Read Gaddi 1 कुरिन्थियों 3 Bible Online

1 कुरिन्थियों 3 - Gaddi bible

1 कुरिन्थियों 3

¹हे विस्वासी भाईओ, अऊँ ऐस तरीकै सितै गल्ला ना करी सकू जियां आत्मिक मणु सोगी करी गान्दी हिन, तूसु सोगी मेरी गल्ला संसारिक मणु सांईयै ही थी, जैड़ै मसीह मन्ज हालि बच्चै हिन।

²मैंई तुसिओ दुध पिआऊ, अन्न ना खुआऊ; क्ओकि तुहै तैतिओ खाई ना सकदै थियै बल्कि हालि तक भी ना खाई सकदै हिन, अर्थात कि मैंई तुसिओ बचन री गहराई री गल्ला ना पर साधारण गल्ला ही सखाई हिन।

³क्ओकि तुहै हालि तक पापी स्वभाव द्धारा ही जिन्दगी जिन्दै हिन। ठेरैतांये कि जैहणै तूसु मन्ज डाह अतै झगड़ा भोआ, ता कै तुहै पापी स्वभाव रै ना हिन? अतै कै तुहै संसारिक मणु सांईयै जिन्दगी ना वितांदै?

⁴ठेरैतांये जैहणै अक्क बलदा, “अऊँ पौलुस रा हा,” अतै दुआ, “अऊँ अपुल्लोस रा हा,” ता कै तुहै संसारिक मणु सांईयै ना हिन?

⁵अपुल्लोस अतै अऊँ पौलुस सिर्फ साधारण सेवक ही हिन जिन्यै तुसिओ विस्वास मन्ज ईणै तांयै मदद करू पर प्रमात्मां ही हा जिनी सब कुछ करू।

⁶मैंई तून्दै दिला मन्ज प्रमात्मैं रै संदेश रा बी बाऊ, अतै अपुल्लोसे पाणी दिता, पर प्रमात्मां ही हा जिनी ऐतिओ बढ़ाऊरा।

⁷ठेरैतांये ना ता बी बाणैवाळै कुछ हा अतै ना सिंचनैवाळा, पर प्रमात्मां ही सब कुछ हा जैडा बढ़ाणैवाळा हा।

⁸प्रमात्मैं री नजरा मन्ज बी बाणैवाळै अतै सिंचनैवाळा दूनी री अक्क ही किमत हा, अतै दूनी जो प्रमात्मैं तंयारै कमा अनुसार इनाम दिणा।

⁹क्ओकि अहै प्रमात्मैं रै सहकर्मी हिन; तुहै प्रमात्मैं री खेती अतै प्रमात्मैं रा भवन भी हिन।

¹⁰जैडा वरदान प्रमात्मैं मिन्जो दितुरा हा तैत सोगी मैंई अक्क कुशल राजमिस्त्री सांईयै नियूँआ पाई अतै कोई होर मणु तैस कमा जो अगो बढ़ाऊ करदा हा, पर हरेक मणु चौकसी सोगी ऐसा कमा जो करदा गच्छा।

¹¹क्ओकि प्रमात्मैं पैहलै थऊँ ही यीशु मसीह जो अक्कमात्र नियूँआ सांईयै लगाई दितुरा हा अतै ठेरै बदलै कोई होर नियूँआ ना पाई सकदा।

¹²यदि कोई ऐसा नियूँआ पुर सोना या चाँदी या किमती पत्थर या लकड़ी या हरै घा या भू रा रद्दा रखा,

¹³ता तंयारै हरेक रै कम्मा री परख अगी सोगी करी गाणीआ क्ओकि न्याय रै दिन तैहा अगी हरेक रा कम परखणा कि किना हा।

¹⁴जैसेरा कम तैसा अगी मन्ज टिकी रैहणा, तैस इनाम पाणा।

¹⁵अगर मसीह ऐह घोषित करदा हा कि कसी मणु रा कम खरा निय्आ ता तैसिओ इनाम ना मुलणा पर तैस प्रमात्मैं द्धारा मिलणै बाळी सदा काल री जिन्दगी जो पाई लैणा।

¹⁶कै तुहै ना जाणदै कि तुहै प्रमात्मैं रा मन्दर हिन, अतै प्रमात्मैं रा आत्मा तूसु मन्ज वास करदा?

¹⁷अगर कोई प्रमात्मैं रै मणु री एकता जो नष्‍ट करला ता प्रमात्मैं तैसिओ नष्‍ट करना; क्ओकि प्रमात्मैं रा मन्दर पवित्र हा, अतै सो तुहै हिन।

¹⁸कोई अपणै आपा जो धोखा ना देय्आ। अगर तूसु मन्ज कोई संसार रै विचार रै अनुसार ज्ञानी समझदा हा ता अपणै आपा मूर्ख बणा ताकि तुहै सच मन्ज ज्ञानी बणी सकन।

¹⁹क्ओकि जिन्या गल्ला जो ऐह संसारा ज्ञान समझदा हा जो प्रमात्मैं री नजरा मन्ज मूर्खता हा, जियां पवित्रग्रन्था मन्ज लिखुरा, “प्रमात्मां ज्ञानी जो तंयारी चतुराई मन्ज फसाई दिन्दा हा,”

²⁰पवित्रग्रन्था मन्ज ऐह भी लिखुरा हा कि, “प्रभु जाणदा हा कि ज्ञानी मणु द्धारा बणाऊरी योजना व्यर्थ हिन।”

²¹ठेरैतांये कोई मणु रै करूरै कमा पुर घमण्ड़ ना करा, क्ओकि सब कुछ तून्दा हा

²²पौलुस, अपुल्लोस, अतै पतरस, ऐह संसार, जिन्दगी अतै मौत, वर्तमान अतै भविष्‍य सब कुछ तून्दा हा,

²³अतै तुहै मसीह रै हिन, अतै मसीह प्रमात्मैं रा हा।