Read Gaddi 1 कुरिन्थियों 4 Bible Online

1 कुरिन्थियों 4 - Gaddi bible

1 कुरिन्थियों 4

¹मणु मिन्जो अतै अपुल्लोस जो मसीह रै सेवक अतै प्रमात्मैं रै भेदा जो समझाणै बाळै भण्डारी समझन।

²सबी थऊँ जरूरी गल्ल ऐह हा कि ऐस तरह रा दास अपणै मालका रै प्रति बफादार भोआ।

³पर मिन्जो ऐसा गल्ला री कोई चिन्ता निय्आ कि तुहै या कोई होर मणु मेरा न्याय करन कि अऊँ बफादार हा कि ना, बल्कि अऊँ अप्पू भी अपणै आपा जो ना परखदा कि अऊँ किना हा।

⁴मेरा मन मिन्जो कसी गल्ला रा दोषी ना ठहरान्दा, पर ऐत थऊँ ऐह सावित ना भुन्दा कि अऊँ निर्दोष हा, क्ओकि मेरा परखणैवाळा प्रभु हा।

⁵ठेरैतांये प्रभु रै दोबारा ईणै तक कसी भी मणु रा न्याय मत करा। प्रमात्मैं ही अन्धकार री गल्ला जो ज्योती मन्ज अतै कसेरै दिला मन्ज कै हा सो सब प्रकट करना हा। प्रमात्मैं फिरी हरेक मणु री प्रशंसा करनी हा जैड़ा तठेरै लायक भोला।

⁶हे विस्वासी भाईओ, मैंई अपणा अतै अपुल्लोस रा उदाहरण तून्दै सामणै ठेरैतांये रखू हा कि तुहै ऐसा गल्ला रा अर्थ जाणी सकन कि, “पवित्रग्रन्था मन्ज जैडा लिखुरा हा तैत थऊँ अगो ना बढण।” ऐह खरा निय्आ कि तुहै अक्की मणु रा आदर करन अतै दूये जो तुच्छ समझन।

⁷कुणी तुसिओ दूये थऊँ वेहतर बणाऊ? जैड़ा तूसु बल्लै हा कै तैतिओ प्रमात्मैं ही ना दितुरा? अगर ऐसा हा ता तुहै घमण्ड़ किन्या करी सकदै हिन, कि मना सो तुसिओ तौहफै रै रूपा मन्ज ना मुळुरा हा?

⁸तुहै इआं सोचदै हिन कि तूसु बलै सब कुछ हा, तुहै इआं भी सोचदै हिन कि तुहै धनी भूच्ची चुकुरै, फिरी तुहै इआं सोचदै हिन कि तुहै राजै सांईयै राज्य करू; पर भला भुन्दा कि तुहै सच मन्ज राजा अतै राणी भुन्दै सो भी इन्दी मददा बगैर ता अहै भी तून्दै सोगी राज्य करदै।

⁹बल्कि मिन्जो कई बरी इन्या लगदा हा कि प्रमात्मैं असु प्रेरिता रा तमाशा बणाऊरा हा जिन्या लड़ाई थऊँ बाद बन्दी जयवन्त सेना रै पिचो चलुरै भुन्दै, जंयारी मौत पक्की हा अतै जैहणै सो मरदै हिन ता पूरै संसार रै मणु अतै स्वर्गदूत तिन्या जो हेरदै हिन।

¹⁰अहै मसीह री वजह थऊँ मूर्ख समझै गान्दै हिन, पर तुहै अपणै आपा जो बुद्धिमान समझदै हिन! अहै कमजोर हिन, पर तुहै अपणै आपा जो बलवान समझदै हिन। तुहै अपणै आपा री बड़ाई करदै हिन, पर इन्दा मणु निरादर करदै हिन।

¹¹अहै ऐस घड़ी तक भूखै प्यासै अतै नंगे हिन, अतै लत-मूक खान्दै हिन अतै मारै मारै फिरदै हिन;

¹²अतै अपणै ही हत्था सितै कम करीके मेहनत करदै हिन। मणु असिओ बुरा बलदै हिन। अहै आशीष दिन्दै हिन; सो सतांदै हिन, अहै सहदैं हिन।

¹³सो बदनाम करदै हिन, अहै नम्रता सोगी जवाव दिन्दै हिन। असिओ अज तक संसार रा कूड्‍डा अतै सब चिजा रै खुरचन सांईयै समझदै हिन।

¹⁴अऊँ तुसिओ ऐह गल्ला लज्जित करनै तांयें ना लिखदा, पर अपणै प्रेमी बच्चै जाणी करी तुसिओ चेतावनी दिन्दा।

¹⁵चाहे तुन्दी मसीह जिन्दगी मन्ज तुसिओ सिखाणैवाळै दस हजार भी भुन्दै, तांभी अऊँ ही तून्दा आत्मिक पिता हा। तुसिओ मसीह रै बारै मन्ज सखाणै सितै तुहै मेरै बच्चै बणी गै हिन।

¹⁶ठेरैतांये अऊँ तूसु सोगी बिनती करदा कि मिन्जो सांईयै चाल चला।

¹⁷ठेरैतांये मैंई तीमुथियुस जो जैडा प्रभु मन्ज मेरा प्यारा अतै विस्‍वासा लायक पुत्र सांईयै हा, तूसु बलै भैजु हा। तैस तुसिओ मसीह मन्ज मेरा चरित्र याद करवाणा, जियां कि अऊँ हर जगह हरेक कलीसिया मन्ज उपदेश करदा हा।

¹⁸तूसु मन्ज कुछ ता ऐसै घमण्‍ड़ी भूच्ची गच्छुरै हिन क्ओकि तुहै सोचुरा हा कि अऊँ तूसु सोगी मिलणै तांयै ना ईणै बाळा।

¹⁹पर प्रभुऐ चाऊ ता मुँ तूसु बलै जल्दी ही ईणा, अतै तियां घमण्‍ड़ी री गल्ला जो ना, पर तंयारी सामर्थ जो जाणी लैणा।

²⁰क्ओकि प्रमात्मैं रा राज्य गल्ला मन्ज ना पर सामर्थ मन्ज हा।

²¹तुहै कै चाहन्दै हिन? कै अऊँ ड़ण्डा लेई करी तूसु बलै ईच्छुं, या प्रेम या नम्रता री आत्मा सोगी?