Read Gaddi इफिसियों 4 Bible Online

इफिसियों 4 - Gaddi bible

इफिसियों 4

¹ता अऊँ जैडा कि प्रभु मन्ज बन्दी हा तूसु सितै बिनती करदा कि जैसा बुलाहट तिकर तुहै हैदुरै हिन तठेरै मुताबक चाल चला।

²सदा नम्र अतै दीन रेय्आ। अक्की दूये सोगी धीरज सोगी व्यवहार करा अतै प्रेम री वजह थऊँ अक्की दूये री गलती जो माफ करी देय्आ।

³तुहै पवित्र आत्मा मन्ज एकता बणाई रखणै रा पुरा यत्न करा अतै शान्ती मन्ज अक्की दूये सोगी तालमेल रखा,

⁴क्ओकि अक्क ही देह हा अतै अक्क ही आत्मा हा, जिआं तुहै हैदुरै हिन भविष्‍य री महिमा भरी अक्क ही उम्मीद तांयै।

⁵अक्क ही प्रभु हा, अक्क ही विस्वास हा, अक्क ही बपतिस्मा हा।

⁶सबी रा अक्क ही प्रमात्मां अतै पिता हा। सिर्फ ऐह ही ना कि प्रमात्मां सबी रै ऊपर हा पर सो सबी रै मन्ज अतै सबी सोगी हा।

⁷पर असु मन्ज हरेक जो मसीह यीशु री इच्छा रै अनुसार उदारता सोगी आत्मिक वरदान मुळुरै हिन।

⁸ठेरैतांये पवित्रग्रन्था मन्ज लिखुरा कि, “सो ऊंचाई पुर चढु अतै बन्दी री भीड़ जो अपणै सोगी लेई गो अतै अपणै मणु जो दान दिता।”

⁹ठेरा कै मतलब हा कि “सो ऊंचाई पुर चढु”? ठेरा मतलब ऐह हा कि मसीह पैहलै धरती री सब थऊँ निचली जगहा मन्ज भी उतरी गो।

¹⁰जैहणै मसीह धरती री निचली जगहा मन्ज उतरी गो ता सो ही हा जैडा स्वर्गा रै सबी थऊँ उची जगह मन्ज चढु ताकि सो संसार जो अपणी हजुरी सोगी भरी देय्आ।

¹¹अतै ऐह कई वरदान हिन जैड़ै मसीह कलीसिया जो दितै, जिन्या प्रेरित, भविष्‍यवक्ता, सुसमाचार हुनाणै बाळै, पासवान अतै शिक्षक।

¹²इन्यारी जिम्मेवारी हा कि सो पवित्र मणु जो तैयार करन ताकि सो प्रमात्मैं रा कम करी सकन अतै कलीसिया री उन्‍नति करी सकन जैड़ी मसीह री देह हा।

¹³ऐह तैहणै तक भुन्दा रैहणा जैहणै तिकर कि अहै सबी रै सब विस्वास अतै प्रमात्मैं रै पुत्र रै ज्ञान री एकता मन्ज ना चली ईन, अतै जैहणै तक अहै प्रमात्मैं रै अनुसार सिद्ध ना भूच्ची गाहन अतै मसीह री पूरी भरपुरी तक ना पुजन।

¹⁴जैहणै अहै मसीह मन्ज बढी चुकुरै अतै पक्कै भूच्ची चुकुरै हिन ता असिओ बच्चै सांईयै व्यवहार बंद करना चहिन्दा। अहै तिन्या किस्ती सांईयै ना भून जैतिओ लैहरा हव्वा सोगी ऐरा-औरा लेई गान्दी हिन। ठेरा मतलब ऐह हा कि अहै ऐसै चलाक मणु री गल्ला मन्ज ना ईन जैड़ै झूठी शिक्षा दिन्दै हिन।

¹⁵बल्कि प्यारा मन्ज सच्चाई जो बलन अतै हरेक तरीकै सितै मसीह सांईयै लगातार बढ़दै गाहन, जैडा शरीर रा सिर हा अर्थात कलीसिया।

¹⁶यीशु मसीह पूरी देह जो अच्छै तरीकै जुड़ै रैहणै मन्ज मदद करदा हा। जियां हरेक अंग अपणा खास कम करदा सो दूये अंगा जो भी बढ़णै मन्ज मदद करदा ताकि पुरा शरीर तन्दरूसत अतै प्रेम सोगी भरपुर रेय्आ।

¹⁷प्रभु रै अधिकार सोगी अऊँ ऐह बलदा कि गैर यहूदी सांईयै जिन्दगी मत जिय्आ क्ओकि तंयारै विचार व्यर्थ अतै उलझन भरै हिन।

¹⁸क्ओकि तियां जो समझणै मन्ज मुसकल हा। अतै तैस अज्ञानता री व्जहा थऊँ जैड़ी कि तियां मन्ज हा अतै तंयारै मनां री कठोरता री व्जहा थऊँ सो प्रमात्मैं री सदा काल री जिन्दगी थऊँ दूर हिन।

¹⁹तियां जो कसी भी तरह री शर्म महसुस ना भुन्दी। सो लुचपन मन्ज लगी गच्छुरै हिन, कि सबी किस्‍मां रै गन्दै कम लालसा सितै करू करन।

²⁰पर तुहै ता मसीह री ऐसी शिक्षा ना पाई।

²¹क्ओकि तुहै मसीह रै बारै मन्ज हुणी लैऊरा हा अतै जैड़ी तसेरी सच्चाई हा तैतिओ सीखी लैऊ हा,

²²कि तुहै अपणै पापी स्वभाव अतै अपणै पूराणै जिणै रै तरीकै जो दूर करा जैडा अभिलाषा अतै धोखै सितै भ्रष्‍ट भूच्ची चुकुरा हा।

²³बल्कि पवित्र आत्मा जो मौका देय्आ कि सो तून्दै विचारा अतै स्वभाव जो नौआ करी सका।

²⁴नोए स्वभाव जो पैहनी लेय्आ, जैडा प्रमात्मैं सांईयै बणनै तांयै बणाऊरा हा जैड़ा की पूरै तरीकै धार्मिक अतै पवित्र हा।

²⁵ऐत तांई झूठ बलणा छड़ी करी हर कोई अपणै पड़ेही सितै सच बल्ला, क्ओकि अहै सब अक्क ही शरीर रै अलग-अलग अंग हिन।

²⁶अगर तुसिओ गुस्सा इन्दा ता गुस्सै जो पाप करवाणै तांयै मौका मत देय्आ, दिन घरिन्‍दै तिकर तून्दा गुस्सा ना रेय्आ।

²⁷अतै ना शैतान जो मौका देय्आ तुसिओ धोखा दिणै तांयै।

²⁸चोरी करनै बाळा फिरी चोरी ना करा, बल्‍की भलै कम्मा करनै मन्ज अपणै हथा सितै मेहनत करा, ताकि कसकि री जरूरत रै टैमैं सो तंयारी मदद करी सका।

²⁹कोई गन्‍दी गप्‍प तून्दै मुँहा थऊँ ना निकळा, पर जरूरता रै मुताबक सो ही निकळा जैडा कि उन्‍नति तांई उत्तम भोआ, ताकि तैस थऊँ हुणनैबाळा भी प्रोत्साहित भोआ।

³⁰ऐस तरह री जिन्दगी रै तरीकै सितै प्रमात्मैं री पवित्र आत्मा जो शोकित मत करा, याद रखा तिनी तुसिओ अपणै रै रूपा मन्ज पछैणी लैऊरा, छुटकारै रै दिन पक्का तुसिओ तैस बचाणा।

³¹सबी किस्‍मां री कड़वाहट अतै प्रकोप अतै क्रोध अतै कलह, अतै निन्दा सब बैरभाव समेत तूसु थऊँ दूर करै गाहन।

³²अतै अक्की दुऐ पुर कृपालु, करूणामय अतै जिआं प्रमात्मैं मसीह मन्ज तून्दै अपराध माफ करूरै हिन तियां ही अक्की दुऐ रै अपराध माफ करा।