Read Gaddi 2 कुरिन्थियों 9 Bible Online

2 कुरिन्थियों 9 - Gaddi bible

2 कुरिन्थियों 9

¹अबै तैसा दान दिणै री सेवा रै बारै मन्ज जैडा यरूशलेम रै मणु तांयें करी गान्दीआ, मिन्जो तुसिओ लिखणा जरूरी निय्आ।

²क्ओकि अऊँ दान तून्दै दिणै री उत्सुकता जो जाणदा हा, जसेरी वजह थऊँ अऊँ तून्दै बारै मन्ज मकिदुनिया परदेस रै विस्वासी रै सामणै घमण्ड़ दसदा कि तुहै अखया परदेस रै मणु अक्क साल थऊँ मदद करनै जो उत्सुक हिन, अतै तून्दै उत्साह अतै मतै जो भी उभारू हा।

³पर मैंई तीतुस सोगी दोई विस्वासी भाई जो ठेरैतांये भैजु कि अहै जैडा घमण्ड़ तून्दै बारै मन्ज दसु, सो ऐस गल्ला मन्ज बेकार ना ठहरा; पर जियां मैंई बल्लू तियां ही तुहै यरूशलेम रै विस्वासी जो दान दिणै जो तैयार रेय्आ,

⁴ऐसा ना भोआ कि कुछ मकिदुनिया परदेस रै विस्वासी मेरै सोगी अईआ अतै तुसिओ दान दिणै जो तैयार ना हेरा, ता ऐस भरोसै री वजह थऊँ अहै तूसु थऊँ शर्मिन्दा भून अतै ना तुहै भी शर्मिन्दगी महसुस करन।

⁵ठेरैतांये मैंई विस्वासी भाई सोगी ऐह बिनती करना जरूरी समझू कि सो पैहलै थऊँ ही तूसु बलै गान, अतै तुन्दी उदारता री भावना जसेरै बारै मन्ज पैहलै थऊँ ही बचन दितुरा थू, तैयार करी रखन कि ऐह दबाव सोगी ना पर उदारता री भावना सोगी तैयार भून।

⁶पर गल्ल ऐह हा; जैडा थोड़ा बान्दा तैस कटणा भी थोड़ा; अतै जैडा मता बान्दा तैस कटणा भी मता।

⁷हरेक जन जियां मना मन्ज सोचा तियां ही दान करा; ना कुढ़ी-कुढ़ी अतै ना ही दबाव सोगी, क्ओकि प्रमात्मां खुशी सोगी दिणैबाळै सोगी प्रेम रखदा।

⁸प्रमात्मां तुन्दी सबी जरूरता जो तुसिओ उदारता सोगी पुरा करी सकदा हा जैत थऊँ तूसु बलै सो सब कुछ सदा भूणा जैड़ा तूसु तांयै जरूरी हा, तूसु बलै ऐतना बची गाणा कि तुहै तैतिओ होरी सोगी भी बड़ी सकदै हिन।

⁹जियां पवित्रग्रन्था मन्ज लिखुरा हा, “प्रमात्मां उदारता सोगी गरीबा जो दिन्दा, तसेरी धार्मिकता सदा बणी रैहणी हा”

¹⁰प्रमात्मां ही हा जैडा बाणैवाळै जो बी अतै खाणै तांयें रोटी दिन्दा, तैस ही तरीकै तैस तुसिओ बधाणा अतै उदारता री फसल सोगी तुसिओ फलबन्त करना।

¹¹प्रमात्मां तुसिओ हर गल्ला मन्ज आशीष दिणिआ कि तुहै उदारता सोगी सदा दी सकन, अतै जैहणै असु ऐह तिन्या गरीबा तक पुजाणा ता तिन्या प्रमात्मैं रा धन्यवाद करना हा।

¹²क्ओकि ऐस सेवा जो पुरा करनै थऊँ ना सिर्फ यरूशलेम रै विस्वासी मणु री जरूरता पूरी भुन्दी हिन, पर मणु री तरफा थऊँ प्रमात्मैं रा धन्यवाद भुन्दा हा।

¹³क्ओकि ऐस दान री सेवा जो सवूत रै तौर पुर प्रमात्मैं री महिमा प्रकट करदै हिन कि तुहै मसीह रै सुसमाचार जो मनी करी तसेरै अधीन रेय्आ, अतै गरीब विस्वासी अतै सबी री मदद करनै मन्ज उदारता प्रकट करदै हिन।

¹⁴अतै गरीब विस्वासी तूसु तांयें प्रमात्मैं सितै प्रार्थना करदै हिन; क्ओकि सो मणु तूसु सोगी बड़ा प्‍यार करदै हिन अतै सो जाणदै हिन कि प्रमात्मैं तूसु पुर बड़ा अनुग्रह करू हा।

¹⁵प्रमात्मां रा, तसेरै दान यीशु मसीह तांयें जैडा वर्णन थऊँ बाहर हा, धन्यवाद भोआ।