Read Gaddi 2 कुरिन्थियों 6 Bible Online

2 कुरिन्थियों 6 - Gaddi bible

2 कुरिन्थियों 6

¹अहै जैड़ै प्रमात्मैं सोगी कम करनै बाळै हिन ऐह बिनती करदै हिन कि तसेरा अनुग्रह जैड़ा तूसु पुर भूआ, तैतिओ सही तरीकै सोगी इस्तेमाल करा।

²क्ओकि पवित्रग्रन्था मन्ज लिखुरा कि, “ठीक टैमैं मैंई तेरी हुणी लेई, अतै उद्धार रै दिन मन्ज मैंई तेरी मदद करी।” हुणा, ऐह ठीक टैमं हा; हेरा, हबजु सो उद्धार रा दिन हा।

³अहै प्रमात्मैं सोगी कम करनै रै नातै कसी भी गल्ला मन्ज कसिओ मौका ना दिन्दै कि कोई इन्दी सेवा पुर दोष लगाई सका।

⁴अहै हर गल्ला सितै प्रमात्मैं रै सेवका रै समान अपणै सदगुणा जो प्रगट करदै हिन, बड़ै धैर्य सोगी, क्‍लेशा मन्ज, दरिद्रता सोगी, संकट सोगी,

⁵कोड़ै खाणै सोगी, कैद भूणै सोगी, हौ हल्लै सोगी, मेहनत सोगी, जागदै रैहणै सोगी, भूखै रखणै थऊँ,

⁶पवित्रता सोगी, ज्ञान सोगी, धीरज सोगी, कृपालुता सोगी, पवित्र आत्मा सोगी अतै सच्चै प्रेम सोगी,

⁷अहै इमानदारी सोगी सच्चाई रा प्रचार करदै हिन अतै प्रमात्मैं री सामर्थ इन्दै अन्दर कम करदा हा। अहै धार्मिकता रै हथियारा रा इस्तेमाल खब्बै-सजै हत्था सितै करदै हिन।

⁸अहै प्रमात्मैं री सेवा करदै हिन चाहे मणु इन्दा आदर करन या निरादर, चाहे मणु असिओ खरा समझन या बदनाम करन। फिरी भी अहै ईमानदार हिन पर मणु असिओ कपटी बलदै हिन।

⁹अहै अनजाण मणु सांईयै हिन, तांभी अहै प्रसिद्ध हिन, अहै मौत रै करीब हिन अतै हेरा जिन्दै हिन, अहै मती मार खाई हा पर प्राणा थऊँ ना मारै गै।

¹⁰अहै मतै सारै दुख उठायै हिन पर सदा खुशी मंनादै हिन, अहै अप्पू ता कंगाल हिन, पर मतै जो आत्मिक धनवान बणाई दिन्दै हिन; अहै ऐसै हिन जियां बलै कुछ निय्आ तांभी सब कुछ रखदै हिन।

¹¹हे कुरिन्थियों रै विस्वासिओ, अहै खुलीकरी तूसु सोगी गल्ला करी, अहै तूसु सोगी दिला री गहराई सोगी प्‍यार करदै हिन।

¹²इन्दै प्यारा री तूसु तांयें कोई सीमा निय्आ पर तून्दा प्‍यार असु तांयें सीमित हा।

¹³पर अऊँ अपणै बच्चै सांईयै तुसिओ बलदा कि तुहै भी तठेरै बदलै मन्ज अपणै दिला री गहराई सोगी प्‍यार करा।

¹⁴अविस्वासी सोगी जैड़ा बराबर जुंगळा निय्आ तैत मन्ज मत जोत्रिया, क्ओकि धार्मिकता अतै अधर्म रा कै मेल-जोल? या ज्योती अतै अन्धकार रा कै साथ?

¹⁵अतै मसीह रा शैतान सोगी कै लगाव? या विस्वासी सोगी अविस्वासी रा कै नाता?

¹⁶अतै मूर्ति सोगी प्रमात्मैं रै मन्दरा रा कै सम्बन्ध? क्ओकि अहै ता जिन्दै प्रमात्मैं रै मन्दर हिन; जियां प्रमात्मैं पवित्रग्रन्था मन्ज बलुरा हा, “मुँ तियां मन्ज बसणा अतै तियां मन्ज चलना फिरना; अतै अऊँ तंयारा प्रमात्मां हा, अतै सो मेरै ही मणु भूणै।”

¹⁷ठेरैतांये प्रभु पवित्रग्रन्था मन्ज बलदा, “अविस्वासी रै मन्जै थऊँ नकैई अईआ अतै अलग रेय्आ; अतै अशुद्ध चिजा जो मत छुआ, ता मुँ तुसिओ ग्रहण करना;

¹⁸अतै मुँ तून्दा पिता भूणा, अतै तुहै मेरै बेटे अतै बेटी भूणै।” ऐह सर्वशक्तिमान प्रभु प्रमात्मैं रा बचन हा।