Read Gaddi 2 कुरिन्थियों 4 Bible Online

2 कुरिन्थियों 4 - Gaddi bible

2 कुरिन्थियों 4

¹जैहणै असु पुर तसेरी दया भूई, कि असिओ प्रमात्मैं रै बचन हुनाणै री ऐह सेवा मुळी हा ठेरैतांये अहै हिम्मत ना छड़दै।

²पर अहै लज्जा रै कम अतै गुप्त कमा जो त्यागी दिता, अतै ना चतुराई सितै चलदै, अतै ना प्रमात्मैं रै बचना मन्ज मिलावट करदै हिन; पर सच्चाई जो प्रगट करीके, प्रमात्मैं रै सामणै हरेक मणु ऐह गवाही दिन्दै हिन कि ऐह सच हा।

³पर अगर इन्दै सुसमाचार पुर पर्दा पेऊरा हा, ता ऐह नष्‍ट भूणैवाळै ही तांयें पेऊरा हा।

⁴अतै तियां अविस्वासी तांयें, जंयारी बुद्धि शैतानै जैड़ा ऐस संसारा रा भगवान हा अंधी करी दितुरी हा, ताकि मसीह जैडा प्रमात्मैं रा प्रतिरूप हा, तसेरै तेजोमय सुसमाचार रा प्रकाश तियां पुर ना चमका।

⁵क्ओकि अहै अपणा ना पर यीशु मसीह रा प्रचार करदै हिन कि सो प्रभु हा; अतै अपणै बारै मन्ज ऐह बलदै हिन कि अहै यीशु री वजह थऊँ तून्दै सेवक हिन।

⁶ठेरैतांये सबी थऊँ पैहलै प्रमात्मैं बल्लू, “अन्धकार मन्ज ज्योती चमका,” अतै प्रमात्मैं सो समझ इन्दै दिला मन्ज ज्योती सांईयै दितुरी हा ताकि अहै प्रमात्मैं री महिमा जो हेरन जैड़ी यीशु मसीह द्धारा प्रकट भूई।

⁷पर अहै प्रमात्मैं द्धारा दितुरै ऐस किमती धना जो अपणै शरीरा मन्ज लेई करी फिरदै हिन जैड़ा चिक्का रै बरतना सांईयै नाजुक हा, कि ऐह बड़ी सामर्थ इन्दी कनारी थऊँ ना पर प्रमात्मैं री ही कनारी थऊँ ठहरा।

⁸अहै कई किस्मा रै क्‍लेश ता भोगदै हिन, पर नाश ना भुन्दै; उलझन ता हिन, पर निराश ना भुन्दै;

⁹सताऐ ता गान्दै हिन, पर त्यागै ना गान्दै; गिराए ता गान्दै हिन, पर नष्‍ट ना भुन्दै।

¹⁰अहै सदा मौती रै खतरै मन्ज जिन्दै हिन जियां यीशु मरू, कि यीशु री जिन्दगी जो मणु इन्दै कमा रै द्धारा हेरी सकन।

¹¹क्ओकि अहै जिन्दै जी सर्वदा यीशु री वजह थऊँ मौती रै खतरै मन्ज रैहन्दै हिन कि यीशु री जिन्दगी भी इन्दै मरनहार शरीरा मन्ज प्रगट भोआ।

¹²ऐस तरीकै अहै सदा मौत रा ता सामना करदै हिन ताकि तुहै अनन्त जिन्दगी पान।

¹³ठेरैतांये अहै प्रचार करदै रैहन्दै हिन कि असु मन्ज सो ही विस्वास हा जठेरै बारै मन्ज भजन री कताबा मन्ज लिखुरा हा, “मैंई ता विस्वास करू, ठेरैतांये मैंई बल्लू।” ता अहै भी प्रमात्मैं पुर विस्वास करदै हिन, ठेरैतांये बलदै हिन।

¹⁴क्ओकि अहै जाणदै हिन कि जिनी प्रभु यीशु जो जीयाऊ, तैस असिओ भी यीशु मन्ज भागी जाणी करी जियाणा, अतै तून्दै सोगी प्रमात्मैं सामणै उपस्थित करना।

¹⁵क्ओकि जैड़ा कुछ कष्‍ट रा अहै सामना करू हा सो तूसु तांयें हिन, ताकि प्रमात्मैं रा अनुग्रह ज्यादा थऊँ ज्यादा मणु जो मसीह बलै अणी सका अतै सो मणु प्रमात्मैं रा धन्यवाद अतै महिमा ज्यादा थऊँ ज्यादा करी सकन।

¹⁶ठेरैतांये अहै हिम्मत रखदै हिन अगर इन्दा शरीर नष्‍ट भुन्दा गान्दा हा, तांभी इन्दी आत्मा हरेक दिन नोई भुन्दी गान्दी हा।

¹⁷क्ओकि इन्दा पल भर रा हल्का जिन्‍ना क्‍लेश असु तांयें बड़ा ही जरूरी अतै अनन्त महिमा पैदा करदा गान्दा हा;

¹⁸अतै अहै तिन्या तकलीफा पुर ध्यान ना दिन्दै जिन्या जो अहै हेरी सकदै हिन पर तैड़ी ध्यान लगान्दै हिन जैतिओ अहै हेरी ना सकदै। क्ओकि हेरूरी चिजा थोड़ै ही दिन री हिन, पर अनदेखी चिजा सदा बणी रैहन्‍दी हिन।