Read Gaddi फिलिप्पियों 1 Bible Online

फिलिप्पियों 1 - Gaddi bible

फिलिप्पियों 1

¹ऐह पत्री मसीह यीशु रा दास पौलुस लिखु करदा कि मेरी अतै तीमुथियुस री तरफा थऊँ सबी पवित्र मणु जो जैड़ै फिलिप्पी शहर मन्ज अध्यक्ष अतै सेवका समेत विस्वासी मणु हिन।

²अहै प्रार्थना करदै कि ईन्दै पिता प्रमात्मां अतै प्रभु यीशु मसीह री तरफा थऊँ तूसु जो अनुग्रह अतै शान्ती मुळदी रेय्आ।

³जैहणै थऊँ तुसै सुसमाचार हुणुरा हा तैस पैहलै दिन थऊँ लेई करी अजा तिकर सुसमाचार जो फैलाणै तांई तुहै मिन्जो सोगी रैह हिन।

⁴अऊँ जैहणै-जैहणै तूसु जो याद करदा, तैहणै-तैहणै अपणै प्रमात्मैं रा धन्यवाद करदा।

⁵जैहणै भी तूसु सबी तांई बिनती करदा ता सदा खुशी सितै बिनती करदा।

⁶अतै मिन्जो ऐसा गल्ला रा भरोसा हा कि प्रमात्मैं तूसु मन्ज खरा कम शुरू करूरा हा। प्रमात्मैं ही ऐस कमां जो यीशु मसीह रै दोबारा फिरी करी ईणै रै दिन तक पुरा करना।

⁷ऐह ठीक हा कि, अऊँ तूसु सबी तांई इन्‍ना विचार करूं क्ओकि अऊँ तूसु सितै बड़ा प्‍यार करदा हा। तुहै सब मेरी कैदा मन्ज अतै सुसमाचार तांई समर्थन अतै सवूत दीणैं तांई मिन्जो सोगी अनुग्रह सितै सहभागी हिन।

⁸ऐत मन्ज प्रमात्मां मेरा गवाह हा, कि अऊँ मसीह यीशु सांईं प्‍यार करीके तूसु सबी जो चाहन्दा।

⁹अतै अऊँ ऐह प्रार्थना करदा कि, तून्दा प्‍यार, सच्चाई री ज्ञान अतै सबी तरह री समझ सितै अक्की दूये तांयै होर भी बड़दा गच्छा।

¹⁰ऐठी तिकर कि तुसै खरी थऊँ खरी गल्ला जो चुणी सकन अतै मसीह रै दोबारा फिरी करी ईणै तक पवित्र अतै निर्दोष बणी रेय्आ।

¹¹अतै तैस धर्मी चरित्र सोगी तुहै बढ़दै रेय्आ जैड़ा कि यीशु मसीह री व्जहा थऊँ तून्दै अन्दर पैदा भुआ, ऐत थऊँ प्रमात्मैं री महिमा अतै स्तुति भुन्दी रेय्आ।

¹²मेरै विस्वासी भाईओ अऊँ चाहन्दा कि तुसै ऐह जाणी लेय्आ कि मिन्जो पुर जैड़ी बीतुरी हा तैत सितै सुसमाचारा री ही बढ़ोतरी भच्छुरी हा।

¹³ऐठी तिकर कि महाराजा कैसर री सारी फौज अतै बाकी मणु जो भी ऐह पता लगी गो हा कि अऊँ मसीह यीशु री सेवा करू करदा ठेरैतांये कैदा मन्ज हा।

¹⁴अतै जैड़ै विस्वासी भाई हिन तियां मन्ज ज्यादातर मेरै कैद भूणै री व्जहा थऊँ, हिम्मता सितै प्रमात्मैं रा बचन हुनाणै रा साहस रखदै हिन।

¹⁵कुछ मणु ता जळणी अतै झगड़ालू भूणै री व्जहा थऊँ मसीह रा प्रचार करदै हिन, पर कुछ मणु मिन्जो सोगी भली मनसा सितै प्रचार करदै।

¹⁶जैड़ै भली मनसा सितै प्रेम रै द्धारा प्रचार करदै हिन सो जाणदै हिन कि अऊँ कैद मन्ज ठेरैतांये हा क्ओकि अऊँ सुसमाचार रा समर्थन करदा हा।

¹⁷अतै जैड़ै जळणी सितै प्रचार करदै हिन सो अपणी स्‍वार्थी इच्छा सितै मसीह रा उदाहरण हुणादै हिन, ऐह समझी करी कि मेरी कैदा मन्ज मिन्जो तांई क्‍लेश पैदा करन।

¹⁸ता कै भुआ? मात्र ऐह कि हर किस्‍मां सितै चाऐं गलत इरादै सितै ही सैई, चाऐं सच्चाई सितै, मसीह रा सुसमाचार हुणाया गाहन्‍दा हा अतै अऊँ ऐत थऊँ खुश हा अतै खुश रैहणा।

¹⁹क्ओकि अऊँ जाणदा, कि तुन्दी प्रार्थना सितै अतै यीशु मसीह रै पवित्र आत्मा री मदद सोगी मेरा उद्धार भूणा।

²⁰अऊँ ता दिला थऊँ ऐह ही लालसा अतै उम्मीद रखदा हा, कि अऊँ कसी गल्ला मन्ज शर्मिन्दा ना भूच्छुं। जिआं मेरै जोशीलै हौंसलै सितै मसीह री बड़ाई मेरी जिन्दगी थऊँ हमेशा भुन्दी रैई हा, चाऐं अऊँ जिन्दा रैऊ या मरी गच्छूं।

²¹क्ओकि अगर अऊँ जिन्दा ररेऊँ ता मुँ मसीह तांयै जीणा अतै अगर मरी गाहणा फाईदा हा क्ओकि मुँ मसीह सोगी मिली गाणा।

²²पर अगर शरीर मन्ज जिन्दा रैहणै सोगी अऊँ मसीह तांयै कुछ करी सकदा ता फायदैमन्‍द हा, ता अऊँ ना जाणदा कि कसेरा चुनाव करू।

²³कजो कि अऊँ ता दोनों रै मन्जै लटकुरा, दिल ता करदा कि मरी करी यीशु मसीह बल्लै गिच्ची रैऊ, कजो कि ऐह ता बड़ा ही बांका हा।

²⁴पर जिन्दा रैहणा तुन्दी मदद करनै तांयै होर भी जरूरी हा।

²⁵अतै ऐह कि मिन्जो भरोसा हा अतै अऊँ जाणदा कि मुँ जिन्दै रैहणा बल्कि तूसु सबी सोगी रैहणा जैत थऊँ तुसै विस्‍वासा मन्ज होर भी पक्कै भुन्दै गाहन अतै ऐसा गल्ला मन्ज खुश रेय्आ।

²⁶अतै जैडा घमण्ड़ तुसै मेरै बारै मन्ज करदै हिन, सो मेरै तूसु बल्लै फिरी ईणै थऊँ मसीह यीशु मन्ज होर भी बड़दा गच्छा।

²⁷तूणा करा कि तून्दा चाल चलन मसीह यीशु रै सुसमाचारा रै मुताबक भोआ। अऊँ ईच्ची करी हेरू चाहे ना हेरू तून्दै बारै मन्ज बस ऐह हुणु कि तुसै अक्की ही मकसद मन्ज टिकुरै हिन अतै अक्क मन भूच्ची करी सुसमाचार तांई मेहनत करदै हिन।

²⁸कसी गल्ला मन्ज विरोधी थऊँ मत डरा अतै तुन्दी ऐह हिम्मत तियां तांई हार रा चिन्ह भूणा, पर तूसु तांई उद्धार प्रमात्मैं री तरफा थऊँ जीत भुणीआ।

²⁹मसीह री व्जहा थऊँ तूसु पुर ऐसा अनुग्रह भूआ कि ना सिर्फ तैस पुर विस्वास करा, बल्कि तैस तांई दुख भी झेला।

³⁰अतै तूसु भी तिनी मेहनत करनी हा जियां तुहै मिन्जो फिलिप्पियों शहर मन्ज करदै हेरूरा हा, अतै अबै भी हुणदै हिन कि अऊँ तियां दुख सहू करदा हा।