Read Gaddi 2 कुरिन्थियों 8 Bible Online

2 कुरिन्थियों 8 - Gaddi bible

2 कुरिन्थियों 8

¹अबै हे विस्वासी भाईओ, अहै तुसिओ प्रमात्मैं रै तैस अनुग्रह रा समाचार दिन्दै हिन जैड़ा मकिदुनिया परदेस री सब कलीसिया रै विस्वासी पुर भूआ।

²कि क्‍लेशा री बड़ी परीक्षा मन्ज तंयारै बड़ै आनन्द अतै भारी कंगालपन मन्ज तंयारी उदारता बड़ी बदी गई।

³तंयारै बारै मन्ज मेरी ऐह गवाही हा कि तियैं ना सिर्फ ऐतना दिता, जैतना तियां तांयै सम्भव थू पर तियैं अपणी इच्छा सितै अपणै सामर्थ थऊँ ज्यादा ही दिता।

⁴अतै ऐस दान जो यरूशलेम नगर मन्ज रैहणै बाळै विस्वासी री सेवा मन्ज भागी भूणै रै सौभाग्य पाणै रै बारै मन्ज, असु सोगी बार बार बिनती करी,

⁵अतै जियां अहै उम्मीद करी थी तियैं तैत थऊँ ज्यादा दिता, तियैं पैहलै अपणै आपा जो प्रभु जो दी दिता अतै फिरी असिओ जियां प्रमात्मैं री इच्छा थी।

⁶ठेरैतांये अहै तीतुस जो समझाऊ कि जियां तिनी पैहलै शुरू करूरा थू, तियां ही तून्दै मन्जै ऐस दान रै कम्मा जो पुरा भी करी लेय्आ।

⁷ठेरैतांये तुहै जियां हर गल्ला मन्ज अर्थात विस्वास, उत्साह दिणैबाळै बचन, ज्ञान अतै सब तरह रै यत्न मन्ज, अतै तैस प्रेम मन्ज जैडा असु सोगी रखदै हिन, बढ़दै गान्दै हिन, ऐस तरीकै ही गरीब विस्वासी जो दान दिणै रै कम्मा मन्ज भी बढ़दै गच्छा।

⁸अऊँ ऐह हूक्म री रीति पुर ना, पर दूये रै उत्साह री तुलना सोगी तून्दै प्रेम री सच्चाई जो परखणै तांयें बलदा हा।

⁹तुहै इन्दै प्रभु यीशु मसीह रै अनुग्रह जो जाणदै हिन कि सो अमीर भूच्ची करी भी तूसु तांयें कंगाल बणी गो, ताकि तसेरै कंगाल भूच्ची गाणै थऊँ तुहै आत्मिक अमीर भूच्ची गान।

¹⁰ऐसा गल्ला मन्ज मेरी सलाह ऐह ही हा तूसु तांयें ऐह खरा हा, जैडा अक्की साला थऊँ ना ता सिर्फ ऐस कम्मा जो करनै री शुरूआत मन्ज ही, पर ऐसा गल्ला जो चाहणै मन्ज भी पैहलै थियै,

¹¹ठेरैतांये अबै ऐह कम पुरा करा कि जियां इच्छा करनै मन्ज तुहै तैयार थियै, तियां ही अपणी पूंजी रै अनुसार पुरा भी करा।

¹²जैड़ा तुहै दिच्छु करदै हिन सो असु ग्रहण करना अगर तुहै तठेरै अनुसार खुशी सोगी देय्आ जैड़ा तूसु बलै हा, ना कि तठेरै अनुसार जैड़ा तूसु बलै निय्आ।

¹³इन्दा मतलब ऐह निय्आ कि तून्दै दान दिणै रै द्धारा दूये री जिन्दगी जो आसन करू अतै तुन्दी जिन्दगी जो कठण करू बल्कि दूनी सोगी बराबरी रा व्यवहार करू।

¹⁴पर बराबरी रै विचार थऊँ ऐस टैमैं तुन्दी बढ़ती तंयारी घटी मन्ज कमै अईआ, ताकि तंयारी बढ़ती भी तुन्दी घटी मन्ज कम अईआ कि बराबरी भूच्ची गच्छा।

¹⁵जियां पवित्रग्रन्था मन्ज लिखुरा हा, “जिनी मता बटोरू तसेरा कुछ ज्यादा ना नकैऊ, अतै जिनी थोड़ा बटोरू तैसिओ कुछ कमी ना भूई।”

¹⁶प्रमात्मैं रा धन्यवाद भोआ, जिनी तूसु तांयें सो उत्साह तीतुस रै मना मन्ज पाई दिता

¹⁷जैहणै अहै तैसिओ बल्लू कि तूसु सोगी मुळा ता सो मनी गो बल्कि उत्साही भूच्ची करी सो अपणी इच्छा सोगी तूसु बलै गो।

¹⁸अहै तीतुस सोगी अक्क होर विस्वासी भाई जो भी भैजु जैसेरा नां सुसमाचार रै बारै मन्ज सब कलीसिया मन्ज फैलुरा हा;

¹⁹अतै ऐतना ही ना, पर सो कलीसिया रै विस्वासी द्धारा ठहराऊरा भी हा कि ऐस दान रै कम्मा तांयें असु सोगी गच्छा। अहै ऐह यरूशलेम रै मणु तांयै दान दिणै री सेवा ठेरैतांये करदै हिन कि प्रभु री महिमा प्रगट भूच्ची गच्छा अतै अहै ऐस कमा तांयै उत्सुक हिन।

²⁰अहै ऐस गल्ला मन्ज चौकस रहन्दै हिन कि ऐस उदारता रै कम्मा रै बारै मन्ज जसेरी अहै सेवा करदै हिन, कोई असु पुर दोष ना लगा।

²¹क्ओकि जैड़ी गल्ला सिर्फ प्रभु ही रै नेड़ै ना पर मणु रै नेड़ै भी भली हिन अहै तंयारी चिन्ता करदै हिन।

²²अहै तीतुस सोगी अक्क होर विस्वासी भाई जो भी भैजु, जैसिओ अहै बार बार परखी करी बड़ी गल्ला मन्ज उत्साही पाऊ; पर अबै तूसु पुर तसेरा बड़ा भरोसा हा, ऐस वजह थऊँ सो होर भी उत्साही हिन।

²³अगर कोई तीतुस रै बारै मन्ज पूछा, ता सो मेरा साथी अतै तूसु तांयें मेरा सहकर्मी हा, अतै अगर इन्दै विस्वासी भाई रै बारै मन्ज पूछा, ता सो कलीसिया रै भैजुरै प्रेरित अतै मसीह जो आदर दिणैबाळै हिन।

²⁴ठेरैतांये अपणा प्रेम अतै इन्दा सो घमण्ड़ जैडा तून्दै बारै मन्ज हा कलीसिया रै सामणै सिद्ध करीके तियां जो दसा।