Read Gaddi 1 कुरिन्थियों 2 Bible Online

1 कुरिन्थियों 2 - Gaddi bible

1 कुरिन्थियों 2

¹हे विस्वासी भाईओ, अऊँ तूसु बलै ना ता चलाकी सोगी गल्ला करना आ अतै ना ही उतम ज्ञान रा दिखावा करना आ, पर अऊँ तूसु बल्लै प्रमात्मैं रै भेद जो प्रकट करना आ।

²क्ओकि मैंई ऐह ठाणी लैऊरा थू कि तुसिओ यीशु मसीह अतै तसेरी क्रूस पुर भच्छुरी मौत रै अलावा होर कुछ ना सखाऊ।

³अऊँ कमजोरी अतै डरा सोगी, अतै बड़ा कम्मदा अतै थरथरान्दा तूसु सोगी रैऊ।

⁴जैहणै मैंई तून्दै मन्जै प्रचार करू थू मैंई अपणै ज्ञान जो सावित ना करना चाऊ। मैंई सिर्फ ऐह कोशिश करी की प्रमात्मैं री आत्मा अपणै सामर्थ जो दसा।

⁵ठेरैतांये कि तून्दा विस्वास मणु रै ज्ञान पुर ना, पर प्रमात्मैं री सामर्थ पुर निर्भर भोआ।

⁶फिरी भी अहै आत्मिक रूपा सोगी सिद्ध मणु मन्ज ज्ञान हुणादै हिन, पर ऐस संसारा रा अतै ऐस संसारा रै नाश भूणैवाळै हाकमा रा ज्ञान ना, जैड़ा पल भर रा हा,

⁷पर अहै प्रमात्मैं रै गुप्त भेद रै ज्ञान रै बारै मन्ज दसदै हिन, जैसिओ प्रमात्मैं सनातन थऊँ इन्दी महिमा तांयें ठहराऊरा।

⁸संसार रै हाक्मे ऐस ज्ञान रै बारै मन्ज कुछ ना जाणु, क्ओकि अगर सो जाणदै ता तेजोमय प्रभु जो क्रूस पुर ना चढ़ान्दै।

⁹पर जियां पवित्रग्रन्था मन्ज लिखुरा कि, “जैड़ी गल्ला हाख्रिये ना हेरी अतै कना ना हुणी, अतै जैड़ी गल्ला मणु रै चित ना चड़ी, सो ही हिन जैड़ै प्रमात्मैं अपणै प्रेम रखणैवाळै तांयें तैयार करी हिन।”

¹⁰पर प्रमात्मैं तियां जो अपणी आत्मा रै द्धारा असु प्रेरिता पुर प्रकट करू, क्ओकि आत्मा सब गल्ला, बल्कि प्रमात्मैं री गूढ़ गल्ला भी जाँचदा हा।

¹¹मणु मन्ज कुण कसी मणु री गल्ला जाणदा, सिर्फ मणु री आत्मा जैड़ी तैस मन्ज हा। तियां ही प्रमात्मैं री गल्ला भी कोई ना जाणी सकदा, सिर्फ प्रमात्मैं रा आत्मा।

¹²पर अहै संसारा री आत्मा ना, पर सो आत्मा पाऊरा जैडा प्रमात्मैं री तरफा थऊँ हा कि अहै तियां गल्ला जो जाणन जैड़ी प्रमात्मैं असिओ दितुरी हिन।

¹³हरेक शब्द जैड़ा अहै बलदै हिन सो प्रमात्मैं री आत्मा असिओ सखाऊरा हा ना कि मणु रै ज्ञान सितै। ऐह ही प्रमात्मैं रा आत्मा इन्दी मदद करदा हा कि अहै आत्मिक गल्ला आत्मिक मणु जो सखान।

¹⁴पर मणु जैड़ै आत्मिक ना हिन प्रमात्मैं री आत्मा री इन्या सच्चाई जो ना पाई सकदै। ऐह सब कुछ तिन्या जो मूर्खता भरा लगदा हा अतै सो समझी ना पान्दै क्ओकि आत्मिक मणु ही आत्मा री गल्ला जो समझी सकदै हिन।

¹⁵जिन्यैं मणु पवित्र आत्मा पाऊरा हा सो सबी गल्ला जो समझी सकदै हिन जैतिओ पवित्र आत्मा सखांदा हा पर जिन्या मणु अन्दर पवित्र आत्मा निय्आ सो तिन्या मणु रै विचारा जो ना समझी सकदै जिन्या मन्ज पवित्र आत्मा हा।

¹⁶जियां पवित्रग्रन्था मन्ज लिखुरा कि, “क्ओकि प्रभु रा मन कुणी जाणुरा? कि तैसिओ सखाई सकदा?” “पर अहै मसीह रै विचारा जो समझी सकदै हिन।”