Read Gaddi 2 कुरिन्थियों 5 Bible Online

2 कुरिन्थियों 5 - Gaddi bible

2 कुरिन्थियों 5

¹क्ओकि अहै जाणदै हिन कि जैहणै इन्दा शरीर जैड़ा तम्बू सांईयै थोड़ै दिना तक ऐसा धरती पुर हा नष्‍ट भूच्ची गाणा, ता असिओ प्रमात्मैं री तरफा थऊँ स्वर्गा मन्ज अक्क ऐसा घर मुळना जैडा हत्था सितै बणुरा घर निय्आ; पर सदा स्थिर रहणैबाळा हा।

²पर जैहणै अहै इन्या शरीरा मन्ज हिन ता अहै कराहन्दै अतै बड़ा लालच रखदै हिन कि अपणै तैस शरीरा जो पैहनी लैन जैड़ा प्रमात्मैं सोगी भूणा।

³जैहणै असिओ सो स्वर्गीय शरीर मुळी गाणा ता इन्दा आत्मा शरीर रै बिना ना भूणा।

⁴अतै अहै अपणै शरीरा मन्ज बोझ सितै दबुरै कराहन्दै रैहन्दै हिन, क्ओकि अहै ऐस संसारिक शरीरा जो उतारना ना चाहन्दै अतै स्वर्गीय शरीरा जो पैहनणा चाहन्दै हिन ताकि इन्दा ऐह नाशवान शरीर खत्म भूच्ची गच्छा अतै अहै अविनाशी शरीर पान।

⁵प्रमात्मैं असिओ ऐस नोए शरीर जो पाणै तांयें तैयार करूरा हा अतै तिनी असिओ बयाने मन्ज पवित्र आत्मा भी दितुरा हा।

⁶ता अहै सदा हिम्मत रखदै हिन अतै ऐह जाणदै हिन कि जैहणै तक अहै शरीरा मन्ज रैहन्दै हिन, तैहणै तक प्रभु थऊँ अलग हिन।

⁷क्ओकि अहै ऐस संसारा मन्ज प्रभु जो हेरी करी ना, पर प्रभु पुर विस्‍वासा सितै चलदै हिन।

⁸ठेरैतांये अहै हिम्मत रखदै हिन, अतै मरनै थऊँ बाद शरीरा थऊँ अलग भूच्ची करी प्रभु सोगी रैहणा होर भी खरा समझदै हिन।

⁹ऐसा ही वजह थऊँ इन्दै मना री उमंग ऐह हा कि चाहे अहै तैस सोगी स्वर्गा मन्ज रैहन चाहे ऐस धरती पुर रैहन, पर अहै तैसिओ पसन्द इन्दै रैहन।

¹⁰क्ओकि असु सबीओ मसीह रै न्याय-सिंहासन रै सामणै हाजिर भूणा जरूरी हा कि हरेक रै भलै अतै बुरै कम्मा रा बदला मुळा, जैडा तिन्यै अपणै शरीरा रै द्धारा करूरै हिन।

¹¹ठेरैतांये प्रभु रा डर मनी करी अहै मणु सोगी बिनती करदै हिन कि सो सच्चाई पुर विस्वास करन; अतै प्रमात्मां असिओ पूरै तरीकै जाणदा हा कि अहै कैतनै ईमानदार हिन अतै मेरी उम्मीद ऐह हा कि तुहै भी तैसिओ जाणन।

¹²अहै फिरी भी अपणी बड़ाई तून्दै सामणै ना करदै, बल्कि अहै अपणै बारै मन्ज घमण्ड़ करनै रा मौका दिन्दै हिन कि तुहै तियां जो जवाव दि सकन, जैड़ै मना पुर ना पर दिखावटी गल्ला पुर घमण्ड़ करदै हिन।

¹³अगर कोई बलदा कि अहै पागल हिन ता प्रमात्मैं तांयें हिन, अतै अगर अहै चतन्‍न हिन ता तून्दै फायदै तांयें।

¹⁴क्ओकि मसीह रा प्रेम असिओ विवश करी दिन्दा हा; ठेरैतांये कि अहै जाणदै हिन जैहणै मसीह सबी मणु तांयें मरू ता अहै सब मणु तसेरी मौत मन्ज सहभागी भूच्ची गै।

¹⁵मसीह ऐस तरीकै सबी मणु तांयें मरू कि जैड़ै जिन्दै हिन सो अबै अपणै तांयें ना जीन पर तैस तांयें जैडा तियां तांयें मरू अतै फिरी जी ऊठु।

¹⁶ता अबै थऊँ अहै कसी जो भी संसारिक नजरा सितै ना हेरदै। अहै पैहलै मसीह जो भी संसारिक नजरा सितै हेरू पर अबै ऐसा ना करदै।

¹⁷ठेरैतांये अगर कोई मणु मसीह मन्ज हा ता सो नोई रचना हा पुराणी जिन्दगी खत्म भूच्ची गई हा अतै नोई जिन्दगी शुरू भूच्ची गई हा।

¹⁸ऐह सब गल्ला प्रमात्मैं री कनारी थऊँ हिन, जिनी मसीह रै द्धारा अपणै सोगी इन्दा मेल-मिलाप करी लैऊ, अतै मेल-मिलाप री सेवा असिओ सौंपी दिती हा।

¹⁹अर्थात प्रमात्मैं मसीह मन्ज भूच्ची करी अपणै सोगी संसारा रा मेल-मिलाप करी लैऊ, अतै मणु रै अपराधा रा दोष तियां पुर ना लाऊ, अतै प्रमात्मैं मेल-मिलाप रा बचन असिओ सौंपी दिता हा।

²⁰ठेरैतांये अहै मसीह रै राजदूत हिन; मना प्रमात्मां इन्दै द्धारा बिनती करू करदा हा कि अहै मसीह री तरफा थऊँ तूसु सोगी निवेदन करदै हिन कि प्रमात्मैं सोगी मेल-मिलाप करी लेय्आ।

²¹मसीह कोई भी पाप ना करूरा थू, तैस जो ही प्रमात्मैं इन्दै तांयें पाप ठहराऊ कि अहै मसीह मन्ज भूच्ची करी प्रमात्मैं री नजरा मन्ज धर्मी बणी गान, क्ओकि मसीह इन्दै पाप री सजा अपणै ऊपर लेई।