Read Gaddi इफिसियों 5 Bible Online

इफिसियों 5 - Gaddi bible

इफिसियों 5

¹तुहै प्रमात्मैं रै प्यारे बच्चै हिन ठेरैतांये तैस सांईयै बणनै री कोशिश करा।

²अप्पू मन्ज प्रेम रखा, जिआं कि मसीह भी तूसु सितै प्रेम करू। तिनी असु सोगी प्रेम करू अतै अपणै आपा जो सुखदायक खुशबु सांईयै प्रमात्मैं अगो बलिदान करी दिता।

³अतै जिआं कि पवित्र मणु योग्य हिन ता तूसु मन्ज ना व्यभिचार अतै ना कसी किस्‍मां रा अशुद्ध कम या लोभ-लालच री चर्चा तक ना भोआ।

⁴ना निर्लजलता, ना मूढ़ता री गप्‍प, ना ठट्‍ठै री, क्ओकि ऐह गल्ला शोभा ना दिन्दी हिन बल्‍की प्रमात्मैं जो धन्यवाद ही दितिआ गच्छा।

⁵क्ओकि तुहै जाणदै हिन कि कसी व्यभिचारी, अशुद्ध मणु, लोभी मणु, जैडा कि मूर्ति पूजणै रै बराबर हा मसीह अतै प्रमात्मैं रै राज्य रै भागीदार ना हिन।

⁶तिन्या मणु रै द्धारा धोखै मन्ज मत इन्दै जैड़ै इन्या पापा जो करनै तांयै बहाना बणान्दै हिन, क्ओकि प्रमात्मैं रा क्रोध आज्ञा ना मनणै बाळै पुर भड़कदा हा।

⁷ठेरैतांये तुहै ऐसै मणु सोगी सहभागी मत भोआ।

⁸क्ओकि तुहै ता पैहलै नैहरै मन्ज थियै पर अबै प्रभु री ज्योती मन्ज हिन, ता ज्योती री औलादा सांईयै चला।

⁹कजो कि ज्योती रा फळ सबी किस्‍मां री भलाई, धार्मिकता अतै सच्चाई हा।

¹⁰अतै ऐह परखा कि प्रभु जो कै खरा लगदा हा।

¹¹अतै नैहरै रै निष्फल कमां मन्ज सहभागी मत भोआ बल्‍की तंयारा खुलासा करा।

¹²क्ओकि बुरै मणु री गुप्त कमां री चर्चा भी लज्जा री गप्‍प हा।

¹³जैहणै सब चिजा जो ज्योती मन्ज बाहर अणया गान्दा हा ता तंयारा सही स्वभाव प्रकट भुन्दा हा।

¹⁴ठेरी व्जहा सितै मणु बल्‍दै हिन कि, “हे सूणै बाळैआ जागी भो अतै मरूरै थऊँ जी उठ, ता मसीह री ज्योती तिजो पुर चमकणी हा।”

¹⁵ऐत तांई धैना सितै हैरा, कि तुहै कस तरीकै री जिन्दगी जिन्दै हिन। मूर्खा सांईयै जिन्दगी मत जिय्आ पर बुद्धिमान सांईयै जिन्दगी जिय्आ।

¹⁶भलाई करनै तांयै हरेक मौके का इस्तेमाल करा, क्ओकि दिन बुरै हिन।

¹⁷ऐत तांई निर्बुद्धि मत बणा, पर समझणै री कोशिश करा कि प्रभु तूसु थऊँ कै चाहन्दा हा?

¹⁸अतै शराब रै मतवाळै मत बणा कजो कि ऐतिओ पी करी लुचपन भुन्दा, पर पवित्र आत्मा मन्ज परिपूर्ण भुन्दै गच्छा।

¹⁹जैहणै तुहै इकट्ठै भुन्दै हिन अप्पू मन्ज भजन अतै स्तुतिगान अतै आत्मिक गीत गाऊ करा अतै अपणै-अपणै मनां मन्ज प्रभु रा किर्तन करदै रेय्आ।

²⁰अतै हमेशा सबी गल्ला तांई इन्दै प्रभु यीशु मसीह रै नां मन्ज पिता प्रमात्मैं रा धन्यवाद करदै रेय्आ।

²¹अतै मसीह रै प्रति आदर री वजह थऊँ अक्की दुऐ रै अधीन मन्ज रैऊ करा।

²²हे घरावाळिओ, अपणै-अपणै घरवाळै रै वशा मन्ज इआं रेय्आ जिआं कि प्रभु रै।

²³क्ओकि घरावाळा घरावाळी रा सिर हा जिआं कि मसीह यीशु कलीसिया रा सिर हा अतै अप्पू ही देह अर्थात कलीसिया रा उद्धारकर्ता हा।

²⁴जिआं कलीसिया मसीह रै वशा मन्ज हा तियां ही घरावाळी भी हर गल्ला मन्ज अपणै घरवाळै रै अधीन मन्ज रैहन।

²⁵हे घरावाळेओ, अपणी-अपणी घरावाळी सितै प्‍यार करा जिआं कि मसीह यीशु भी कलीसिया सितै प्‍यार करीके अपणै आपा जो कलीसिया तांई दी दिता।

²⁶ताकि मसीह कलीसिया जो सुसमाचार रै द्धारा पाप थऊँ शुद्ध करी सका, जियां अहै पाणी रै स्‍नान सितै अपणै गन्दै शरीरा जो शुद्व करदै हिन।

²⁷अतै मसीह तैहा जो अक्क तेजोमय कलीसिया बणाई करी अप्पू बल्लै खरेड़ा, जैत मन्ज ना कलंक, ना झुर्री, ना कोई ईन्नी चिज भोआ, बल्‍की पवित्र अतै निर्दोष भोआ।

²⁸ऐस तरीकै घरावाळा भी अपणी घरावाळी सितै अपणै जिस्मां सांईं प्‍यार करा। जैडा अपणी घरावाळी सितै प्‍यार रखदा, सो अपणै आपा सितै प्‍यार रखदा।

²⁹क्ओकि कोई भी कदी अपणै जिस्मां सितै बैर ना रखदा बल्‍की तठेरा पालन-पोषण करदा जिआं कि मसीह कलीसिया सितै करदा हा।

³⁰ठेरैतांये कि अहै मसीह रै शरीरा रै अंग हिन। जिन्या पवित्रग्रन्था मन्ज लिखुरा हा कि,

³¹“ठेरी वजह थऊँ मर्द अपणै माँ-बुड़ै जो छड़ी करी अपणी घरावाळी सितै मिलीकरी रैहला अतै सो दोनों अक्क तन भूणै।”

³²इन्या गल्ला रा भेद पाणा ता बड्‍डा मुसकिल हा जैड़ा प्रमात्मैं प्रकट करूरा पर अऊँ तुसिओ मसीह रै तैस प्रेम रै बारै मन्ज बलदा जैड़ा तिनी कलीसिया सोगी करूआ।

³³पर तूसु मन्ज हर कोई अपणी घरावाळी सितै अपणै सांईयै प्‍यार रखा अतै घरावाळी भी अपणै घरवाळै रा आदर करा।