Read Gaddi गलातियों 3 Bible Online

गलातियों 3 - Gaddi bible

गलातियों 3

¹ओ निर्बुद्धि गलातियों परदेस रै विस्वासी मणुओ, कुन्‍नी तूसु जो लालच मन्ज फसाई लैऊ हा? अहै तुसिओ गहराई सोगी दसुरा हा कि यीशु मसीह क्ओ क्रूस पुर मरू फिरी तुहै क्ओ इन्या गल्ला जो भुली करी फिरी गै।

²अऊँ तूसु थऊँ सिर्फ ऐह जाणना चाहन्दा कि तुहै प्रमात्मैं री आत्मा जो व्यवस्था रै पालन करनै थऊँ पाऊ या सुसमाचार रै हुणनै थऊँ अतै विस्वास करनै थऊँ पाऊरा?

³तुहै कैतनै निर्बुद्धि हिन कि तुहै अपणी मसीह जिन्दगी जो पवित्र आत्मा मन्ज शुरू करनै थऊँ बाद अबै तुहै क्ओ मणु री रीति सितै सिद्ध भूणै री कोशिश करू करदै हिन।

⁴तुहै सुसमाचार री वजह थऊँ बड़ा दुख सहू कै सो बेकार भूआ? पर अऊँ उम्मीद रखदा बिलकुल बेकार ना भूआ।

⁵अऊँ तूसु थऊँ दोबारा पूछदा हा कि कै व्यवस्था रा पालन करनै थऊँ प्रमात्मां तुसिओ अपणा पवित्र आत्मा दान करदा अतै तूसु मन्ज सामर्थ रै कम करदा? बिलकुल ना! पर ऐह ठेरै कारण हा कि तुहै यीशु मसीह रा सुसमाचार हुणु अतै ऐत पुर विस्वास करू।

⁶“अब्राहमे ता प्रमात्मैं पुर विस्वास करू, अतै ऐह तैस तांयें धार्मिकता गिणी गई।”

⁷ता ऐह जाणी लेय्आ कि जैड़ै अब्राहम सांईयै प्रमात्मैं पुर विस्वास करनै बाळै हिन, सो ही अब्राहम री सच्ची औलाद हिन।

⁸कई साल पैहलै पवित्रग्रन्थ मन्ज बलुरा हा कि प्रमात्मां गैर यहूदी जो तंयारै विस्वास रै द्धारा धर्मी ठहराई करी ग्रहण करना हा, ठेरैतांये प्रमात्मैं अब्राहम सोगी तैस सुसमाचार जो बल्लू कि “तेरी वजह थऊँ सबी जाति रै मणु अशीर्वाद पाणा।”

⁹ठेरैतांये जैडा कोई मसीह पुर विस्वास करदै हिन सो तैस अशीर्वाद मन्ज भागी भूणै जैड़ा अब्राहमे अपणै विस्वास सितै पाऊरा थू।

¹⁰पर जैड़ा व्यवस्था पुर भरोसा करदै ताकि सो प्रमात्मैं री नजरा मन्ज धर्मी बणी सकन, सो सब प्रमात्मैं रै हराप रै अधीन हिन, क्ओकि पवित्रग्रन्था मन्ज लिखुरा हा, “जैडा कोई व्यवस्था री कताबा मन्ज लिखुरी सब गल्ला जो करनै मन्ज स्थिर ना रैहन्दा, सो हरापित हा।”

¹¹पर ऐह गल्ल साफ हा कि कोई भी प्रमात्मैं री नजरा मन्ज व्यवस्था रा पालन करनै रै द्धारा धर्मी ना बणी सकदा। पवित्रग्रन्था मन्ज लिखुरा कि “धर्मी जन विस्‍वासा सोगी जिन्दा रैहन्दा हा।”

¹²पर व्यवस्था रा विस्वास सोगी कोई रिश्ता निय्आ; पर जिन्या पवित्रग्रन्थ बलदा हा “जैस व्यवस्था री सबी गल्ला जो मनणा तैस जिन्दा रैहणा।”

¹³मसीह जैडा असु तांयें हरापित बणु, तिनी असिओ खरीदी करी व्यवस्था रै हराप थऊँ छुड़ाऊँ, क्ओकि पवित्रग्रन्था मन्ज लिखुरा हा, “जैडा कोई क्रूस पुर लटकाया गान्दा सो हरापित हा।”

¹⁴यीशु मसीह रै द्धारा प्रमात्मैं गैर यहूदी जो सो ही अशीर्वाद दितुरा जैडा तिनी अब्राहम सोगी वायदा करूरा थू। ताकि अहै जैड़ै विस्वासी हिन सो विस्वास सोगी ही तैस पवित्र आत्मा जो पान जठेरी प्रतिज्ञा भच्छुरी थी।

¹⁵हे, विस्वासी भाईओ, हरेक दिन री जिन्दगी थऊँ ऐठी अक्क उदाहरण हा। जैस तरीकै अक्क अटल प्रतिज्ञा जो ना कोई बदली सकदा ना कोई टाळी सकदा, तैस तरीकै ही ऐस गल्ला मन्ज ऐसा ही हा।

¹⁶ता प्रतिज्ञा अब्राहम जो अतै तसेरै वंश जो दिती। पवित्रग्रन्थ ऐह मतै रै बारै मन्ज ना बलदा, “वंशा जो,” पर अपणै अक्क बच्चै रै बारै मन्ज बलदा हा कि “तेरै वंश जो” अतै सो मसीह हा।

¹⁷अऊँ ऐह बलणै री कोशिश करू करदा कि जैडा वायदा प्रमात्मैं अब्राहम सोगी करूरा थू तैसिओ चंऊर सौ तीह साला बाद ना टाळी सकदै जैहणै प्रमात्मैं मूसा जो व्यवस्था दितुरी हा, अगर प्रमात्मां ऐसा करदा ता सो अपणै वायदै जो त्रोड़ी दिन्दा।

¹⁸अगर विरासत व्यवस्था जो मनणै थऊँ मुळी सकदी हा ता सो प्रमात्मैं रै वायदै जो ग्रहण करनै रा परिणाम ना भूणा। पर प्रमात्मैं अनुग्रह रै द्धारा अब्राहम सोगी वायदा करूरा थू।

¹⁹फिरी व्यवस्था कजो दिती? सो वायदै रै बाद दिती गई थी ताकि मणु जो तंयारै पापा रा पता लगी सका पर व्यवस्था तैहणै तक बणी रैहणै जो बणाई गई जैहणै तक सो वायदा करूरा बच्चा ना इन्दा। प्रमात्मैं ऐह व्यवस्था स्वर्गदूता रै द्धारा मूसा जो दितुरी थी जैड़ा मणु अतै प्रमात्मैं रै मन्जै मध्यस्थ थू।

²⁰मध्यस्थ रा कम तैहणै भुन्दा हा जैहणै अक्क थऊँ ज्यादा मणु जो वायदै करनै भून। पर प्रमात्मां जैडा अक्क ही हा तिनी अब्राहम जो वायदा दिणै तांयै कसी मध्यस्थ रा इस्तेमाल ना करू।

²¹ता कै प्रमात्मैं री व्यवस्था अतै प्रमात्मैं रै वायदै रै मन्ज कुछ टकराव हा? बिलकुल ना! अगर व्यवस्था असिओ नोई जिन्दगी दी सकदी थी ता अहै व्यवस्था रा पालन करीके प्रमात्मैं री नजरा मन्ज धर्मी बणी सकदै थियै।

²²पर पवित्रग्रन्थ ऐह साफ बलदा कि अहै सब पाप रै अधीन हिन, ता यीशु मसीह पुर विस्वास करनै रै द्धारा ही अहै प्रमात्मैं री आजादी रा नौआ वायदा पाई सकदै हिन।

²³पर यीशु मसीह पुर विस्वास रा रस्ता असिओ मुळन थऊँ पैहलै व्यवस्था री अधीनता मन्ज इंदी रखवाली भुन्दी थी। सो विस्वास रा रस्ता जैडा प्रकट भूणै बाळा थू, तैहणै तक अहै व्यवस्था रै ही बन्‍धना मन्ज रैह।

²⁴व्यवस्था मसीह रै ईणै तक अक्क रक्षक सांईयै थी। जैहणै यीशु मसीह आ ता अहै यीशु मसीह पुर विस्वास करनै रै द्धारा प्रमात्मैं री नजरा मन्ज धर्मी बणी गै।

²⁵पर अबै जैहणै अहै मसीह पुर विस्वास करी लैऊ हा ता असिओ व्यवस्था री जरूरत निय्आ कि सो इन्दी रक्षा करा।

²⁶जैहणै तून्दा मसीह रै नां सितै बपतिस्मा भूआ ता तुहै मसीह रै स्वभाव जो पैहनी लैऊ। जैहणै तुहै यीशु मसीह पुर भरोसा करदै हिन ता तुहै सब प्रमात्मैं री औलाद बणी गान्दै हिन।

²⁸यीशु मसीह मन्ज विस्वास असिओ अक्क बराबर करी दिन्दा हा चाहे अहै यहूदी भून या गैर यहूदी, गुलाम भून या आजाद, मर्द भून या जनानी।

²⁹अतै अगर तुहै मसीह रै हिन ता अब्राहम रै टबरा रै हेस्सा बणी गै हिन ता तुसिओ सो मुळना जैड़ा प्रमात्मैं वायदा करूरा हा।