Read Gaddi फिलिप्पियों 4 Bible Online

फिलिप्पियों 4 - Gaddi bible

फिलिप्पियों 4

¹ऐत तांई मेरै विस्वासी भाईओ, तूसु सोगी अऊँ बड़ा प्‍यार करदा। तूसु सोगी मिलणै री मेरी बड़ी इच्छा हा जैड़ा मेरी खुशी अतै घमण्ड़ रा कारण हा। प्यारे भाईओ प्रभु पुर ईयां ही विस्वास मन्ज मजबुत अतै आज्ञाकारी रेय्आ।

²अऊँ यूओदिया अतै सुन्‍तुखे दूनी बैहणी सोगी बिनती करदा कि सो प्रभु मन्ज एक मन भूच्ची करी अप्पू मन्ज मेल-मिलाप करी लेय्आ, क्ओकि तुहै प्रभु सोगी जुडुरै हिन।

³अतै मिन्जो सोगी सच्चाई सितै कम करनै बाळै साथी सोगी भी बिनती करदा कि, तू तियां जनानी री मेल-मिलाप करनै मन्ज मदद कर। क्ओकि तिऐं मिन्जो सोगी सुसमाचार फैलाणै मन्ज, दुखा क्‍लेशा मन्ज अतै मेरै साथी कलेमेंस सोगी मेहनत करूरी हा, जिआंरै कि नां जिन्दगी री कताबा मन्ज लिखुरै हिन।

⁴प्रभु मन्ज हमेशा खुश रेय्आ, अऊँ फिरी बल्‍दा कि खुश रेय्आ।

⁵तून्दा कोमल स्वभाव सबी पुर प्रकट भोआ कजो कि प्रभु रा दोबारा आगमन नेड़ै हा।

⁶कसी भी गल्ला री चिन्‍द मत करा पर हर अक्क हालात मन्ज प्रार्थना करा। तुन्दी प्रार्थना अतै बिनती धन्यवाद सोगी प्रमात्मैं रै सामणै हाजिर करै गाहन।

⁷ता प्रमात्मैं री शान्ती जैड़ी कि मणु री समझ थऊँ बिलकुल बाहर हा, तून्दै दिला अतै विचारा जो मसीह यीशु सम्भाळी करी रखा।

⁸आखिर मन्ज, हे भाईओ, जैड़ी-जैड़ी गल्ला सच हिन, जैड़ी-जैड़ी गल्ला आदर-मान जोगी हिन, जैड़ी-जैड़ी गल्ला ठीक हिन, जैड़ी-जैड़ी गल्ला पवित्र हिन, जैड़ी-जैड़ी गल्ला छैळ हिन, जैड़ी-जैड़ी गल्ला मनां जो भान्‍दी हिन, आखरी, जैड़ी-जैड़ी खरै गुणा बाळी अतै प्रशंसा योग्य हिन तियां पुर ही मन लगाऊ करा।

⁹जैड़ी गल्ला तुसै मिन्जो थऊँ सिखुरी हिन अतै मनुरी हिन अतै हुणुरी हिन अतै मिन्जो मन्ज हेरूरी हिन तियां जो ही मन्‍नु करा ता शान्ती रा प्रमात्मां तूसु सोगी रैहणा।

¹⁰अऊँ प्रभु मन्ज बड़ा खुश हा कि अबै ऐतनै दिन बाद तुसिओ मेरी याद आई अतै तुहै मेरी आर्थिक मदद करी हा, जरूर तूसु जो शुरू मन्ज भी ठेरा विचार थू, पर तुसिओ मेरी मदद करनै रा मौका ना मुळु।

¹¹ऐह ना कि मिन्जो बल्लै कसी चिजा री कमी हा, क्ओकि मैंई ऐह सिखुरा कि जैस भी हालात मन्ज अऊँ हा तैत पुर सन्तुष्‍ट ररेऊँ।

¹²अगर मिन्जो बल्लै थोड़ी चिजा हिन तांभी या मती हिन तांभी, भूखा रैहणा अतै रजणा दूनी हालात मन्ज अऊँ जीणा जाणदा। हर अक्क गल्ला मन्ज अतै सबी हालात मन्ज तृप्त रैहणा मैंई सिखुरा हा।

¹³मसीह जैडा मिन्जो सामर्थ दिन्दा हा तैस मन्ज अऊँ सब कुछ करी सकदा।

¹⁴तांभी तुसै भला करू कि मेरै क्‍लेशा मन्ज मिन्जो सोगी रैह।

¹⁵अतै हे फिलिप्पी शहर मन्ज रैहणै बाळैओ तुसै अप्पू ही जाणदै हिन, कि सुसमाचार प्रचार रै शुरूआत मन्ज जैहणै अऊँ तून्दै मकिदुनिया परदेस थऊँ चली गो ता तुसिओ छड़ी करी होरी कसी भी कलीसिया मेरी आर्थिक रूप सोगी मदद ना करी।

¹⁶इन्‍नी साहबै जैहणै अऊँ थिस्सलुनीके शहर मन्ज थू तांभी तुसै मेरी जरूरता जो पुरा करनै तांई कई बरी कुछ ना कुछ भेज्‍जू थू।

¹⁷ऐह ना कि अऊँ दान चाहन्दा थू, पर अऊँ तून्दै भलै कमा मन्ज अक्क कम होर जोड़ना चाहन्दा थू, ताकि तुसिओ प्रमात्मैं थऊँ इनाम मुळा।

¹⁸मिन्जो बल्लै ता सब कुछ हा, बल्‍की उम्मीद थऊँ भी ज्यादा हा, जैड़ी चिजा तुहै भाई इफ्रदीतुस रै हथै भैजुरी थी तियां जो पाई करी अऊँ तृप्त भुच्‍ची गो हा, सो ता खुशबुदार अतै ग्रहण करनै योग्य बलिदान हा जैडा कि प्रमात्मैं जो खरा लगदा हा।

¹⁹इन्दा पिता प्रमात्मां, अपणै अपार धन रै अनुसार मसीह यीशु मन्ज तुन्दी सब जरूरता जो पूरी करला।

²⁰इन्दै पिता प्रमात्मैं री महिमा जुगा-जुगा तिकर भुन्दी रेय्आ। आमीन।

²¹यीशु मसीह मन्ज हरेक पवित्र मणु जो मेरी नमस्ते बल्ला, अतै जैड़ै विस्वासी भाई मिन्जो सोगी हिन, तूसु जो नमस्ते बल्‍दै हिन।

²²सब पवित्र मणु, खास करीके सो विस्वासी जैड़ै महाराजा कैसर रै घरानै रै हिन तूसु जो नमस्कार बल्‍दै हिन।

²³ईन्दै प्रभु यीशु मसीह रा अनुग्रह तूसु पुर बणी रेय्आ। आमीन।