Read Gaddi गलातियों 1 Bible Online

गलातियों 1 - Gaddi bible

गलातियों 1

¹ऐह पत्री पौलुस जैडा यीशु मसीह रा प्रेरित हा, सबी विस्वासी भाई सोगी मिलीकरी गलातिया परदेस री कलीसिया जो लिखु करदा। मिन्जो ना ता मणु रै द्धारा अतै ना ही मणु रै अधिकारा रै द्धारा नियुक्त करू, बल्‍की यीशु मसीह अतै पिता प्रमात्मां री तरफा थऊँ चुणुरा हा जिनी यीशु जो मरूरै थऊँ जिन्दा करू।

³अऊँ प्रार्थना करदा हा कि इन्दा पिता प्रमात्मां अतै प्रभु यीशु मसीह तुसिओ अनुग्रह अतै शान्ती देय्आ।

⁴यीशुऐ इन्दै प्रमात्मैं अतै पिता री इच्छा रै मुताबक अपणै आपा जो इन्दै पापा तांई बलिदान करी दिता ताकि असिओ ऐस संसार रै मणु रै बुरै असर थऊँ छुड़ाई लेय्आ।

⁵अऊँ ऐह प्रार्थना करदा कि मणु प्रमात्मैं री स्तुति सदा-सदा करदै रैहन। आमीन।

⁶मिन्जो हैरानगी भुन्दी हा कि प्रमात्मैं तुसिओ मसीह रै जैस अनुग्रह सितै हैदुरा तैस थऊँ तुसै इतनी जल्दी फिरी करी होरी किस्‍मां रै सुसमाचार पुर विस्वास करना लगी पै हिन।

⁷अक्क ही सचा सुसमाचार हा पर कुछ मणु मसीह रै ऐस सुसमाचार जो खत्म करना चाहन्दै हिन अतै तिन्यै तुसिओ उलझन मन्ज पाई दितुरा हा।

⁸पर जे असु थऊँ या स्वर्गा थऊँ भी कोई स्वर्गदूत ऐस सुसमाचारा जो छड़ी करी जैडा अहै तूसु जो हणाऊरा हा, कोई होर शिक्षा देय्आ ता प्रमात्मां तैसिओ हराप देय्आ।

⁹जिआं कि अहै पैहलै बल्ली चुकुरै हिन कि, तिन्या फिरी बल्‍दा, कि ऐस सुसमाचार जो छड़ी करी जैतिओ तुसै मनुरा हा, जे कोई होर शिक्षा हुणान्दा ता प्रमात्मां तैसिओ हराप देय्आ।

¹⁰अऊँ मणु जो खुश ना करना चाहन्दा, पर प्रमात्मैं जो खुश करना चाहन्दा। अगर अऊँ हालि तिकर मणु जो ही खुश करदा रैहन्दा ता मसीह रा दास ना भुन्दा।

¹¹हे विस्वासी भाईओ अऊँ तूसु जो बताई दिन्दा कि जैडा सुसमाचार मैंई हणाऊरा सो मणु रै विचारा रै अनुसार निय्आ।

¹²क्ओकि सो मिन्जो मणु थऊँ ना मुळुरा अतै ना मिन्जो कसी सखऊरा, पर यीशु मसीह ही मिन्जो तैस सुसमाचार जो सखाऊरा हा।

¹³यहूदी दल मन्ज जैडा पैहलै मेरा चाल-चलन थू तठेरै बारै मन्ज तुसै हुणी चुकुरै हिन, कि अऊँ प्रमात्मैं रै मणु जो बड़ा सतान्दा थू जैड़ै मसीह रै पिचो चलदै थियै अतै नाश करनै री कोशिश करदा थू।

¹⁴अतै अपणै मतै सारै जाती भाई जो जैड़ै कि मेरी उमरा रै थियै तिन्या थऊँ ज्यादा बढीकरी अऊँ अपणै बाप-दादै री शिक्षा जो सिखदा अतै पालन करदा थू।

¹⁵पर मेरै जन्म भूणै थऊँ पैहलै ही प्रमात्मैं मिन्जो चुणी लैऊ अतै अपणै अनुग्रह सोगी हैदु। ता ऐह तैसिओ खरा लगु कि

¹⁶अपणै पुत्रा जो मेरै द्धारा प्रकट करा कि अऊँ गैर यहूदी मन्ज तसेरा सुसमाचार हुणाऊ, ता मैंई कसी मणु थऊँ ठेरै बारै मन्ज सलाह ना लेई।

¹⁷अतै ना यरूशलेम शहर जो गो जेठी मिन्जो थऊँ पैहलै यीशु रै प्रेरित थियै पर जतूणी जल्दी भुच्‍ची सका अऊँ अरब देश जो चली गो अतै फिर दमिश्क शहर जो फिरी आ।

¹⁸फिरी त्राई साला बाद अऊँ प्रेरित पतरस सोगी मुळन तांयै यरूशलेम शहरा जो गो अतै तैस बल्लै पन्‍द्रह दिन तिकर रैऊ।

¹⁹पर प्रभु रै भाई याकूब जो छड़ी करी अऊँ कसी होरी प्रेरिता सितै ना मुळु।

²⁰जैड़ी गल्ला अऊँ तुसिओ लिखु करदा, प्रमात्मां जाणदा हा कि, ऐ सची हिन।

²¹यरूशलेम शहर थऊँ अऊँ सीरिया अतै किलिकिया रै परदेस मन्ज आ।

²²पर यीशु मसीह रै विस्वासी जैड़ै यहूदिया परदेस मन्ज रैहन्दै थियै, सो मिन्जो सोगी पैहलै कदी ना मुळुरै थियै।

²³पर तिन्यै ऐह ही हुणुरा थू कि जैडा असु जो पैहलै सतान्दा थू सो तैस ही यीशु मसीह रा सुसमाचार हुणाऊ करदा हा, जैस जो सो पैहलै नाश करनै री कोशिश करू करदा थू।

²⁴ता सो विस्वासी मिन्जो हेरी करी प्रमात्मैं री महिमा करू करदै थियै, क्ओकि प्रमात्मैं मिन्जो बदली दिता, पैहलै अऊँ मणु जो सताणै बाळा थू अबै मसीह रा चेला बणी गच्छुरा हा।