Read Gaddi फिलिप्पियों 2 Bible Online

फिलिप्पियों 2 - Gaddi bible

फिलिप्पियों 2

¹मसीह मन्ज तुन्दी जिन्दगी तुसिओ मजबुत करदी हा अतै तसेरा प्‍यार तुसिओ तसल्ली दिन्दा हा। तुन्दी संगति पवित्र आत्मा सोगी हा अतै तुसै अक्की दूये पुर दया अतै तरस करदै हिन।

²ठेरैतांये अऊँ तूसु सोगी बिनती करदा कि मेरी ऐसा खुशी जो पूरी करा कि अक्क मन चित सोगी रेय्आ अतै अक्क ही प्‍यार, अतै अक्क ही इच्छा रखा।

³स्वार्थ अतै झूठी प्रशंसा तांई कुछ मत करा पर दीन मनां सितै अक्की दुऐ जो अप्पू थऊँ खरा समझा।

⁴हर कोई अपणै ही बारै मन्ज ना पर दुऐ रै बारै मन्ज भी चिन्ता करा।

⁵जिन्‍ना मसीह यीशु रा स्वभाव थू तून्दा स्वभाव भी तिनां ही भोआ।

⁶यीशुऐ प्रमात्मैं रै बराबर भूणै रै बावजूद भी प्रमात्मैं रै बराबर भूणै जो अपणै वशा मन्ज रखणै री चिज ना समझू।

⁷बल्कि अपणै ईश्वरीय अधिकारा जो छड़ी दिता अतै अक्क दासा सांईयै मणु बणी गो।

⁸अतै मणु रै रूपा मन्ज पैदा भुच्‍ची करी अपणै आपा जो दीन करू अतै प्रमात्मैं रा ऐसा हूक्म मनणै बाळा बणु कि सब दुख सेहन्‍दा-सेहन्‍दा क्रूस पुर मौती जो गळै लाई लैऊ।

⁹ऐत तांई पिता प्रमात्मैं तैसिओ सबी थऊँ उच्चै पद पुर बहालु अतै तैस जो सो नां दिता जैडा कि सबी नां मन्ज महान हा।

¹⁰अतै जैडा कि स्वर्गा मन्ज रैहन्दै हिन या धरती पुर रैहन्दै हिन अतै धरती रै थलै रैहन्दै हिन सो सब यीशु रै नां मन्ज अपणा हैर झुकान।

¹¹अतै प्रमात्मैं री महिमा तांई हर अक्क मणु अंगीकार करा कि यीशु मसीह ही प्रभु हा।

¹²हे मेरै प्यारे मित्रो जिआं कि तुसै हमेशा प्रमात्मैं रै हूक्मा जो मन्दै आये हिन जैहणै अऊँ तूसु सोगी थू। अबै अऊँ दूर हा ता तियां कम्मा जो डरदै अतै कम्मदै करदै रेय्आ, जैड़ै प्रमात्मैं रा उद्धार पाऊरै मणु तांई सही हिन।

¹³क्ओकि प्रमात्मां तून्दै अन्दर कम करू करदा ताकि तुसिओ इच्छा अतै सामर्थ दी सका तियां कम्मा जो करनै तांई जैतै प्रमात्मां खुश भोआ।

¹⁴सब कम बिना कुड़कुड़ अतै बिना विवाद करदै करू करा।

¹⁵ताकि तुसै निर्दोष अतै भोळै-भाळै भुच्‍ची करी टेढै अतै हठिलै मणु मन्ज प्रमात्मैं री निष्कलंक औलाद बणी रैहन। क्ओकि तुसै जिन्दगी रा बचन लेई करी ऐसा दुनिया रै मणु मन्ज जग-मग करदै अम्बरा रै तारै सांईयै हिन।

¹⁶ताकि मसीह यीशु रै दोबारा ईणै पुर ऐह मेरा घमण्ड़ करनै री व्जहा भोआ कि मेरी दौड़ अतै मेहनत व्यर्थ ना भूई।

¹⁷अगर मिन्जो तून्दै विस्वास री सेवा तांई अपणा खून भी बहाणा पैय्आ ता भी अऊँ खुश हा अतै तूसु सबी सोगी खुशी मन्दा।

¹⁸तियां ही तुहै भी खुश भून अतै मिन्जो सोगी खुशी मना।

¹⁹मिन्जो यीशु मसीह पुर उम्मीद हा, कि मुँ तीमुथियुस जो तूसु बल्लै जरूर भैजणा, ताकि तून्दा हाल चाल हुणी करी मिन्जो शान्ती मुळा।

²⁰क्ओकि तीमुथियुस रै स्वभाव सांईयै कसी होरी रा स्वभाव निआं कि सो साफ मनां सितै तुन्दी चिन्ता करा।

²¹क्ओकि सब अपणै-अपणै स्वार्थ मन्ज रैहन्दै हिन, सो यीशु मसीह रै कमां री चिन्ता ना करदै।

²²पर तुसै तीमुथियुस जो परखी अतै जाणी भी लैऊ हा, कि जिआं पिता पुत्रा सोगी कम करदा तियां ही तिनी असु सोगी सुसमाचार जो फैलाणै री मेहनत करीआ।

²³ता अऊँ उम्मीद करदा, कि जिआं हि मिन्जो पता लगला कि मेरी हालत किनी भूणी हा तियां ही अऊँ तैस जो झट भैजी दिला।

²⁴अतै मिन्जो प्रभु पर भरोसा कि मुँ भी जैतूणै जल्दी भूच्ची सका तैतूणैं जल्दी चली ईणा।

²⁵पर मैंई इफ्रदीतुस जो जैडा कि मेरा विस्वासी भाई हा अतै सोगी कम करनै बाळा अतै विस्वास री लड़ाई लड़नै बाळा हा। तैसिओ जैड़ा तून्दा दूत अतै जरूरी गल्ला मन्ज मेरी सेवा टहल करनै बाळा भी हा तूसु बलै भैजणा जरूरी समझू।

²⁶तसेरा मन तूसु सबी मन्ज लगुरा थू, ठेरैतांये सो तूसु सोगी मिलणै जो व्याकुल रैहन्दा थू क्ओकि तुसै तसेरी बमारी रै बारै मन्ज हुणुरा थू।

²⁷अतै सो तूणा बमार थू कि मरनै बाळा थू पर प्रमात्मैं तैस जो ठीक करू अतै तैस पुर ही ना बल्कि मिन्जो पुर भी कि मिन्जो दुखा पुर होर दुखा ना भोआ।

²⁸ऐत तांई मैंई तैस जो भैजणै री होर भी कोशिश करी कि तुसै तैस सितै मुळी करी खुश भून अतै मेरी चिन्ता घट भुच्‍ची गच्छा।

²⁹ऐत तांई प्रभु यीशु रै नां सितै तुसै तैस सोगी खुशी सितै मुळै क्ओकि इन्‍नै-जिन्‍नै मणु रा आदर-मान करू करै।

³⁰क्ओकि सो भी यीशु मसीह रै सुसमाचार तांयै अपणै प्राणा जो मुसकल मन्ज फसाई करी मौती रै नेड़ै पुज्‍जी गछूरा थू, ताकि जैड़ी जैड़ी मदद तूसु थऊँ मेरी सेवा मन्ज दूर रैहणै थऊँ ना भच्छुरी हा, तैसा जो पूरी करा।