Read Gaddi कुलुस्सियों 3 Bible Online

कुलुस्सियों 3 - Gaddi bible

कुलुस्सियों 3

¹ता अगर तुहै मसीह यीशु सोगी जिन्दै भछूरै हिन ता प्रमात्मैं जैड़ा स्वर्गा मन्ज तूसु तांयै रखूरा हा तठेरी खोज करा जेठी मसीह अज भी हा अतै प्रमात्मैं री सज्जी कनारी बैहुरा।

²ऐसा धरती पुर ही ना पर प्रमात्मैं जैड़ा स्वर्गा मन्ज तूसु तांयै रखूरा तैत पुर धैन ला।

³क्ओकि तून्दा पापी स्वभाव मरी गो हा अतै तुन्दी जिन्दगी मसीह यीशु सितै प्रमात्मैं मन्ज छिपुरी हा।

⁴जैहणै मसीह जैडा कि असिओ नोई जिन्दगी दिन्दा हा, जैहणै तैस दोबारा ईणा ता तूसु भी तैस सोगी तसेरी महिमा मन्ज सहभागी भूणा।

⁵ऐत तांई तियां बुरै कमा जो करना बन्द करा जैड़ा तून्दै पापी स्वभाव सोगी जुडुरै हिन जियां कि अशुद्धता, बुरी सोच, बुरी ईच्‍छा अतै लालच जैडा कि अक्क मूर्तिपूजा सांईयै हा।

⁶ठेरी व्जहा थऊँ आज्ञा ना मनणै बाळै पुर प्रमात्मैं रा गुस्सा भड़कदा।

⁷अतै तुहै भी जैहणै इआं बुराई मन्ज थियै ता इआं ही बुरी इच्छा रै अनुसार जिन्दगी बितान्‍दै थियै।

⁸पर अबै तुहै इआं सबी बुरी गल्ला जो मतलब कि गुस्सा, रोष, बैरभाव, निन्दा अतै गाळी बकणा छड़ी देय्आ।

⁹अक्की दुऐ सितै झूठ मत बल्ला कजो कि तुहै अपणै पूराणै पापी स्वभाव जो तठेरै बुरै कमा सोगी छडी दितुरा हा।

¹⁰अतै नोए स्वभाव जो अपनाई लैऊरा जैडा कि अपणै सृजनहार सांईयै ज्ञान पाणै तांई हमेशा नौआ बणदा गाहन्‍दा।

¹¹ठेरा परिणाम ऐह हा कि तियां मन्ज कोई भेद भाव निय्आ, तियां मन्ज ना ता कोई यहूदी रैऊ, ना कोई गैर यहूदी, ना खतना करूरै, ना कोई खतनै बगैर, ना कोई विदेशी, ना कोई गंवार, ना ता कोई दास अतै ना ता कोई आजाद सिर्फ मसीह यीशु सब कुछ अतै सबी मन्ज हा।

¹²प्रमात्मैं तूसु मणुओ पवित्र करीके चुणुरा हा अतै सो तूसु सोगी प्‍यार करदा हा ठेरैतांये बड़ी ज्यादा करूणा अतै भलाई अतै दीनता अतै नम्रता अतै सहनशीलता अपनाई लेय्आ।

¹³अगर कसी जो कसी पुर दोष लाणै री कोई व्जहा भोआ ता अक्की दुऐ री सैई लेय्आ अतै अक्की दुऐ रै अपराधा जो माफ करा जिआं कि यीशुऐ तून्दै अपराध माफ करै तियां तुहै भी करा।

¹⁴अतै सबी थऊँ ज्यादा जरूरी गल्ल ऐह हा कि तुहै अक्की दूये सोगी प्‍यार करा।

¹⁵अतै मसीह री शान्ती तून्दै दिला मन्ज राज करा। तुहै शान्ती मन्ज रैहणै तांयै हैदै गच्छुरै हिन क्ओकि तुहै अक्क ही शरीरा रै अंग हर, गल्ला तांयै प्रमात्मैं रा सदा धन्यवाद करदै रेय्आ।

¹⁶सदा मसीह रै बचना रै बारै मन्ज ध्यान करदै रेय्आ ताकि सो तून्दै कमा अतै सोच विचारा जो अपणै वशा मन्ज करी सका। सिद्व ज्ञाना सोगी अक्की दुऐ जो सखा अतै चेतावनी दिन्दै रेय्आ अतै अपणै-अपणै मनां मन्ज धन्यवाद सितै प्रमात्मैं रै भजन अतै स्तुतिगान अतै आत्मिक गीत गा।

¹⁷बचना सितै या फिरी कमां सितै जैडा कुछ भी करा सो सब प्रभु रै नां सितै करा अतै मसीह रै द्धारा प्रमात्मां पिता रा धन्यवाद करा।

¹⁸हे पत्नियो अपणै-अपणै पति रै हूक्मा मन्ना क्ओकि मसीह भूणै रै नातै असिओ ऐह ही करना चहिन्दा।

¹⁹हे पतियो तुहै अपणी-अपणी घरावाळी सितै प्‍यार करा अतै तियां सितै कोमलता रा व्यवहार करा।

²⁰हे बच्चेओ सबी गल्ला मन्ज अपणै-अपणै माँ बुड़ै री आज्ञा जो मन्ना क्ओकि प्रभु यीशु ऐत थऊँ खुश भुन्दा।

²¹हे बच्चै बाळिओ अपणै-अपणै बच्चै जो गुस्सा मत दुआ करखी ईयां ना भोआ कि तआंरा हौंसला टूटी गच्छा।

²²हे सेवको जैड़ै ऐस संसार मन्ज तून्दै मालक हिन ता सबी गल्ला मन्ज तआंरा हूक्म मन्ना पर मणु जो खुश करनै तांई ना पर इमानदारी अतै प्रमात्मैं रै डरा सितै।

²³अतै जैडा कुछ तुहै करदै हिन पूरै मना सितै करा ऐह समझी करी कि ऐह तुहै मणु तांई ना पर प्रमात्मैं तांई करू करदै हिन।

²⁴याद रखा कि प्रमात्मैं तुसिओ इनाम दिणा, अतै जैड़ी आशीष प्रमात्मैं अपणै मणु तांयै रखुरी हा तैत मन्ज सहभागी भूणा अतै तुहै प्रभु मसीह री सेवा करदै रेय्आ।

²⁵क्ओकि जैडा बुरा करदा प्रमात्मैं तैसिओ सजा दिणी हा, क्ओकि प्रमात्मां कसी रा पक्षपात ना करदा।