Read Gaddi 1 कुरिन्थियों 14 Bible Online

1 कुरिन्थियों 14 - Gaddi bible

1 कुरिन्थियों 14

¹अक्क दूये जो प्रेम करनै री पूरी कोशिश करा, अतै आत्मिक वरदाना री भी धूना मन्ज रेय्आ, विशेष करीके भविष्‍यवाणी करा।

²क्ओकि जैडा अन्य भाषा मन्ज कणैन्दा हा सो मणु सोगी ना पर प्रमात्मैं सोगी गल्ला करदा हा, ठेरैतांये कि तसेरी गल्ला कोई ना समझदा, क्ओकि सो भेदा री गल्ला पवित्र आत्मा री सामर्थ रै द्धारा बलदा हा।

³पर जैडा भविष्‍यवाणी करदा सो मणु जो उत्साहित करनै तांयै अतै तसली दिणै री गल्ला करदा हा।

⁴जैड़ै अन्य भाषा मन्ज गल्ला करदा हा, सो अपणै ही विस्वास जो बधान्दा हा, पर जैडा भविष्‍यवाणी करदा, सो कलीसिया रै विस्वासी रै विस्वास जो बधान्दा हा।

⁵अऊँ चाहन्दा कि तुहै सब अन्य भाषा मन्ज गल्ल करन पर ऐत थऊँ ज्यादा ऐह चाहन्दा कि भविष्‍यवाणी करा; क्ओकि अगर अन्य भाषा वलणैवाळा कलीसिया रै विस्वासी जो विस्वास मन्ज बढ़णै तांयें अनुवाद ना करा ता भविष्‍यवाणी करनैवाळा तैस थऊँ बदिकरी हा।

⁶ठेरैतांये हे विस्वासी भाईओ, अगर अऊँ तूसु बलै ईच्ची करी अन्य भाषा मन्ज गल्ला करू, अतै प्रकाश या ज्ञान या भविष्‍यवाणी या उपदेश री गल्ला तूसु सोगी ना बल्लू, ता तुसिओ मिन्जो थऊँ कै फायदा भूणा?

⁷ऐस ही तरीकै निर्जिव चिजा जियां थऊँ आवाज निकळदिआ, जियां बंसरी या बीण, अगर तंयारै स्वर मन्ज भेद ना भोआ ता जैडा फूक दिकरी या बजाया गान्दा, सो कियां पच्छैणना?

⁸अगर लड़ाई मन्ज तुरही रा शब्द साफ ना भोआ ता सैनिक लड़ाई तांयै तैयारी ना करी सकदै।

⁹ऐसै ही तुहै भी अगर जीभ थऊँ साफ-साफ गल्ला ना करन, ता जैडा कुछ कणैणा लगुरै कियां समझणा? तुहै ता हवा सितै गल्ला करनैवाळै बणी गाणै।

¹⁰संसार मन्ज मती सारी अलग अलग भाषा हिन अतै हरेक भाषा रा कुछ ना कुछ अर्थ भुन्दा हा।

¹¹ठेरैतांये अगर अऊँ कसी भाषा रा अर्थ ना समझूँ, ता बलणैवाळै मेरी नजरा मन्ज अतै अऊँ तसेरी नजरा मन्ज परदेसी भूणै।

¹²ठेरैतांये जैहणै तुहै भी आत्मिक वरदाना री धुन मन्ज हिन, ता तिन्या वरदान जो पाणै री कोशिश करा जैत सितै कलीसिया मन्ज विस्वासी रै विस्वास री उन्‍नति भोआ।

¹³ठेरी वजह थऊँ जैड़ै अन्य भाषा बलन, सो प्रार्थना करै कि तठेरा अनुवाद भी करी सकन।

¹⁴ठेरैतांये जैहणै अऊँ अन्य भाषा मन्ज प्रार्थना करदा हा ता मेरी आत्मा ता प्रार्थना करदी हा पर अऊँ समझी ना पान्दा कि अऊँ कै बल्लू करदा हा।

¹⁵ता मिन्जो कै करना चहिन्दा? ऐसा अक्क टैमं भुन्दा कि जैहणै मिन्जो आत्मा रै द्धारा प्रार्थना करना चहिन्दी हा अतै ऐसा भी टैमं भुन्दा हा जैहणै मिन्जो अक्ला सोगी प्रार्थना करना चहिन्दी हा। कदी-कदी मिन्जो आत्मा रै द्धारा गाणा चहिन्दा अतै कदी-कदी अक्ला सितै भी गाणा चहिन्दा।

¹⁶अगर कोई अनजाण मणु तुन्दी आराधना मन्ज अईआ जैहणै तुहै आत्मा रै द्धारा प्रमात्मैं री स्तुति करू करदै भून। अगर सो तुन्दी गल्ला जो समझी ना सकदै ता तिन्या जो किन्या पता लगणा कि तुहै कै बल्लू करदै हिन।

¹⁷तू ता भली भाँति प्रमात्मैं रा धन्यवाद करू करदा हा, पर दूये रै विस्वास मन्ज उन्‍नति ना भुन्दी।

¹⁸अऊँ अपणै प्रमात्मैं रा धन्यवाद करदा, कि अऊँ तूसु सबी मन्ज मती ज्यादा अन्य भाषा मन्ज कणैन्दा हा।

¹⁹पर कलीसिया मन्ज अन्य भाषा मन्ज दस हजार गल्ला करनै थऊँ ऐह मिन्जो होर भी खरा लगदा कि दूये जो सखाणै तांयें अक्ला री पँज ही गल्ला करू।

²⁰हे विस्वासी भाईओ, तुन्दी समझ बच्चै सांईयै ना भोआ, जैड़ी तक बुराई री गल्ल हा ता ऐत मन्ज तुहै बच्चै सांईयै भोळै रेय्आ, पर अपणी समझ मन्ज स्याणै भूच्ची गच्छा।

²¹पवित्रग्रन्था मन्ज लिखुरा हा कि, प्रभु बलदा, “अऊँ अपरिचित भाषा बलणैवाळै मणु रै द्धारा अतै पराऐ मणु रै द्धारा अपणै मणु सितै गल्ला करनी तांभी इन्या मणु मेरी ना हुणनी।”

²²ठेरैतांये अन्य भाषा अविस्वासी तांयें चिन्ह हिन; अतै भविष्‍यवाणी विस्वासी तांयें चिन्ह हिन।

²³ता अगर कलीसिया अक्क जगह इकट्ठी भोआ, अतै सबी रै सब अन्य भाषा बलन, अतै बाहरा बाळै या अविस्वासी मणु अंदर चली ईन ता कै तियां तुसिओ पागल ना बलणा?

²⁴पर अगर सब भविष्‍यवाणी करना लगन, अतै कोई अविस्वासी या बाहरवाळा मणु अंदर चली अईआ, ता तैसिओ महसुस भूणा कि तिनी प्रमात्मैं री विरूद्ध पाप करू हा।

²⁵प्रमात्मैं रा ऐह संदेश हुणी करी तैसिओ अपणै बुरै कमा रा पता लगणा अतै तैस मुँहा रै भारै पैई करी प्रमात्मैं जो प्रणाम करना, अतै मनी लैणा कि सच मन्ज प्रमात्मां तून्दै मन्जै हा।

²⁶ठेरैतांये हे विस्वासी भाईओ, कै करना चहिन्दा? जैहणै तुहै आराधना तांयै इकट्ठै भुन्दै हिन, ता हरेक रै दिला मन्ज भजन या उपदेश या अन्य भाषा या प्रकाश या अन्य भाषा रा अर्थ दसणा रैहन्दा। ऐह सब कुछ विस्वासी रै विस्वास जो उन्‍नति करनै तांयें भूणा चहिन्दा।

²⁷अगर अन्य भाषा मन्ज गल्ला करनी भून ता दोई दोई या मतै भून ता त्राई जिणै बारी-बारी सितै बलन, अतै अक्क मणु अनुवाद करा

²⁸पर अगर अनुवाद करनैवाळा ना भोआ ता अन्य भाषा वलणैवाळा कलीसिया मन्ज शान्त रेय्आ, अतै अपणै मना मन्ज प्रमात्मैं सितै गल्ला करा।

²⁹भविष्‍यवक्ता मन्ज दोई या त्राई बलन, अतै बाकी मणु तंयारै बचना जो परखन।

³⁰अगर तैहा कलीसिया मन्ज कोई होर हा जैसिओ प्रमात्मैं थऊँ कुछ प्रकाशन मूळु भोआ ता सो पैहला मणु चुप भूच्ची गच्छा अतै तैसिओ बलणा देय्आ।

³¹क्ओकि तुहै सब अक्क अक्क करीके भविष्‍यवाणी करी सकदै हिन, ताकि सब सिखन अतै सब उत्साहित भून।

³²जैड़ा भविष्‍यवक्ता प्रमात्मैं रै संदेश जो दस्सु करदा हा सो अपणै आप पुर काबू मन्ज रखा ताकि दुआ मणु भी कुछ बल्ली सका।

³³क्ओकि प्रमात्मां गड़बड़ी रा निय्आ, पर शान्ती रा प्रमात्मां हा। जियां पवित्र मणु री सब कलीसिया मन्ज हा।

³⁴जनानी कलीसिया मन्ज वाद विवाद ना करन पर चुप रैहन, क्ओकि तियां जो गल्ला करनै रा हूक्म निय्आ, पर अधीन रैहणै री आज्ञा हा, जियां व्यवस्था मन्ज लिखुरा भी हा।

³⁵अगर सो कुछ पुछणा चाहन, ता घरा मन्ज अपणै अपणै घरवाळै थऊँ पुछन, क्ओकि जनानी रा कलीसिया मन्ज गल्ला करना लज्जा री गल्ल हा।

³⁶प्रमात्मैं रा बचन तूसु मणु थऊँ ही शुरू ना भच्छुरा अतै ना सिर्फ तूसु तक ही पुजुरा हा।

³⁷अगर कोई मणु अपणै आपा जो भविष्‍यवक्ता या आत्मिक जन समझा, ता ऐह जाणी लेय्आ कि जैड़ी गल्ला अऊँ तुसिओ लिखदा, सो प्रभु री आज्ञा हिन।

³⁸पर अगर सो ऐहा गल्ला पुर ध्यान ना देय्आ ता तुहै भी तैस मणु पुर ध्यान मत देय्आ।

³⁹ता हे विस्वासी भाईओ, भविष्‍यवाणी करनै री धूना मन्ज रेय्आ अतै अन्य भाषा बलणै थऊँ मना ना करा,

⁴⁰पर जैड़ी गल्ला कलीसिया मन्ज करदै हिन सो सब सही तरीकै अतै अक्क-अक्क करीके करी गान।