Read Gaddi फिलिप्पियों 3 Bible Online

फिलिप्पियों 3 - Gaddi bible

फिलिप्पियों 3

¹ठेरैतांये, मेरै विस्वासी भाईओ प्रभु मन्ज खुश रेय्आ। सो ही गल्ला तुसिओ बार-बार लिखणै थऊँ मिन्जो कोई कष्‍ट ना भुन्दा ताकि तुहै झूठै शिक्षका थऊँ बची सकन।

²जंगली कुत्रा सांईयै खतरनाक मणु थऊँ चौकनै रेय्आ, ऐसै मणु थऊँ भी चौकनै रेय्आ जैड़ै दूये रै शरीरा जो कटदै हिन। तियां तून्दा जबरदस्ती खतना करवाणा ताकि तुहै प्रमात्मैं रा जन वणी सकै।

³क्ओकि असली खतना बाळै ता अहै ही हिन जैड़ै प्रमात्मैं री आत्मिक अगुवाई सितै भजन करदै हिन अतै मसीह यीशु पुर घमण्ड़ करदै हिन अतै मणु रै कर्मा पुर भरोसा ना रखदै हिन।

⁴पर अऊँ ता अपणै कम्मा पुर भी भरोसा रखी सकदा अगर कसी जो अपणै कम्मा पुर भरोसा रखणै रा विचार भोआ ता अऊँ तैस थऊँ भी ज्यादा रखी सकदा।

⁵मेरा अठुऐं दिन खतना भुआ, अऊँ इस्त्राएल रै वंश अतै बिन्यामीन रै गोत्रा रा हा अतै असल इब्रानी हा। अगर कोई मूसा री व्यवस्था रै बारै मन्ज पूछा ता मैंई फरीसी मणु सांईयै व्यवस्था रा कठोरता सोगी पालन करूरा हा।

⁶अगर जोश रै बारै मन्ज कोई पूछा ता सबी थऊँ ज्यादा कलीसिया जो सताणै बाळा थू, अगर कोई मूसा री व्यवस्था रै पालन रै बारै मन्ज पूछा ता मैंई सब नियमा रा पालन करूरा हा।

⁷पैहलै इन्या गल्ला जो अऊँ किमती समझदा थू, अबै इन्या गल्ला जो बेकार समझदा क्ओकि मसीह मेरी जिन्दगी जो बदली दितुरा हा।

⁸पर मैंई अपणै मसीह यीशु जो नजदीक थऊँ पछैणी लैऊ हा। मैंई इन्या सबी चिजा जो छडी दितुरा पर अबै इन्या सबी गल्ला जो बेकार अतै कूड्‍डा समझदा क्ओकि अऊँ मसीह जो जाणी गो हा।

⁹ताकि अऊँ मसीह सोगी जुड़ी गच्छू; ना कि अपणी तैसा धार्मिकता सितै जैड़ी कि मूसा री व्यवस्था रा पालन करनै थऊँ हा पर तैसा धार्मिकता सितै जैड़ी कि मसीह पुर विस्वास करनै री व्जहा थऊँ हा, अतै प्रमात्मां री तरफा थऊँ विस्वास करनै पुर मुळदी हा।

¹⁰अऊँ ऐह चाहन्दा कि अऊँ मसीह जो जाणी लैऊ। तसेरै दोबारा जी उूठणै री सामर्थ जो महसुस करूं अतै तैस सोगी सबी दुखा मन्ज सामल भूणै रै दर्द जो जाणु अतै तसेरी मौती सांईं मौत हासल करू।

¹¹ताकि अऊँ भी मरी कर दोबारा जी भूणै तिकर पुजी सकू।

¹²ऐह मतलब निआं कि अऊँ इन्या सबी गल्ला जो पाई चुकुरा या सिद्व भुच्‍ची चुकुरा पर तैसा चिजा जो पाणै तांयै कठण मेहनत करू करदा कि सो मिन्जो मुळी गच्छा जैत तांयै यीशुऐ मिन्जो पकडुरा थू।

¹³मेरै विस्वासी भाईओ, मेरा विचार ऐह निआं कि मैंई ऐह पाई लैऊरा, पर अऊँ मात्र ऐह अक्क कम करदा कि जैड़ी गल्ला पिचो रैई गई तियां जो भुल्‍ली करी अगो री गल्ला तांई चलदा गाहन्‍दा।

¹⁴मसीह यीशु मन्ज प्रमात्मैं री स्वर्गीय बुलाहट रै इनाम जो पाणै तांयै नशाने री कनारी बड़दा गान्दा हा।

¹⁵ता असु मन्ज जैड़ै भी विस्वास मन्ज पक्कै हिन सो ऐह हि विचार रखन अतै जे कसी गल्ला मन्ज तून्दा होर विचार भोआ ता प्रमात्मैं तैत जो भी तूसु पुर प्रकट करी दिणा।

¹⁶ठेरैतांये जैड़ी सच्चाई प्रमात्मैं पैहलै थऊँ हि असिओ दसुरी हा तठेरै अनुसार ही जिन्दगी अगो बढ़ाणी हा।

¹⁷मेरै विस्वासी भाईओ तुसै सब मिलीकरी मिन्जो सांईं ही चाल चला अतै तियां जो हमेशा याद रखा जैड़ै कि ऐसा रीति पुर चलदै हिन जठेरा उदाहरण तुसै असु मन्ज हेरदै हिन।

¹⁸क्ओकि मतै सारै इन्‍नै मणु हिन जंयारी चर्चा मैंई तूसु सोगी कैई बरी करी हा अतै अबै फिरी रोई-रोई करदा कि सो अपणै चाल चलन री व्जहा थऊँ क्रूस पुर मसीह यीशु री मौत री किमत जो खत्म करदै हिन।

¹⁹तआंरा अन्त विनाश हा, तआंरी शरीरी इच्छा ही तंयारा प्रमात्मां हा, सो अपणी लज्जा री गल्ला पुर घमण्ड़ करदै हिन अतै धरती री चिजा पुर अपणा मन लाई रखदै हिन।

²⁰पर इन्दा अपणा देश ता स्वर्ग हा अतै अहै अक्क उद्धारकर्ता प्रभु यीशु मसीह रा तैठी थऊँ ईणै री बेसब्री सोगी भाळ करू करदै हिन।

²¹सो अपणी शक्ति रै तैस प्रभाव री व्जहा थऊँ सब चिजा जो अपणै बसा मन्ज करी सकदा, तैस इन्दी कमजोर अतै मरनहार देह रा रूप बदली करी अपणी महिमा री देह रै मुताबक बणाई दिणा।