Read Gaddi 1 कुरिन्थियों 6 Bible Online

1 कुरिन्थियों 6 - Gaddi bible

1 कुरिन्थियों 6

¹जैहणै तून्दा दूये विस्वासी सोगी लड़ाई-झगड़ा भोआ ता तुसिओ अक्क अधर्मी जजा बलै कचैहरी गाणै री जरूरत निय्आ। तुसिओ कलीसिया मन्ज ही विस्वासी जो दस्सी करी अपणी लड़ाई-झगड़ै रा फैसला करवाणा चहिन्दा।

²तुहै जाणदै हिन कि पवित्र मणु संसार रै मणु रा न्याय करना ठेरैतांये तुहै हल्कै थऊँ हल्कै झगड़ै रा सही फैसला करनै रै योग्य हिन।

³तुहै जाणदै हिन कि असु स्वर्गदूता रा न्याय करना ठेरैतांये अहै ऐस संसार री रोजा रै झगड़ै रा न्याय करी सकदै हिन।

⁴अगर तुसिओ जरूरी गल्ला रा न्याय करना भोआ ता कलीसिया मन्ज ही न्याय करी लेय्आ ताकि तून्दा न्याय अविस्वासी ना करन।

⁵कै तुसिओ शर्म ना इन्दी? तून्दै मन्जै अक्क ना अक्क बुद्धिमान मणु भूणा जैडा तून्दै अप्पू मन्ज भूणै बाळै झगड़ै जो निपटाई सकदा हा।

⁶अक्क विस्वासी दूये विस्वासी रै विरोधा मन्ज कचैहरी गान्दा अतै मौका दिन्दा कि अविस्वासी ठेरा फैसला करन।

⁷जैहणै तूसु मन्ज झगड़ै भुन्दै ता ऐह पता लगदा कि तुहै मसीह री मर्जी अनुसार ना जिऊ करदै। तूसु तांयै खरा ऐह हा कि कचैहरी गाणै रै बजाय अपणै भाई थऊँ थोड़ा नूकसान ही सही लेय्आ।

⁸तुहै ता अप्पू ही अपणै विस्वासी भाई सोगी अन्याय करदै अतै हानि पुजादैं हिन।

⁹कसी रै द्धारा धोखै मन्ज मत अईआ, तुहै जाणदै हिन कि ऐस तरह रै अन्यायी मणु, वेश्यागामी, मूर्तिपूजक, दूये री जनानी पुर नजर रखणैवाळै, लुच्चै, मर्दा पुर बुरी नजर रखणैवाळै,

¹⁰चोर, लोभी, पियक्कड़, गाळी दिणैबाळै अतै धोखा दिणैबाळै प्रमात्मैं रै राज्य रै वारिस ना भूणै।

¹¹तूसु मन्ज कुछ मणु पैहलै ऐसै थियै, पर तुसिओ पापा थऊँ शुद्ध करीके प्रमात्मैं तांयै अलग करया गो, तुसिओ प्रमात्मैं रै आत्मा द्धारा प्रभु यीशु मसीह री नजरा मन्ज धर्मी ठहराया गो।

¹²तूसु मन्ज कुछ मणु बलदै हिन कि, “अहै जैड़ा कुछ चाहन सो करी सकदै हिन।” पर अऊँ तूसु सोगी बलदा कि “सब कुछ असु तांयै खरा निय्आ” ठेरैतांये अऊँ कसी गल्ला जो मिन्जो पुर हक्क जमाणै रा अधिकार ना दिन्दा।

¹³तुहै ऐह भी बलदै हिन, “खाणा इन्दै शरीरा तांयें हा अतै शरीर खाणै तांयें हा,” पर अऊँ तूसु सोगी बलदा कि प्रमात्मैं इन्या दूनी जो नष्‍ट करना। असिओ अपणै शरीर द्धारा बुरै कम ना करना चहिन्‍दै, बल्कि शरीर जो प्रभु तांयें इस्तेमाल करना चहिन्दा हा, जैडा ठेरा मालक हा।

¹⁴प्रमात्मैं अपणी सामर्थ सितै प्रभु जो जीयाऊ, अतै तैस असिओ भी तैहा ही सामर्थ रै द्धारा जियाणा।

¹⁵तुहै जाणदै हिन कि तून्दा शरीर मसीह रै शरीरा रा अंग हा। ता कै अऊँ मसीह रै शरीरा रै अक्क हेस्सै जो वेश्या रै शरीर रा हेस्सा बणाऊँ? बिलकुल ना।

¹⁶तुहै जाणदै हिन कि जैडा कोई वेश्या सोगी सम्बध रखदा, सो तैहा सोगी अक्क तन भूच्ची गान्दा हा। क्ओकि पवित्रग्रन्था मन्ज लिखुरा हा कि, “सो दोनो अक्क तन भूणै।”

¹⁷पर जैडा प्रभु री संगति मन्ज रैहन्दा, सो तैस सोगी अक्क आत्मा भूच्ची गान्दा हा।

¹⁸व्यभिचार थऊँ बची रेय्आ। होर पाप शरीरा जो प्रभावित ना करदा जिन्या व्यभिचार करदा हा, क्ओकि जैडा व्यभिचार करदा हा सो अपणै ही शरीरा रै वरोधा मन्ज पाप करदा हा।

¹⁹तुहै जाणदै हिन कि तून्दा शरीर पवित्र आत्मा रा मन्दर हा। जैडा पवित्र आत्मा तून्दै अन्दर बसुरा हा सो प्रमात्मैं री तरफा थऊँ वरदान हा अतै तुहै अपणै ना हिन पर प्रभु रै हिन।

²⁰तुहै प्रमात्मैं अपणै पुत्रा री जिन्दगी री किमत दिकरी तुहै खरीदुरै हिन, ठेरैतांये अपणै शरीरा रै द्धारा प्रमात्मैं री महिमा करा।