Read Gaddi 1 कुरिन्थियों 9 Bible Online

1 कुरिन्थियों 9 - Gaddi bible

1 कुरिन्थियों 9

¹अऊँ आजाद हा, अऊँ अक्क प्रेरित हा, मैंई प्रभु यीशु जो हेरूरा हा अतै मैंई तैस पुर विस्वास करनै जो तुन्दी अगुवाई करूरी हा।

²अगर होर मणु ऐह विस्वास करनै जो तैयार ना हिन कि अऊँ प्रभु यीशु रा प्रेरित हा, पर विस्वासी भाईओ तुसिओ ता जरूर मनणा चहिन्दा क्ओकि सुसमाचार मैंई ही तूसु बलै अन्दा थू। तून्दा यीशु मसीह पुर विस्वास ऐसा गल्ला जो सावित करदा कि अऊँ पक्का यीशु मसीह रा प्रेरित हा।

³जैड़ै मेरै प्रेरित भूणै रै अधिकार पुर सवाल उठान्दै हिन, तियां तांयें ऐह ही मेरा जवाव हा।

⁴मेरै अतै बरनबास तांयै प्रेरित भूणै री वजह थऊँ ऐह अधिकार हा कि अहै अपणै सेवकाई तांयै खाणा या आर्थिक मदद लेई सकन।

⁵जिन्या होर प्रेरित अतै प्रभु रै भाई अतै पतरस अपणी घरावाळी जो सफर मन्ज अप्पू सोगी लेई गान्दै हिन मिन्जो बलै भी ऐह अधिकार हा कि अऊँ कसी मसीह बैहणी सोगी बैह करीके तैहा सोगी लेई गच्छूं।

⁶कै सिर्फ मिन्जो अतै बरनबास जो ही जरूरी हा कि असिओ अपणी जिन्दगी जो पालणै तांयै कमाणा चहिन्दा?

⁷कुण कदी बिना तन्खाई रै सपाई रा कम करदा? कुण अंगुरा रै बगीचे लाई करी तठेरा फळ ना खान्दा? कुण भैड़ा री रखबाळी करीके तंयारा दुध ना पिन्दा?

⁸अऊँ ऐह गल्ला मणु रै विचारा रै आधार पुर ना बल्लू करदा क्ओकि मूसा री व्यवस्था भी ऐह ही गल्ल बलदी हा कि,

⁹“बान्दै टैमैं चलदै बाल्दा रा मुँह ना बनणा।” कै प्रमात्मां बाल्दा री ही फिकर करदा?

¹⁰ना! ऐह खास करीके असु तांयें ही बलदा अतै असु तांयें ही लिखुरा हा। क्ओकि खरा हा कि जोतणैवाळा उम्मीद सोगी जोतदा रेय्आ अतै बाणैबाळा भागी भूणै री उम्मीद सितै बान्दा रेय्आ।

¹¹ता जैहणै कि अहै तुसिओ सुसमाचार हुणाऊ, ता तुहै जे अगर इन्दी मदद करी हा ता कै ऐह तूसु तांयै मुसकल गल्ल हा?

¹²अगर तुहै तंयारी जैड़ै तून्दै मन्जै प्रचार करदै हिन मदद करदै, ता कै इन्दा तिन्या थऊँ भी ज्यादा अधिकार निय्आ कि तुहै इन्दी मदद करन? पर अहै ऐस अधिकार रा कदी भी इस्तेमाल ना करू, अतै अहै मसीह रै सुसमाचार जो हुनाणै तांयै सब कुछ सैहणै जो तैयार हिन ताकि कसकि जो मसीह पुर विस्वास करनै तांयै अहै रूकावट ना बणन।

¹³तुहै पक्का जाणदै हिन कि जैडा मन्दरा मन्ज सेवा करदै हिन तिन्या जो मन्दरा थऊँ खाणा मिलदा हा, अतै जैड़ै वेदि री सेवा करदै हिन तिन्या जो वेदि पुर बलिदान चढ़ाऊरै रा हेस्सा मिलदा हा।

¹⁴ऐसा ही रीति सितै प्रभुऐ भी ठहराऊरा कि जैड़ै मणु सुसमाचार हुणादै हिन, तंयारी जरूरत तिन्या मणु द्धारा पूरी करी गाहन जैड़ै सुसमाचार जो हुणदै हिन।

¹⁵पर मैंई ईयां थऊँ कोई भी अधिकार रा इस्तेमाल ना करू, मैंई ऐह सब गल्ला ठेरैतांये ना लिखी कि मिन्जो तांयें ऐसा करया गच्छा, क्ओकि ऐत थऊँ ता मेरा मरना ही भला कि कोई मेरै घमण्ड़ जो बेकार ठहरा।

¹⁶मिन्जो कोई अधिकार निय्आ कि अऊँ सुसमाचार हुनाणै पुर घमण्ड़ करू। मिन्जो ता ऐह करनै रा हूक्म हा, अतै मिन्जो तांयै ऐह भयानक गल्ल हा कि अऊँ सुसमाचार रा प्रचार ना करू।

¹⁷क्ओकि अगर अपणी मर्जी सितै ऐह करदा ता मजदूरी मिन्जो मुलदीआ, पर अऊँ ऐतिओ जिम्मेवारी समझी करी करू करदा क्ओकि प्रमात्मैं मिन्जो ऐह कम दितुरा हा।

¹⁸ता मेरी मजदूरी कै हा? सो ऐह हा कि मिन्जो मुफ्‍त मन्ज सुसमाचार हुनाणै रा मौका मुळुरा हा, ठेरैतांये जैहणै अऊँ सुसमाचार हुणान्दा अऊँ कसी भी अपणै अधिकार री मांग ना करदा।

¹⁹अऊँ आजाद मणु हा अतै मेरा कोई मालक निय्आ, अऊँ सबी मणु रा दास बणी गान्दा हा ताकि कईआ जो मसीह बलै अणी सकू।

²⁰अऊँ यहूदी मणु तांयें यहूदी बणु ताकि यहूदी मणु जो मसीह मन्ज अणी सकू। जैड़ै मणु व्यवस्था रै अधीन हिन अऊँ भी तिन्या तांयै व्यवस्था रै अधीन बणु ताकि तियां मणु जो व्यवस्था थऊँ नकाळी करी मसीह मन्ज अणी सकू।

²¹जैहणै अऊँ गैर यहूदी सोगी हा जैड़ै व्यवस्था रा पालन ना करदै अऊँ भी व्यवस्था थऊँ दूर रैहन्दा ताकि अऊँ तिन्या जो मसीह मन्ज अणी सकू, पर अऊँ प्रमात्मैं री व्यवस्था जो अनदेखा ना करदा अऊँ मसीह री व्यवस्था जो मन्दा हा।

²²अऊँ कमजोरा तांयें कमजोरा सांईयै बणु कि कमजोरा जो मसीह मन्ज अणी सकू। अऊँ सब मणु तांयें सब कुछ बणु कि कसी रीति मन्ज कईआ जो बचाई सकू।

²³अऊँ ऐह सब कुछ ठेरैतांये करदा हा कि सुसमाचार जो फैलाई सकू अतै तठेरी आशीष मन्ज भागीदार भूच्ची सकू।

²⁴तुहै जाणदै हिन कि जिन्या दौड़ मन्ज ता दौड़दै मतै हिन, पर इनाम अक्क ही जो मिलदा हा। तुहै भी इन्या दौड़ा की मसीह थऊँ इनाम पाई सकन।

²⁵सब खिलाड़ी अपणी तैयारी रै दौरान ऐसै इनाम पाणै तांयै अनुशासन भूच्ची गान्दै हिन जठेरा रंग रूप जल्दी धुँधला भूच्ची गाणा। पर अहै ऐह सब सदा काल रै इनाम जो पाणै तांयै करदा हा।

²⁶ठेरैतांये अऊँ सिधा अन्तिम लाईना री कनारी दौडदा, अऊँ तैस मुक्कैवाज सांईयै हा जैडा अपणै मुक्कै जो हवा मन्ज ना मारदा बल्कि सही नशाने पुर मारदा हा।

²⁷अऊँ अपणै शरीरा जो अपणै वशा मन्ज लैईन्दा अतै अपणा गुलाम बणांदा ताकि अऊँ होरी जो सुसमाचार हुनाणै थऊँ बाद अपणै इनाम जो ना गुआई दिच्छु।