Read Gaddi 1 कुरिन्थियों 16 Bible Online

1 कुरिन्थियों 16 - Gaddi bible

1 कुरिन्थियों 16

¹अबै सो सवाल जैड़ा तुहै तैस पैसै रै बारै मन्ज पुछुरा थू जैड़ा तुहै यरूशलेम शहर रै पवित्र मणु तांयें इकट्ठा करूरा थू। तुसिओ सो ही तरीका अपनाणा चहिन्दा जैडा मैंई गलातिया परदेस री कलीसिया जो दसुरा थू।

²हर इतवारा जो तूसु मन्ज हरेक अपणी कमाई रै अनुसार कुछ अप्पू बलै रखी छडु करा कि मेरै ईणै पुर तुसिओ पैसै कठेरना ना पैय्आ।

³अतै मेरै ईणै रै बाद मुँ तिन्या मणु तांयै सिफारिश री चिट्ठी लिखणी हा जिन्या जो तुहै चुणुरा हा ताकि सो गिच्ची करी तून्दा दान यरूशलेम पुजाई सकन।

⁴अगर तुहै सोचदै हिन कि मेरा भी गाणा जरूरी भोला, ता मुँ तिन्या सोगी गाणा।

⁵मुँ मकिदुनिया परदेस गाणै थऊँ बाद तूसु सोगी मिलणै तांयै ईणा।

⁶पर सम्भव हा कि मुँ तूसु बलै कुछ टैमां तक रूकणा, भूच्ची सकदा हा पूरी सर्दी रै टैमैं फिरी तुहै मेरी मदद करी सकदै हिन मेरै सफर मन्ज अगो गाणै तांयै जैस तरफ भी अऊँ गाला।

⁷क्ओकि अऊँ अबै अऊँ तूसु सोगी ज्यादा देर मिलणा चाहन्दा अतै मिन्जो उम्मीद हा कि प्रभुऐ चाऊ ता मुँ कुछ टैमां तक तूसु सोगी रैहणा।

⁸पर मुँ पिन्तेकुस्त रै त्यौहार तक इफिसुस शहर मन्ज रैहणा,

⁹क्ओकि मिन्जो तांयें तैठी अक्क बडा अतै उपयोगी कम करनै तांयै मौका हा, हालांकि वरोधी मतै सारै हिन।

¹⁰अगर तीमुथियुस तूसु बलै आ, ता तैसिओ तैड़ी अपणै घरा सांईयै महसुस भोआ क्ओकि सो मिन्जो सांईयै प्रभु तांयै कम करदा हा।

¹¹ठेरैतांये तैसिओ कोई तुच्छ ना जाणा, पर तैसिओ कुशलता सोगी ऐस कनारी मिन्जो बलै पुजाई दिन्यै, क्ओकि अऊँ तसेरी भाळ करू करदा कि सो विस्वासी भाई सोगी अईआ।

¹²भाई अपुल्लोस सोगी मैंई वडी बिनती करी हा कि तूसु बलै होर विस्वासी भाई सोगी गच्छा; पर तिनी ऐस टैमैं गाणै री कुछ भी इच्छा ना करी, पर जैहणै मौका पाला तैहणै चली ईणा।

¹³जागदै रेय्आ, विस्वास मन्ज दृढ़ रेय्आ अतै बलवन्त बणी गच्छा।

¹⁴जैडा कुछ करदै हिन प्रेम सितै करा।

¹⁵हे विस्वासी भाईओ, तुहै स्तिफनास रै घरानै जो जाणदै हिन कि सो अखया परदेस मन्ज पैहलै विस्वासी हिन, अतै पवित्र मणु री सेवा तांयें तैयार रैहन्दै हिन।

¹⁶ठेरैतांये अऊँ तूसु सोगी बिनती करदा कि ऐसै अगुवै रै अधीन रेय्आ, बल्कि हरेक रै जैडा ऐस कम्मा मन्ज मेहनती अतै सहकर्मी हा।

¹⁷अऊँ स्तिफनास अतै फूरतूनातुस अतै अखइकुस रै ईणै थऊँ खुश भुआ, क्ओकि तुहै ऐड़ी ना हिन ठेरैतांये इन्यै मेरी सो मदद करी हा जैड़ी तुहै ना करी सकदै थियै।

¹⁸ऐह मणु मिन्जो तांयै अदभुत प्रोत्साहन री वजह बणै, जिन्या सो मणु तूसु तांयै भी बणै थियै। ऐसै मणु जैड़ै खरी सेवा करदै हिन तिन्या जो आदर मिलणा चहिन्दा।

¹⁹आसिया परदेस री सब कलीसिया रै विस्वासी री तरफा थऊँ तूसु सबी जो नमस्कार, अक्‍विला अतै तसेरी घरावाळी प्रिस्का रा अतै तंयारै घरा री कलीसिया रै विस्वासी भी तूसु जो प्रभु मन्ज बडा बडा नमस्कार!

²⁰सबी विस्वासी भाई रा तुसिओ नमस्कार! अक्की दूये जो प्‍यार सोगी नमस्कार करा

²¹मैंई तुसिओ अपणै हत्था सितै नमस्कार लिखदा।

²²अगर कोई प्रभु सोगी प्रेम ना रखा ता सो हरापित हा। हे इन्दै प्रभु अई!

²³इन्दै प्रभु यीशु री कृपा तूसु पुर भुन्दी रेय्आ

²⁴मेरा प्रेम मसीह यीशु मन्ज तूसु सबी सोगी रेय्आ। आमीन।