Read Gaddi इफिसियों 2 Bible Online

इफिसियों 2 - Gaddi bible

इफिसियों 2

¹अतै तिनी तूसु जो भी जिन्दा करू, जैड़ै कि अपणै अपराधा अतै पापा री व्जहा थऊँ आत्मिक रूपा सितै मरूरै थियै।

²तुहै भी पैहलै पाप मन्ज रैहन्दै थियै जियां बाकी संसार तैस शैतान रै हत्था मन्ज हा जैड़ा ऐस दुनिया री अनदेखी शक्ति रा सरदार हा, सो ही आत्मा तंयारै दिला मन्ज कम करदा जैड़ै प्रमात्मैं रै मुताबक ना चलदै थियै।

³इआं सबी मन्ज अहै भी पैहलै अपणै जीवन जो इन्या ही बितान्‍दै थियै, अपणै पापी स्वभाव अतै इच्छा जो पुरा करदै थियै, असल मन्ज अहै भी सबी सांईयै प्रमात्मैं रै क्रोध रै भागी थियै।

⁴पर प्रमात्मां जैडा कि दया रा धनी हा अपणै तैस बड़ै प्यारा री व्जहा थऊँ जैत सितै कि तिनी असु सितै प्‍यार करू,

⁵जैहणै कि अहै अपराधा री व्जहा थऊँ आत्मिक रूपा सितै मरूरै थियै ता असु जो मसीह सोगी जिन्दा करू। अनुग्रह सितै ही तून्दा उद्धार भच्छुरा।

⁶प्रमात्मैं असिओ मरूरै थऊँ जीयाऊ अतै यीशु मसीह सोगी स्वर्गीय जगह मन्ज बहाली दिता।

⁷तिनी ऐह करू कि सो ईणैबाळै टैमां मन्ज दस्सी सका कि सो असु पुर कैतना ज्यादा दयालु हा, क्ओकि अहै मसीह यीशु सोगी जुडुरै हिन।

⁸प्रमात्मैं पुर विस्‍वासा री व्जहा थऊँ ही अनुग्रह सितै तून्दा उद्धार भछुरा अतै ऐह तून्दै कम्मा सितै ना बल्कि प्रमात्मैं रा दान हा।

⁹उद्धार इन्दै भलै कर्मा री व्जहा थऊँ निय्आ ताकि कोई ऐसा गल्ला पुर घमण्ड़ ना करा।

¹⁰क्ओकि अहै तसेरी खास रचना हिन अतै मसीह यीशु मन्ज तियां भलै कमां तांई रचुरै हिन जिआं जो प्रमात्मैं पैहलै थऊँ ही असु जो करनै तांई तैयार करूरा हा।

¹¹ऐत तांई याद रखा कि तुहै जैड़ै जन्म थऊँ ही गैर यहूदी हिन तून्दा यहूदी मणु मजाक उड़ान्दै थियै क्ओकि तुहै खतना ना करूरा थू पर तिन्यै करूरा थू। सो जैडा रवाज करदै हिन सो सिर्फ तंयारै शरीर तांयै ही हा ना कि तंयारै दिला तांयै।

¹²तुहै मणु तैस टैमैं मसीह थऊँ अलग अतै इस्त्राएल री प्रजा अर्थात प्रमात्मैं रै चुणुरै मणु थऊँ अलग थियै। तुहै गैर यहूदी प्रमात्मैं री यहूदी सोगी करूरी प्रतिज्ञा रै वायदै रै भागी ना थियै अतै बिना उम्मीद अतै संसारा मन्ज बिना प्रमात्मैं रै थियै।

¹³पैहलै तुहै गैर यहूदी प्रमात्मैं थऊँ दूर थियै अतै अबै क्रूस पुर मसीह रै बलिदान करूरै खून रै द्धारा नेड़ै भूच्ची गै अतै मसीह यीशु सोगी जुड़ी गै हिन।

¹⁴मसीह अप्पू ही इन्दै मन्जै शान्ती बणाई दिती हा, पूराणै टैमां मन्ज अक्क नफरत री दीवार यहूदी अतै गैर यहूदी जो अलग करदी थी। पर मसीह अबै सो दीवार ढ़ाई दिती अतै तिन्या जो मिलाई दिता।

¹⁵यीशु अपणी मौत रै द्धारा मूसा री व्यवस्था रै सब नियम अतै कानून जो रद्द करी दिता, ताकि यहूदी अतै गैर यहूदी मन्जै शान्ती बणी सका अतै अपणी कनारी अणीकरी अक्क नौआ मणु बणाई सका।

¹⁶यीशु मसीह क्रूस पुर अपणी मौत रै द्धारा यहूदी अतै गैर यहूदी जो अक्क करी दिता अतै प्रमात्मैं सोगी मेल-मिलाप करवाई करी तंयारी अप्पू मन्ज नफरत जो मिटाई दिता।

¹⁷मसीह ईच्ची करी तूसु गैर यहूदी मन्ज शान्ती रा सुसमाचार प्रचार करू तुहै जैड़ै प्रमात्मैं थऊँ दूर थियै, अतै असु यहूदी जो भी शान्ती दिती जैड़ै प्रमात्मैं रै नेड़ै थियै।

¹⁸क्ओकि मसीह री व्जहा थऊँ ईन्‍दी दूनी री पवित्र आत्मा रै द्धारा पिता प्रमात्मां बल्लै पहुँच भुन्दी हा।

¹⁹ठेरैतांये तुहै गैर यहूदी परदेसी अतै मुसाफिर ना रैह। तुहै प्रमात्मैं रै सब पवित्र मणु सोगी तसेरै राज्य रै नागरिक बणी गै हिन। तुहै प्रमात्मैं रै घरानै रै भूच्ची गै हिन।

²⁰तुहै अक्क घरा सांईयै हिन अतै प्रेरिता अतै भविष्‍यवक्ता नियूँआ हिन अतै मसीह तैस घरा रा सबी थऊँ जरूरी पत्थर हा, अर्थात कोणै रा पत्थर।

²¹मसीह सो मणु हा जैड़ा ऐस घरा जो जोड़ी रखदा हा अतै अगो बढ़णै मन्ज मदद करदा कि सो प्रभु तांयै अक्क पवित्र मन्दर बणी गच्छा।

²²यीशु मसीह तूसु दूनी यहूदी अतै गैर यहूदी जो इकट्ठै बणाऊ करदा हा ताकि तुहै दोनो अक्क परिवार बणी गान, जैत मन्ज प्रमात्मां अपणी आत्मा रै द्धारा रैहन्दा हा।