हा।

²³अतै अहै विस्वासी भी तड़पदै हिन कि फिरी भी इन्दै अन्दर पवित्र आत्मा हा जैड़ा ईणै बाळी महिमा रा चिन्ह हा क्ओकि इन्दा शरीर पाप अतै क्‍लेश थऊँ छुटकारा पाणै री भाळ करू करदा हा। अहै भी उत्सुकता सोगी तैस दिना रा इंतजार करू करदै हिन जैहणै प्रमात्मैं असिओ तसेरै गोद लैऊरै बच्चै रा पुरा अधिकार दिणा, अतै नौआ शरीर भी दिणा जठेरा तिनी वायदा करूरा हा।

²⁴जैहणै इन्दा उद्धार भूआ ता असिओ ऐह उम्मीद दिती हा (अगर असु बलै पैहलै थऊँ सो चिज हा ता असिओ उम्मीद करनै री जरूरत निय्आ

²⁵पर अहै तैहा चिजा री भाळ करू करदै हिन जैड़ी असु बलै ना हा पर असिओ धीरज अतै भरोसै सोगी तठेरी भाळ करना चहिन्दा।)

²⁶ऐस तरीकै सितै पवित्र आत्मा भी इन्दी कमजोरी मन्ज मदद करदा क्ओकि अहै ना जाणदै कि प्रार्थना कस तरीकै करना चहिन्दी। पवित्र आत्मा अप्पू ही आहें भरी भरी करी, जैड़ी बयान थऊँ बाहर हिन, असु तांयें बिनती करदा हा।

²⁷प्रमात्मां जैड़ा मना जो जाँचणैवाळा हा जाणदा कि पवित्र आत्मा री इच्छा कै हा। क्ओकि सो पवित्र मणु तांयें प्रमात्मैं री इच्छा अनुसार बिनती करदा हा।

²⁸अहै जाणदै हिन कि जैड़ै मणु प्रमात्मैं सितै प्रेम रखदै हिन, तियां तांयें सब गल्ला मिलीकरी भलाई जो ही पैदा करदी हिन, अर्थात तियां तांयें जैड़ै तसेरी इच्छा अनुसार चुणुरै हिन।

²⁹प्रमात्मैं अपणै मणु जो पैहलै थऊँ ही जाणी लैऊ अतै तियां जो अपणै पुत्रा सांईयै भूणै तांयै चुणी लैऊ कि तसेरा पुत्र विस्वासी भाई मन्ज पैहलोठा हा।

³⁰जियां जो प्रमात्मैं अपणै तांयै अलग करू तियां जो हैदु, अतै जियां जो तिनी हैदु तियां जो अपणी नजरा मन्ज धर्मी ठहराऊ अतै अपणी महिमा मन्ज सहभागी करवाऊ।

³¹ता अहै इन्या गल्ला रै बारै मन्ज कै बलन? अगर प्रमात्मां इन्दी कनारी हा, ता कोई असिओ हराई ना सकदा।

³²प्रमात्मैं अपणै पुत्रा जो अप्पू तांयै ना रखू, पर तैसिओ असु सबी तांयें शत्रु जो सौंपी दिता, ता असिओ तैस सोगी होर सब कुछ भी दिणा।

³³कोई भी प्रमात्मैं रै चुणुरै पुर दोष ना लाई सकदा। क्ओकि तिनी ही असिओ अपणी नजरा मन्ज धर्मी ठहराऊ हा।

³⁴कोई भी असिओ दण्ड री आज्ञा ना दी सकदा। मसीह ही हा जैडा असु तांयै मरी गो बल्कि मुरदै थऊँ जी भुआ, अतै प्रमात्मैं रै सज्जी कनारी हा, अतै असु तांयें निवेदन भी करदा।

³⁵क्ओकि क्‍लेश, संकट, उपद्रव, अकाल, नंगाई, जोखिम, या तलवार ऐह कुछ भी असिओ मसीह रै प्रेमा थऊँ अलग ना करी सकदा।

³⁶जिंआं पवित्रग्रन्था मन्ज लिखुरा हा; “तिजो तांयें अहै सदा मौत रै खतरै मन्ज हिन, अहै तियां वड्डि दिणैवाली भैड़ा सांईयै गिणै गान्दै हिन।”

³⁷पर इन्या सब बुरी गल्ला मन्ज अहै तसेरै द्धारा जिनी असु सोगी प्रेम करू, जयवन्त थू भी बदिकरी हा।

³⁸क्ओकि अऊँ पक्का जाणदा कि ना मृत्यु, ना जिन्दगी, ना स्वर्गदूत, ना प्रधानताएँ, ना वर्तमान, ना भविष्‍य, ना सामर्थ, ना ऊंचाई,

³⁹ना गहराई, अतै ना कोई होर धरती असिओ प्रमात्मैं रै प्रेमा थऊँ जैडा इन्दै प्रभु मसीह यीशु मन्ज हा, अलग करी सकदिआ।