Read Gaddi 2 कुरिन्थियों 2 Bible Online

2 कुरिन्थियों 2 - Gaddi bible

2 कुरिन्थियों 2

¹मैंई अपणै मना मन्ज ऐह ठाणी लैऊरा थू कि फिरी तुसिओ दुख दिणा ना ईणा।

²क्ओकि अगर मैंई तुसिओ दुखी करू, ता मिन्जो खुशी दिणैबाळा कुण भूणा, सिर्फ सो ही हिन जिंआ जो मैंई दु:खी करूआ?

³अतै सो पत्री जैड़ी मैंई तुसिओ पैहलै ठेरैतांये लिखुरी थी कि करखी ऐसा ना भोआ कि मेरै ईणै पुर, जियां थऊँ मिन्जो खुशी मुळना चहिन्दी अऊँ तियां थऊँ दु:खी भूचु; क्ओकि मिन्जो तूसु सबी पुर ऐसा गल्ला रा भरोसा हा कि जैड़ी मेरी खुशी हा, सो ही तूसु सबी रा भी हा।

⁴बड़ै क्‍लेश अतै मना रै कष्‍ट सितै मैंई मतै सारै हाख्री रै टिपळै बहाई करी तुसिओ पत्र लिखुरा थू, ठेरैतांये ना कि तुहै उदास भून पर ठेरैतांये कि तुहै तैस बड़ै प्रेमा जो जाणी लैन, जैडा मिन्जो तूसु सितै हा।

⁵अऊँ कुछ बढ़ाई चढ़ाईकरी गल्ल ना करू करदा पर जिनी मणुऐ ऐह समस्या पैदा करूरी हिन तिनी मिन्जो थऊँ ज्यादा तुसिओ दुखी करू हा।

⁶ऐसै मणु जो ऐह दण्ड जैडा विस्वासी भाई लोग दिन्दै आये हिन सो काफी हा।

⁷ठेरैतांये ऐत थऊँ भला ऐह हा कि तसेरा अपराध माफ करा अतै शान्ती देय्आ, ऐसा ना भोआ कि सो मणु बड़ी उदासी मन्ज डूबी गच्छा।

⁸ऐस कारण अऊँ तूसु सोगी बिनती करदा कि तैसिओ अपणै प्रेमा रा सवूत देय्आ।

⁹क्ओकि मैंई ठेरैतांये भी लिखु थू कि तुसिओ परखी लैऊ कि तुहै मेरी सब गल्ला जो मनणै तांयें तैयार हिन कि ना।

¹⁰जैसेरा तुहै कुछ माफ करदै हिन तैसिओ अऊँ भी माफ करदा हा, क्ओकि मैंई भी जैडा कुछ माफ करूरा भोला, सो मसीह रै अधिकार सोगी माफ करूरा कि तुसिओ फायदा भोआ,

¹¹कि शैतान इन्दा गलत फायदा ना उठाई सका, क्ओकि अहै तसेरी बुरी चाल जो जाणदै हिन।

¹²जैहणै अऊँ मसीह रा सुसमाचार हुनाणै जो त्रोआस शहर आ, अतै प्रभुऐ मिन्जो सुसमाचार प्रचार करनै तांयै अक्क मौका दिता,

¹³मेरै मना मन्ज चैन ना मुळु क्ओकि तीतुस तूसु सोगी मिलीकरी तुन्दी खबर लेई करी मिन्जो बलै ना आ। ठेरैतांये मुँ त्रोआस शहर रै विस्वासी थऊँ विदा भूच्ची करी तीतुस जो तोपणा मकिदुनिया परदेस जो चली गो।

¹⁴पर प्रमात्मैं रा धन्यवाद भोआ क्ओकि अहै मसीह सोगी जुड़ी गच्छुरै हिन तैस बलै जय हा अतै सो इन्दी अगुवाई करदा अपणै ज्ञान जो खुशबु सांईयै इन्दै द्धारा हर जगह फैलाणै मन्ज।

¹⁵क्ओकि ऐह जैड़ी मसीह री खुशबु हा सो उद्धार पाणैवाळै अतै नाश भूणैवाळै दोनो अलग तरीकै महसुस करदै हिन।

¹⁶कुछ तांयें ता मरनै सांईयै मृत्यु री बदबु, अतै कैतनै तांयें जिन्दगी रै निमित जिन्दगी री खुशबु। अतै कोई अपणै आप ऐहा खुशबु जो ना फैलाई सकदा।

¹⁷क्ओकि अहै तियां मतै मणु सांईयै ना हिन जैड़ै प्रमात्मैं रै बचन मन्ज मिलावट करदै ताकि फायदा भोआ; पर अहै मना री सच्चाई सितै अतै प्रमात्मैं रै अधिकार सितै प्रमात्मैं जो हाजिर मनी करी मसीह मन्ज बलदै हिन।