Read Gaddi 1 कुरिन्थियों 7 Bible Online

1 कुरिन्थियों 7 - Gaddi bible

1 कुरिन्थियों 7

¹अबै अऊँ तियां सवाला रा जवाव दिणा जैडा तुहै अपणी पत्री मन्ज मिन्जो थऊँ पुछुरै हिन। तुहै पुछुरा थू कि, कै मणु तांयै बैह ना करना खरा हा?

²पर व्यभिचार करना अजकल अक्क आसान गल्ल हा ठेरैतांये अऊँ ऐह बलदा कि, हरेक मर्द बैह करा अतै अपणी घरावाळी रै प्रति बफादार रेय्आ, तिन्या ही हरेक जनानी भी।

³घरावाळा अपणी घरावाळी री यौन जरूरता जो पुरा करा; अतै तियां ही घरावाळी भी अपणै घरवाळै री।

⁴घरावाळी जो अपणै शरीरा पुर हक्क निय्आ पर तसारै घरवाळै रा हक्क हा; तियां ही घरवाळै जो भी अपणै शरीरा पुर हक्क निय्आ, पर घरावाळी रा हा।

⁵तुहै अक्की दूये थऊँ अलग ना रेय्आ; पर सिर्फ कुछ टैमां तक अप्पू मन्ज समझौते सितै कि प्रार्थना तांयें मौका मुळा, अतै फिरी अक्क सोगी रेय्आ; ऐसा ना भोआ कि तुहै अपणी इच्छा जो काबू ना करी सकन अतै शैतान तुसिओ परखा अतै तुहै व्यभिचार करन।

⁶पर अऊँ जैडा ऐह बलनै बाळा हा सो मेरी सलाह हा ना कि आज्ञा।

⁷अऊँ चाहन्दा कि जैसा अऊँ कुँवारा हा, तियां ही सब मणु भून; पर प्रमात्मां कुछ मणु जो बैह करनै रा वरदान दिन्दा अतै कुछ जो कुँवारै रैहणै रा।

⁸पर अऊँ कुँवारी अतै विधवा रै बारै मन्ज बलदा कि तियां तांयें ऐसा ही रैहणा खरा हा, जियां अऊँ हा।

⁹पर अगर सो संयम ना रखी सकन, ता बैह करी लैन; क्ओकि बैह करना कामातुर रैहणै थऊँ भला हा।

¹⁰जंयारा बैह भूच्ची गच्छुरा हा, तियां जो अऊँ ना बल्कि प्रभु आज्ञा दिन्दा कि घरावाळी अपणै घरवाळै थऊँ तलाक ना लेय्आ,

¹¹अतै अगर तलाक भी लैन, ता बिना बैह करूरै रैहन; या अपणै घरवाळै सोगी फिरी मेल करी लेन अतै ना घरावाळा अपणै घरावाळी जो तलाक देय्आ।

¹²अबै अऊँ तिन्या विस्वासी मणु सोगी बलदा जिन्यैं अविस्वासी सोगी बैह करूरा, अगर कसी विस्वासी मणु री घरावाळी प्रभु जो ना जाणदी भोआ, अतै तैस सोगी रैहणै थऊँ खुश भोआ, ता सो तैहा जो तलाक ना देय्आ।

¹³जैसा जनानी रा घरावाळा प्रभु जो ना जाणदा भोआ, अतै तसेरै सोगी रैहणै थऊँ सो खुश भोआ; सो अपणै घरवाळै जो तलाक ना देय्आ।

¹⁴अविस्वासी घरावाळा अपणी विस्वासी घरावाळी सोगी जुडणै री वजह थऊँ प्रमात्मैं री नजरा मन्ज ग्रहण योग्य भूच्ची गान्दा हा। तिन्या ही अविस्वासी घरावाळी भी अपणै विस्वासी घरावाळै सोगी जुडणै री वजह थऊँ प्रमात्मैं री नजरा मन्ज ग्रहण योग्य भूच्ची गान्दी हा। ऐस तरीकै तंयारी औलाद भी ग्रहण योग्य भूच्ची गान्दी हा, ना ता सो अविस्वासी बच्चै सांईयै भुन्दै।

¹⁵पर जैडा मर्द विस्वास ना रखदा, अगर सो तलाक लैणा चाह ता तैसिओ तलाक लैणा देय्आ। ऐसी दशा मन्ज सो विस्वासी घरावाळी बैह रै बन्‍धना थऊँ आजाद हा, क्ओकि प्रमात्मैं असिओ मेल मिलाप तांयें हैदुरा हा।

¹⁶विस्वासी घरावाळी तिजो किन्या पता कि तू अपणै घरावाळै रा उद्धार ना करी सकदी? अतै विस्वासी घरावाळै तिजो किन्या पता कि तू अपणै घरावाळी रा उद्धार ना करी सकदा?

¹⁷हर कलीसिया मन्ज अऊँ मणु सोगी ऐह बलदा हा कि, तैस ही हालात मन्ज रेय्आ जिन्या जैहणै प्रभु यीशु तुसिओ चुणुरा थू अतै प्रमात्मैं अपणा बणनै तांयै हैदुरा। अबै अऊँ सो ही गल्ल तुसिओ बल्लू करदा हा।

¹⁸उदाहरण तांयै जैडा खतना करूरा हैदुरा भोआ, सो खतनारहित ना बणा। जैडा खतनारहित हैदुरा भोआ, सो खतना ना करा।

¹⁹खतना करना अतै खतना ना करना जरूरी गल्ल ऐह निय्आ। पर प्रमात्मैं री आज्ञा जो मनणा ही सब थऊँ जरूरी गल्ल हा।

²⁰हरेक जन तैस ही हालात मन्ज रेय्आ जिन्या जैहणै प्रभु यीशु तुसिओ चुणुरा हा।

²¹उदाहरण तांयै अगर तू दास री दशा मन्ज हैदुरा भोआ ता चिन्ता मत कर; पर अगर तेरा मालक बल्ला कि तू आजाद हिन ता तू गिच्ची सकदा हा।

²²याद रखा जैहणै तुसिओ प्रमात्मैं चुणुरा थू अगर तुहै दास थियै ता अबै तुहै प्रभु मन्ज आजाद हिन। तिन्या ही अगर जैहणै प्रभुऐ तुसिओ चुणु तुहै आजाद थियै ता तुहै अबै मसीह रै दास हिन।

²³प्रमात्मैं तुसिओ बड़ी किमत दिकरी खरीदुरा हा, ठेरैतांये कसी होरी रा दास मत बणा।

²⁴हे विस्वासी भाईओ तैसा ही हालात मन्ज रेय्आ जिन्या जैहणै प्रभु यीशु तुसिओ चुणुरा थू अतै प्रमात्मैं अपणा बणनै तांयै हैदुरा हा।

²⁵कुँवारी कुल्ळी तांयै बारै मन्ज प्रभु री कोई आज्ञा मिन्जो ना मुलुरी, पर अऊँ जैडा भरोसै योग्य हा प्रभु री दया अनुसार अपणी तरफा थऊँ सलाह दिन्दा।

²⁶क्ओकि अजकल सबी विस्वासी सब जगह क्‍लेश रा सामना करू करदै हिन ठेरैतांये अऊँ सलाह दिन्दा हा कि तूसु तांयै ऐह करना भला हा कि जैड़ै कुँवारै हिन सो कुँवारै अतै जैड़ै शादीशुदा हिन सो शादीशुदा रैहन।

²⁷अगर तेरी घरावाळी हा, ता तैहा थऊँ अलग भूणै री कोशिश ना कर; अतै अगर तेरी घरावाळी निय्आ, ता घरावाळी री तोप मत पा।

²⁸पर अगर तू बैह भी करा ता पाप निय्आ; अतै अगर कुँवारी रा बैह भोआ ता कोई पाप निय्आ। जैड़ा बैह करना चाहन्दै हिन तिन्या बडै़ दुखा रा सामना करना हा अतै अऊँ तिन्या दुखा थऊँ बचाणा चाहन्दा।

²⁹हे विस्वासी भाईओ, अऊँ ऐह बलदा कि मसीह रै दोबारा ईणै तांयै ज्यादा टैमं निय्आ, ठेरैतांये अबै थऊँ लेई करी जंयारी घरावाळी हिन सो सिर्फ बैह पुर ही ना पर सेवा पुर भी ध्यान लगान।

³⁰जैड़ै ऐस टैमं रोऊ करदै या खुशी मनाऊ करदै हिन, या जैड़ै चिजा जो खरीदू करदै हिन, सो रूणै मन्ज, खुशी मन्ज या अपणी जायदात मन्ज ना डूबी रैहन।

³¹जैड़ै ऐस संसारा री चिजा जो इस्तेमाल करू करदै हिन सो ठेरै ही ना भूच्ची गाहन, क्ओकि असिओ पता हा कि ऐस संसारा रा अन्त जल्दी भूणै बाळा हा।

³²अऊँ ऐह चाहन्दा कि तुसिओ ऐस संसार री चिन्ता ना भोआ। अक्क कुँवारा मर्द प्रभु री सेवा करनै मन्ज अपणै टैमां जो दी सकदा हा, अतै ऐसा गल्ला जो सोचदा हा कि प्रभु जो कियां खुश रखा।

³³पर शादीशुदा मर्द जो ऐस संसार मन्ज जिम्मेवारी रै प्रति सोचणा पैन्दा हा कि अपणी घरावाळी जो कस तरीकै खुश रखा।

³⁴शादीशुदा अतै कुँवारी मन्ज भी फर्क हा कुँवारी प्रभु री चिन्ता मन्ज रैहदिंआ कि सो शरीर अतै आत्मा दूनी मन्ज पवित्र भोआ, पर शादीशुदा संसारा री चिन्ता मन्ज रैहदिंआ कि अपणै घरवाळै जो खुश रखा।

³⁵अऊँ ऐह गल्ल तून्दै ही फायदै तांयें बलदा ना कि तुसिओ फसाणै तांयें, बल्कि अऊँ तुन्दी मदद करना चाहन्दा हा कि तुहै सही तरीकै जिन्दगी जी सकन, अतै सबी थऊँ बड़ी करी ऐह कि तुहै प्रभु सोगी प्रेम करी सकन।

³⁶अगर कोई ऐह समझा कि मैंई अपणी कुँवारी कुल्ळी रा बैह ना भूणा दिता, जेहा री जवानी ढळू करदी हा, ता तसारा पिता जियां चाह तियां करी सकदा, ऐत मन्ज कोई पाप निय्आ, सो तैहा रा बैह भूणा देय्आ।

³⁷पर अगर सो अपणै मना मन्ज ऐह फैसला करी लैन्दा, अतै तैसिओ जरूरत ना भोआ, बल्कि अपणी इच्छा पुर नियंत्रण रखदा ता सो तैसा अपणी कूळी जो कुँवारी रखी करी खरा करदा हा।

³⁸ठेरैतांये जैडा कुँवारी रा बैह करी दिन्दा, सो खरा करदा, अतै जैडा बैह ना करदा, सो होर भी खरा करदा।

³⁹जैहणै तांयें कसी जनानी रा घरावाळा जिन्दा हा, तैहणै तक तैसा जो तैस सोगी रैहणा पैणा हा; पर अगर घरावाळा मरी गच्छा ता सो जैस सोगी चाह तैस सोगी बैह करी सकदिआ, पर सिर्फ विस्वासी सोगी।

⁴⁰पर अऊँ सोचदा हा कि तैहा ज्यादा खुश रैहणा अगर सो बैह ना करदी ता, अतै अऊँ समझदा कि प्रमात्मैं री आत्मा ऐसा गल्ला जो करनै मन्ज मेरी अगुवाई करू करदा हा।