Read Gaddi 1 कुरिन्थियों 12 Bible Online

1 कुरिन्थियों 12 - Gaddi bible

1 कुरिन्थियों 12

¹हे विस्वासी भाईओ, अऊँ चाहन्दा कि तुहै आत्मिक वरदाना रै बारै मन्ज जाणा कि कियां तंयारा इस्तेमाल करना हा।

²तुहै जाणदै हिन कि जैहणै तुहै गैर यहूदी थियै, ता गूंगी मूर्ति रै पिचो चलाए गान्दै थियै तियां ही चलदै थियै।

³ठेरैतांये अऊँ तुसिओ समझांदा कि जैडा कोई प्रमात्मैं री पवित्र आत्मा री अगुवाई सितै चलदा हा ता सो ऐह ना बली सकदा कि यीशु हरापित हा, अतै सो पवित्र आत्मा रै द्धारा ही बली सकदा कि यीशु ही प्रभु हा।

⁴वरदान ता कई तरह रै हिन, पर अक्क ही पवित्र आत्मा हा जैड़ा सब वरदाना रा जरिया हा।

⁵कम ता कई तरह रै हिन जैड़ै अहै प्रभु तांयै करदै हिन पर अहै सब अक्क ही प्रभु री सेवा करदै हिन।

⁶प्रमात्मां असु मन्ज हरेक मणु जो अलग अलग तरह री सेवा करनै रा कम दिन्दा हा पर अक्क ही प्रमात्मां हा जैडा असु सबी रै द्धारा कम करदा हा।

⁷असु मन्ज हरेक मणु जो आत्मा रा वरदान दितुरा हा ताकि अहै अक्की दूये री मदद करी सकन।

⁸प्रमात्मैं री आत्मा अक्की मणु जो ऐसा संदेश बलणै रा वरदान दिन्दा जैड़ा बुद्धि सोगी भरूरा भुन्दा, अतै सो ही आत्मा दूये मणु जो ऐह वरदान दिन्दा जैड़ा ज्ञान सोगी भरूरा भुन्दा।

⁹सो ही आत्मा अक्की मणु जो मसीह मन्ज बड़ा विस्वास करनै रा वरदान दिन्दा हा अतै दूये जो आत्मा रै द्धारा बमार मणु जो ठीक करनै रा वरदान।

¹⁰फिरी सो ही आत्मा कसी जो सामर्थ रै कम करनै री शक्ति, अतै कसी जो भविष्‍यवाणी री, अतै कसी जो आत्मा री परख, अतै कसी जो अनेक तरह री भाषा, अतै कसी जो भाषा रा अर्थ दसणै रा वरदान दिन्दा हा।

¹¹ऐह सब वरदान अक्क ही आत्मा रै कम हिन सो जिन्या चाहन्दा तिन्या ही हरेक विस्वासी जो वरदान दिन्दा हा।

¹²क्ओकि जैस तरीकै इन्दै शरीर मन्ज मतै सारै अंग हिन, अतै सबी अंगा रा अलग अलग कम हा तांभी अहै सब विस्वासी मिलीकरी मसीह मन्ज अक्क शरीर सांईयै हिन।

¹³तैस तरीकै ही अहै सबीये चाहे यहूदी या गैर यहूदी, चाहे दास या आजाद सबी जो अक्क ही आत्मा रै द्धारा अक्क शरीर भूणै तांयें बपतिस्मा लैऊरा हा, अतै असु सबी रै अन्दर अक्क ही पवित्र आत्मा दितुरा हा।

¹⁴ठेरैतांये कि शरीरा मन्ज अक्क अंग निय्आ पर मतै सारै हिन।

¹⁵अगर पैर बला, “अऊँ हत्थ निय्आ, ठेरैतांये अऊँ शरीरा रा अंग निय्आ,” ता कै सो ऐसा वजह थऊँ शरीरा रा अंग निय्आ?

¹⁶अतै अगर कन बला, “अऊँ हाख्र निय्आ, ठेरैतांये शरीरा रा अंग निय्आ,” ता कै सो ऐसा वजह थऊँ शरीरा रा अंग निय्आ?

¹⁷अगर पुरा शरीर हाख्र ही भुन्दा ता हुणदै कियां? अगर पुरा शरीर कन भुन्दा ता हिंगदै कियां?

¹⁸पर सच मन्ज प्रमात्मैं शरीरा रै अंगा जो अपणी मर्जी अनुसार अक्क अक्क करीके रखूरा।

¹⁹मणु रै शरीरा मन्ज मतै सारै अंग हिन अतै ऐह मिलीकरी अक्क शरीर बणदा हा।

²⁰मणु रै शरीरा मन्ज अंग ता मतै सारै हिन, पर शरीर अक्क ही हा।

²¹हाख्र हत्था सोगी ना बली सकदी, “मिन्जो तेरी जरूरत निय्आ,” अतै ना मुण्ड़ पैरा सितै बली सकदा कि, “मिन्जो तुन्दी जरूरत निय्आ।”

²²पर शरीरा रै कुछ अंग जैड़ै दूये थऊँ कमजोर लगदै हिन, पर बड़ै ही जरूरी हिन,

²³अतै शरीरा रै जियां अंगा जो अहै आदर रै योग्य ना समझदै तियां जो ही अहै ज्यादा आदर दिन्दै हिन; अतै इन्दै शोभाहीन अंग होर भी मतै शोभामान भूच्ची गान्दै हिन,

²⁴फिरी भी ईन्दै शोभामान अंगा जो ईंआरी जरूरत निय्आ। पर प्रमात्मैं शरीरा जो ऐसा बणाई दितुरा कि जैस अंगा जो आदर री कमी थी तैसिओ होर भी मतै आदर मुळा।

²⁵ताकि शरीरा मन्ज फूट ना पैय्आ, पर अंग अक्की दूये री बराबर चिन्ता करन।

²⁶ठेरैतांये अगर शरीरा रै अक्की अंग जो दुख लगदा, ता सब अंग तैस सोगी दुखी भुन्दै हिन; अतै अगर अक्की अंगा री तारीफ भून्दिआ, ता तैस सोगी सबी अंग खुशी मनान्दै हिन।

²⁷ऐस तरीकै तुहै सब मिलीकरी मसीह रै शरीर हिन, अतै तसेरै अलग अलग अंग हिन।

²⁸प्रमात्मैं ऐस यीशु मसीह रै शरीर मन्ज अर्थात कलीसिया मन्ज असु सब मणु जो अलग अलग कम करनै जो दितुरै हिन। पैहलै तिनी कुछ जो प्रेरित भूणै तांयै चुणु, दूये भविष्‍यवक्ता, त्रियै गुरू, फिरी सामर्थ रै कम करनैवाळै, फिरी चंगा करनैवाळै, फिरी उपकार करनैवाळै अतै प्रबन्ध करनैवाळै, मती तरह री भाषा बलणैवाळै।

²⁹सब मणु प्रेरित ना हिन, सब मणु भविष्‍यवक्ता ना हिन, सब मणु उपदेशक ना हिन अतै सब सामर्थ रै कम करनैवाळै भी ना हिन।

³⁰सबी जो चंगा करनै रा वरदान ना मुळुरा अतै सबी रै सब कई तरह री भाषा भी ना बलदै हिन।

³¹सब अनुवाद ना करदै हिन, पर तुहै बडै थऊँ बडै वरदाना री धूना मन्ज रेय्आ। पर अऊँ तुसिओ होर भी सबी थऊँ उतम रस्ता दसदा।