Read Gaddi कुलुस्सियों 1 Bible Online

कुलुस्सियों 1 - Gaddi bible

कुलुस्सियों 1

¹ऐह पत्री पौलुस री तरफा थऊँ हा जैड़ा प्रमात्मैं री इच्छा सितै मसीह यीशु रा चुणुरा प्रेरित हा सो विस्वासी भाई तीमुथियुस सोगी मिलीकरी तियां मणु तांयै लिखु करदा।

²जैड़ै कुलुस्सियों शहर री कलीसिया रै विस्वासी हिन; ईन्दै पिता प्रमात्मां थऊँ मसीह यीशु मन्ज तुसिओ अनुग्रह अतै शान्ती मुळदी रेय्आ।

³अहै तूसु तांई हर रोज प्रार्थना करीके अपणै प्रभु यीशु मसीह रै पिता मतलब कि प्रमात्मैं रा धन्यवाद करदै हिन।

⁴क्ओकि अहै हुणुरा हा कि मसीह यीशु पुर तून्दा विस्वास हा अतै तुहै प्रमात्मैं रै सबी मणु सोगी प्‍यार रखदै हिन।

⁵तून्दा विस्वास अतै प्‍यार ऐसा उम्मीद पर निर्भर जैड़ी तूसु तांई स्वर्गा मन्ज रखुरी हा जठेरी चर्चा तुहै मसीह रै सचै सुसमाचार रै बचना मन्ज हुणी चुकुरै हिन।

⁶ऐह सुसमाचार जैडा तूसु बलै आ थू पूरै संसारा मन्ज फैलु करदा थू अतै मणु विस्वास करू करदै थियै, तियां ही जियां तुहै पैहली बरी प्रमात्मैं रै सच्चाई अतै अनुग्रह रै बारै मन्ज समझुरा थू।

⁷तसेरी ही शिक्षा तुहै इन्दै प्यारे विस्वासी भाई इपफ्रास थऊँ सिखुरी हा, जैडा असु तांई मसीह रा विस्वासयोग्य सेवक हा।

⁸तिनी ही असिओ दसु कि तून्दा प्‍यार होरी तांयै कैतना हा, जैडा पवित्र आत्मा तुसिओ दितुरा।

⁹ठेरैतांये जैस दिन थऊँ ऐह हुणु ता अहै लगातार तूसु तांयै प्रार्थना अतै बिनती करदै हिन। अहै ऐह प्रार्थना करदै हिन कि प्रमात्मैं री आत्मा तुसिओ अक्ल अतै समझ दी सका ताकि तुहै प्रमात्मैं री ईच्‍छा जो पूरी तरह समझी सकन।

¹⁰ताकि तून्दा चाल-चलन प्रभु रै मुताबक भोआ ता तूसु प्रमात्मैं जो हर तरीकै खुश करी सकणा। तुहै हर किस्‍मां रै भलै कम करदै रेय्आ, अतै प्रमात्मैं रै ज्ञान मन्ज बढ़दै गाणा।

¹¹अऊँ प्रार्थना करदा कि प्रमात्मैं री महिमा अतै सामर्थ रै अनुसार तुसिओ मजबुत करा, ताकि तुहै धीरज अतै खुशी सोगी दुखा जो सही सकन।

¹²अतै पिता प्रमात्मैं रा धन्यवाद करदै रेय्आ जिनी असु जो ऐस योग्य बणाऊ कि अहै प्रमात्मैं रै चुणुरै मणु सोगी जैड़ै ज्योती मन्ज रैहन्दै हिन मीरास मन्ज भागीदार भुन्‍न।

¹³क्ओकि तिनी ही असु जो नैहरै रै वशा थऊँ छुड़ाईकरी अपणै प्यारे पुत्रा रै राज्य मन्ज दाखल करू हा।

¹⁴जैत मन्ज प्रमात्मैं रै पुत्र रै बलिदान रै द्धारा असिओ शैतान रै जाल थऊँ छुटकारा मतलब कि पापा थऊँ माफी मुळदी हा।

¹⁵कोई प्रमात्मैं जो ना हेरी सकदा, पर जैहणै तसेरा पुत्र मणु बणु ता तिनी प्रमात्मैं जो मणु पुर प्रकट करू, अतै सो संसार री रचना भूणै थऊँ पैहलै रा थू, अतै पूरी प्रमात्मैं री रचना पुर राज्य करदा हा।

¹⁶क्ओकि मसीह मन्ज ही सब चिजा री शुरूआत भूई, चाऐं स्वर्गा री भोआ चाऐं धरती री, चाऐं हुज्‍जु करदी या अणहुज्जी भोआ, कै सिंहासन, कै प्रभुताऐं, कै प्रधानता, कै अधिकार, सब चिजा तसेरै द्धारा ही अतै तैस तांई ही बणाई हिन।

¹⁷सब कुछ री रचना भूणै रै पैहलै थऊँ ही मसीह थू, अतै संसार री सब रचना जो सो ही सम्भालदा हा।

¹⁸अतै मसीह ही देह मतलब कि कलीसिया रा सिर हा, सो ही आदि हा अतै मरूरै थऊँ दोबारा जी उूठणै बाळै मन्ज पैहला मणु हा कि सबी गल्ला मन्ज सो ही प्रधान ठहरा।

¹⁹क्ओकि पिता प्रमात्मैं री खुशी ऐत मन्ज हा कि यीशु मन्ज प्रमात्मैं री सारी परिपूर्णता वास करा।

²⁰प्रमात्मैं यीशु मसीह रै द्धारा पूरै जगत जो अप्पू सोगी मेल कराणै रा फैसला करू, प्रमात्मैं मसीह रै क्रूस पुर बहाऊरै खूना रै सोगी शान्ती जो स्थापित करू ताकि सब चिजा जो अप्पू बलै लेई अईआ चाहे धरती री भून या स्वर्गा री।

²¹तुहै मणु भी अपणै कुकर्मा रै द्धारा प्रमात्मैं थऊँ दूर भूच्ची गच्छुरै थियै अतै प्रमात्मैं रै शत्रु बणी गच्छुरै थियै।

²²फिरी भी प्रमात्मैं मसीह री क्रूस पुर मौती रै द्धारा तूसु सोगी मेल करी लैऊआ ताकि तूसु जो अपणै सामणै निष्कलंक अतै निर्दोष बणाई करी खड़ा करा।

²³तुहै विस्‍वासा री नियूँआ पुर टिक्की रेय्आ अतै तैस सुसमाचारा री उम्मीद जो मत छड़ा जैडा कि तुहै हुणुरा हा, जठेरा प्रचार अम्बरा थलै पूरै संसार मन्ज करूरा हा अतै जैस प्रचार रा अऊँ पौलुस सेवक हा।

²⁴अबै अऊँ तियां दुखा री वजह थऊँ खुशी मन्दा जैड़ी कि तूसु तांई झेलदा अतै अऊँ मसीह रै तैस क्‍लेश रा सहभागी बणु जैड़ा तसेरै शरीर यानी कि तसेरी कलीसिया जो लगातार मुळु करदा।

²⁵प्रमात्मैं मिन्जो मसीह रा सेवक बणाऊरा हा अतै खास कम करनै जो दिता कि अऊँ प्रमात्मैं रा पुरा बचन गैर यहूदी जो हुणाऊ।

²⁶कई पीढ़ी थऊँ प्रमात्मैं सुसमाचार रै भेद जो ना दस्सु, पर अबै ऐस भेद जो अपणै चुणुरै मणु पुर प्रकट करू हा।

²⁷प्रमात्मैं यहूदी अतै गैर यहूदी पुर प्रकट करना चाहन्दा कि यीशु रा धन अतै महिमा सबी मणु तांई हा, अतै ऐह ही सो भेद हा कि मसीह तूसु मन्ज जिन्दा हा, ऐह तुसिओ अपणी महिमा री उम्मीद मन्ज सहभागी भूणै रा भरोसा दिन्दा हा।

²⁸मसीह रा प्रचार करीके अहै हरेक मणु जो दस्सी दिन्दै हिन अतै सारी अक्ल सोगी जैड़ी प्रमात्मैं असिओ दितुरी हा, हरेक मणु जो सखान्दै अतै चेतावनी दिन्दै हिन ताकि तियां जो मसीह यीशु मन्ज सिद्व करीके प्रमात्मैं सामणै हाजिर करन।

²⁹ठेरैतांये ही अऊँ मसीह री तैसा शक्ति रै अनुसार जैड़ा कि मिन्जो सामर्थ दिन्दी हा असर सोगी तन मन लाई करी मेहनत करदा हा।